كوكشەتاۋ. 1 ناۋرىز. اقمولا وبلىسى قازاقستان حالىقتارى اسسامبلەياسىنىڭ 20 جىلدىعىن كەڭ كولەمدە اتاپ ءوتتى. بۇل تۋرالى egemen.kz ءتىلشىسى حابارلادى.
«دوستىق» قوعامدىق كەلىسىم ۇيىندە وتكەن شاراعا اتالعان ۇيىمنىڭ بەلسەندىلەرى مەن قالا جۇرتشىلىعى جينالدى. وبلىس اكىمى, اسسامبلەيانىڭ اقمولا وبلىستىق فيليالىنىڭ توراعاسى س.كۋلاگيننىڭ اتىنان ونىڭ ورىنباسارى مارزيات توحاەۆا جۇرتشىلىقتى ايتۋلى مەرەكەمەن قۇتتىقتادى. ول: «ەلباسى, ۇلت كوشباسشىسى نۇرسۇلتان نازارباەۆتىڭ باستاماسىمەن قۇرىلعان اسسامبلەيا كوپ ۇلتتى حالقىمىزدى ۇيىستىرۋشى, كونستيتۋتسيالىق بەدەلدى ورگان رەتىندە قالىپتاستى», – دەدى. سونداي-اق, مارزيات يۋسۋپوۆنا وبلىستا 43 ەتنومادەني ورتالىق بەلسەندى جۇمىس ىستەپ جاتقانىن ايتتى.
قوعامدىق ۇيىمدار وتكىزىپ جاتقان تانىمدىق شارالار كوپ ۇلتتى حالقىمىزدىڭ قۇندى داستۇرلەرى مەن مادەني جاۋھارلارىن اشىپ كورسەتۋدە. وبلىسىمىز اسسامبلەيا جىلىنىڭ العاشقى اكتسياسى – «قازاقستان حالقى اسسامبلەياسى – 20 ىزگى ءىس» قوزعالىسىنىڭ سيمۆولى «تايقازاندى» ءبىرىنشى بولىپ قابىلداپ الدى. رەسپۋبليكالىق ەستافەتا شەڭبەرىندە اقمولا وبلىسى «مەيىرىم» قايىرىمدىلىق اكتسياسىن وتكىزىپ, 752 وتباسىنا 17 ميلليون تەڭگە كولەمىندە كومەك كورسەتتى. ودان بولەك, «اسسامبلەيا – بىرلىك جولىندا», «بەيبىتشىلىك پەن تۇسىنىستىكتىڭ جول كارتاسى» سىندى مەگاجوبالار جۇرتشىلىقتىڭ ىقىلاسىن اۋداردى. قازاقستان حالقى اسسامبلەياسى كەڭەسىنىڭ كەزەكتەن تىس پرەزيدەنت سايلاۋىن وتكىزۋ جونىندەگى ۇسىنىسىن اقمولالىقتار قىزۋ قولداپ, تاعدىرشەشتى ساياسي وقيعاعا بەلسەندىلىكپەن قاتىساتىنىن جەتكىزدى.
مەرەكەلىك شارادا بىرنەشە ۇلت وكىلدەرى وبلىس جۇرتشىلىعىن قۇتتىقتاپ, ءوز تىلەكتەرىن ءبىلدىردى. سولاردىڭ قاتارىندا اسسامبلەيانىڭ مۇشەسى, وبلىستىق «قازاق ءتىلى مەن مادەنيەتى» قوعامدىق ۇيىمىنىڭ توراعاسى مەيرامبەك قيىقوۆ, كوكشەتاۋ قالاسىنىڭ قۇرمەتتى ازاماتى, جازۋشى سىرىم راحيموۆ, قازاقستان تاتارلارى اسسوتسياتسياسى ارداگەرلەر كەڭەسىنىڭ توراعاسى فارۋك بوگاپوۆ, قالاداعى نازارباەۆ زياتكەرلىك مەكتەبىندە ءدارىس بەرىپ جۇرگەن امەريكالىق ۇستاز پاتريسيا كۋلينەين ەلىمىزدىڭ ساياسي ومىرىندە سالماقتى ورىن الاتىن اسسامبلەيانىڭ ءمان-ماڭىزى تۋرالى كەلەلى اڭگىمە قوزعادى.
شارا بارىسىندا اسسامبلەيا قۇرداستارى كوكشەتاۋ تەحنيكالىق ينستيتۋتىنىڭ كۋرسانتى اكەتاي جانبولات, ج.مۋسين اتىنداعى قازاق پەداگوگيكالىق كوللەدجىنىڭ وقۋشىسى ايجان قۇسمان, ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ ستۋدەنتى اقنۇر دىلمۇقاش, ا.مىرزاحمەتوۆ اتىنداعى ۋنيۆەرسيتەتتىڭ ستۋدەنتى ەربولات بالتينگە قۇرمەت كورسەتىلىپ, اقجاۋلىقتى اجەلەر باتاسىن بەردى.
باقبەرگەن امالبەك.
دەرەك, سۋرەت: egemen.kz.