جەتىسۋ وبلىسىندا جاڭارتىلاتىن ەنەرگيا كوزدەرىن دامىتۋ باعىتىنداعى ءىرى جوبالاردىڭ ءبىرى جۇزەگە اسىرىلماق. ءوڭىر اكىمى بەيبىت يساباەۆ قىتاي حالىق رەسپۋبليكاسىنىڭ «Envision Energy» كومپانياسىنىڭ وكىلدەرىمەن كەزدەسىپ, قاراتال اۋدانىندا قۋاتى 250 مەگاۆاتت بولاتىن جەل ەلەكتر ستانساسىن سالۋ جوباسىن تالقىلادى.
جوبانىڭ جالپى قۇنى 215 ملن دوللاردى قۇرايدى. ينۆەستيتسيالىق باستاما اياسىندا زاماناۋي جوعارى تەحنولوگيالىق جەل گەنەراتورلارى مەن ەنەرگيا جيناقتاۋ جۇيەلەرى ورناتىلعان ەلەكتر ستانساسىن سالۋ كوزدەلىپ وتىر. بۇل نىسان ءوڭىردىڭ ەنەرگەتيكالىق الەۋەتىن ارتتىرىپ قانا قويماي, ەلىمىزدىڭ «جاسىل ەكونوميكاعا» كوشۋ ساياساتىنا دا ءوز ۇلەسىن قوسپاق.
كەزدەسۋ بارىسىندا «Envision Energy» كومپانياسىنىڭ اعا ۆيتسە-پرەزيدەنتى ۆەي ۆەي كومپانيانىڭ جاڭارتىلاتىن ەنەرگەتيكا سالاسىنداعى تاجىريبەسى تۋرالى ايتىپ ءوتتى. ونىڭ سوزىنشە, كومپانيا الەمدىك نارىقتا «اقىلدى» جەل تۋربينالارى مەن ەنەرگيا ساقتاۋ جۇيەلەرىن وندىرۋمەن اتى شىققان.
«جوبانىڭ جىلدىق ەلەكتر ەنەرگياسىن ءوندىرۋ كولەمى 3200 ساعاتتان اسادى دەپ بولجاپ وتىرمىز. بۇل ءوڭىردىڭ ەنەرگەتيكالىق تۇراقتىلىعىن قامتاماسىز ەتۋگە جانە ەلەكتر ەنەرگياسىن ءوندىرۋ كولەمىن ارتتىرۋعا مۇمكىندىك بەرەدى. سونىمەن قاتار زاماناۋي ەنەرگيا جيناقتاۋ جۇيەلەرى جەلدىڭ تۇراقسىزدىعىنا بايلانىستى تۋىندايتىن تاۋەكەلدەردى ازايتادى», دەدى ۆەي ۆەي.
ساراپشىلاردىڭ پىكىرىنشە, مۇنداي جوبالاردىڭ ماڭىزى جىلدان-جىلعا ارتىپ كەلەدى. بىرىنشىدەن, جەل ەنەرگەتيكاسى اتموسفەراعا زياندى قالدىقتار شىعارمايدى. ەكىنشىدەن, ءوڭىردىڭ ەلەكتر ەنەرگياسىنا دەگەن سۇرانىسىن قامتاماسىز ەتۋگە كومەكتەسەدى. ۇشىنشىدەن, قۇرىلىس جانە پايدالانۋ كەزەڭدەرىندە جاڭا جۇمىس ورىندارى اشىلادى. سونداي-اق ينفراقۇرىلىمنىڭ دامۋىنا جانە جەرگىلىكتى بيۋدجەتكە تۇسەتىن تۇسىمدەردىڭ ارتۋىنا وڭ اسەر ەتەدى.
جەتىسۋ وبلىسى جاڭارتىلاتىن ەنەرگيا كوزدەرىن دامىتۋدا تاجىريبەسى بار وڭىرلەردىڭ قاتارىنا كىرەدى. بۇعان دەيىن ءوڭىر اۋماعىندا بىرقاتار سۋ جانە كۇن ەلەكتر ستانسالارى ىسكە قوسىلعان. اسىرەسە وبلىس اۋماعىنداعى تابيعي-كليماتتىق جاعدايلار – تۇراقتى جەل اعىندارى, كۇن رادياتسياسىنىڭ جوعارى دەڭگەيى مەن سۋ رەسۋرستارىنىڭ بولۋى جاڭارتىلاتىن ەنەرگيا جوبالارىن دامىتۋعا قولايلى مۇمكىندىك بەرەدى. سوندىقتان جاڭا جەل ەلەكتر ستانساسىنىڭ سالىنۋى وڭىردەگى بالامالى ەنەرگەتيكانىڭ ۇلەسىن ارتتىرۋعا باعىتتالعان كەزەكتى ماڭىزدى قادام رەتىندە باعالانىپ وتىر.
كەزدەسۋ قورىتىندىسىندا وبلىس اكىمى جوبانىڭ ءوڭىر ءۇشىن وزەكتى ەكەنىنە ەرەكشە توقتالدى.
«ەنەرگەتيكا – وبلىسىمىزدى دامىتۋدىڭ نەگىزگى باعىتتارىنىڭ ءبىرى. سوندىقتان جاڭارتىلاتىن ەنەرگيا كوزدەرىن دامىتۋعا باعىتتالعان جوبالار, ونىڭ ىشىندە جەل ەلەكتر ستانسالارىن سالۋ جوباسى ءبىز ءۇشىن اسا ماڭىزدى. وسىعان بايلانىستى جوباعا قولدانىستاعى زاڭناما اياسىندا قاجەتتى قولداۋ كورسەتىلەدى», دەدى وبلىس اكىمى.
جەتىسۋ وبلىسى