تەحنولوگيا ءتىلىن ۇيرەتەتىن لاگەر

بۇل باستاماعا مەكتەپ وقۋشىلارى, كوللەدج جانە جوعارى وقۋ ورىندارىنىڭ ستۋدەنتتەرى, جاس ازىرلەۋشىلەر قوسىلدى. ودان بولەك, ديزاينەرلەر, مەدياكونتەنت جاساۋشىلار مەن اقپاراتتىق تەحنولوگيالارعا قىزىعۋشىلىق تانىتاتىن جاس­تاردى بىرىكتىردى. مۇندا ولار يننوۆاتسيالىق ويلاۋ قابىلە­تىن دامىتىپ, تەحنولوگيالىق قاۋىمداستىق قالىپتاستىرۋعا بەيىمدەلەدى.

وبلىستىق تسيفرلىق تەحنولوگيالار باسقار­ما­سىنىڭ مالىمەتىنشە, لاگەردىڭ نەگىزگى ماقساتى – جاستاردى جاساندى ينتەللەكت, تسيفرلىق ديزاين, باعدارلامالاۋ جانە مەديا­كونتەنت ءوندىرۋ سالالارىن­داعى زاماناۋي ۇردىستەرمەن تانىستىرۋ. سونىمەن قاتار قاتىسۋشىلاردىڭ شىعار­ما­شىلىق الەۋەتىن اشىپ, كومان­دالىق جۇمىس جۇرگىزۋگە باۋ­ليدى. سونداي-اق جوبالىق ويلاۋ داعدىلارىن جەتىلدىرۋگە جاعداي جاساۋ كوزدەلگەن.

IT-لاگەر باعدارلاماسى اشىق ەسىك كۇنىنەن باس­تالدى. العاشقى كۇنى قاتىسۋشىلار «Jetisu Digital» IT-حابىنىڭ قىزمەتىمەن, ءبىلىم بەرۋ باس­تامالارىمەن جانە وڭىردەگى تەحنولوگيالىق جوبالاردى دامىتۋ مۇمكىندىكتەرىمەن تانىس­تى. حاب ماماندارى جاستارعا قازىرگى تاڭدا جۇزەگە اسىپ جاتقان وقۋ باعدارلامالارى, ستارتاپتاردى قولداۋ تەتىكتەرى جانە تسيفرلىق يندۋسترياداعى سۇرانىسقا يە باعىتتار تۋرالى جان-جاقتى اقپارات بەردى.

باعدارلامانىڭ ماڭىزدى بولىگى – «AI Bootcamp» پراك­تيكالىق ساباقتارى. بۇل الاڭدا قاتىسۋشىلار جاساندى ينتەللەكت مۇمكىندىكتەرىن تاجىريبە جۇزىندە يگەرىپ, ءتۇرلى تسيفرلىق قۇرالدارمەن جۇمىس ىستەۋدى ۇيرەنەدى. ساباقتار بارىسىندا ينتەرفەيس پەن ۆەب-ديزايندى نەيروجەلىلەردىڭ كومەگىمەن ازىرلەندى. فوتو جانە بەينەكونتەنت جاساۋ, IT-جوبالار مەن تسيفرلىق ونىمدەردىڭ العاشقى پروتوتيپتەرى دايىندالدى. سونداي-اق زاماناۋي تەحنولوگيالاردى شىعارماشىلىق باعىتتا پايدالانۋ جولدارى كورسەتىلدى.

ۇيىمداستىرۋشىلاردىڭ اي­تۋىنشا, لاگەردىڭ ەرەك­شە­لىگى – وقىتۋ ۇدەرىسىنىڭ تەك دارىستەرمەن شەكتەلمەۋى. مۇندا تەوريالىق ءبىلىم تاجى­ري­بەلىك جۇمىستارمەن, شىعار­ماشىلىق تاپسىرمالارمەن جانە ەركىن قارىم-قاتىناسپەن ۇشتاسادى. بۇل جاستاردىڭ جاڭا اقپاراتتى جەڭىل قابىلدا­ۋىنا جانە العان ءبىلىمىن بىر­دەن تاجىريبەدە قولدانۋىنا مۇمكىندىك بەرەدى.

«Jetisu Digital» IT-حابى­نىڭ مەنەدجەرى راحمان ايدار­ ۇلىنىڭ ايتۋىنشا, لاگەردىڭ باستى قۇندىلىعى – جاستارعا تەحنولوگيانى تەك تۇتىنۋشى رەتىندە ەمەس, ونى جاساي الاتىن جانە دامىتا الاتىن مامان رەتىندە قاراۋعا مۇمكىندىك بەرۋ.

ء«بىزدىڭ ماقساتىمىز – قاتى­سۋشىلارعا زاماناۋي تسيفر­لىق قۇرالداردىڭ مۇمكىندىكتە­رىن كورسەتۋ عانا ەمەس, ولار­دىڭ شىعارماشىلىق جانە كاسىبي الەۋەتىن دامىتۋ. لاگەر بارىسىندا جاستار جاساندى ينتەللەكت نەگىزىندە جۇمىس ىستەي­تىن پلاتفورمالارمەن تانىسىپ, تسيفرلىق ونىمدەر ازىرلەۋ­دىڭ العاشقى قادامدارىن جا­ساي­دى. سونىمەن قاتار ءبىز كو­مان­دا­لىق بەلسەندىلىكتەرگە دە ەر­ەكشە نازار اۋدارىپ وتىر­مىز. ۇستەل ويىندارى, پىكىرتا­لاس الاڭدارى, شىعارماشى­لىق تاپسىرمالار مەن كينو كەشتەرى قاتىسۋشىلاردىڭ ءبىر-بىرىمەن جاقىنىراق تانىسىپ, جاڭا يدەيا­لارمەن الماسۋىنا مۇمكىندىك بەرەدى. مۇنداي بەيرەسمي ورتا ءبىلىم الۋدىڭ تيىم­دىلىگىن ارتتىرىپ, جاس­تاردىڭ كوممۋنيكاتيۆ­تىك جانە الەۋمەتتىك داعدىلا­رىن دامىتۋعا ىقپال ەتەدى», دەيدى ول.

لاگەر اياسىندا ۇيىمداس­تىرىلعان ءتۇرلى كومان­دالىق ويىن مەن ينتەراكتيۆتى شارالار قاتىسۋ­شىلار اراسىندا دوستىق اتموسفەرا قالىپتاستىردى. جاستار ءوز يدەيالارىن ورتاعا سالىپ, جاڭا باستامالاردى تالقىلاپ, تاجىريبە الماستى.

ۇيىمداستىرۋشىلاردىڭ ­پى­كىرىنشە, مۇنداي جوبالار وڭىردەگى تەحنولوگيالىق مادەنيەتتى دامىتۋدا ماڭىز­دى ورىن الادى. سەبەبى بۇگىن­دە جاساندى ينتەللەكتى مەن تسيفرلىق تەحنولوگيالار ءبىلىم بەرۋ, بيزنەس, مەديا, ماركەتينگ جانە باعدارلامالىق ونىمدەر ازىرلەۋ سياقتى كوپتەگەن سالا­نىڭ اجىراماس بولىگىنە اينالىپ وتىر. سوندىقتان جاس­تاردىڭ بۇل باعىتتارعا ەرتە قىزى­عۋشىلىق تانىتۋى ولاردىڭ بولاشاقتاعى كاسىبي دامۋىنا وڭ اسەر ەتەدى.

تالدىقورعان قالاسىندا­عى №19 ورتا مەكتەپتىڭ 11-سىنىپ وقۋشىسى ەراسىل ساناق مۇن­داي الاڭ­دار­دىڭ جاستار ءۇشىن ماڭىزى زور ەكەنىن اتاپ ءوتتى.

«ماعان IT Campus فورماتى وتە ۇنادى. بارلىعى ەركىن ءارى قىزىقتى ۇيىمداستىرىلعان. ەڭ باستىسى – ءار جەردەن كەلگەن وقۋشىلار ءبىر-بىرىمەن تانىسىپ, تاجىريبە ءبولىسىپ, جاڭا داعدىلاردى ۇيرەندى. وسىنداي جوبالار جاستاردىڭ دۇنيەتانىمىن كەڭەيتىپ, جاڭا دوستار تابۋىنا جانە تەحنولوگيالارعا دەگەن قىزىعۋشىلىعىن ارتتىرۋعا كومەكتەسەدى. مەنىڭ ويىمشا, بۇل باستاما الداعى ۋاقىتتا دا دامىپ, جاستاردىڭ جاڭا يدەيالارىن جۇزەگە اسىراتىن ماڭىزدى ورتالىققا اينالادى», دەيدى ول.

بۇگىندە تسيفرلىق تەحنولوگيالار قوعام ءومىرىنىڭ بارلىق سالاسىنا دەندەپ ەنىپ كەلەدى. وسى تۇرعىدان العاندا, جەتىسۋ وڭىرىندە قولعا الىنعان جازعى IT-لاگەر جاستاردىڭ زاماناۋي ءبىلىم مەن داعدىلاردى مەڭگەرۋىنە مۇمكىندىك بەرەتىن ماڭىزدى باستاما بولىپ وتىر. مۇنداي جوبالار بولاشاقتا ءوڭىردىڭ تەحنولوگيالىق الەۋەتىن ارتتىرىپ قانا قويماي, جاڭا بۋىننىڭ يننوۆاتسيالىق ويلاۋىن قالىپتاستىرۋعا, تسيفرلىق ەكونوميكاعا قاجەتتى بىلىكتى ماماندار دايارلاۋعا دا ىقپال ەتپەك.

جەتىسۋ وبلىسى