قىزىلوردا قالاسىندا «قاسقا جولدى قاسىم حان» تاقىرىبىندا رەسپۋبليكالىق عىلىمي-تاجىريبەلىك كونفەرەنتسيا ءوتتى. بۇل تۋرالى قىزىلوردا وبلىستىق سوتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
كونفەرەنتسيا جۇمىسىنا جوعارعى سوتتىڭ سۋدياسى ب.ماقۇلبەكوۆ, ماڭعىستاۋ, باتىس قازاقستان, اتىراۋ, اقتوبە, قىزىلوردا وبلىستىق سوتتارىنىڭ توراعالارى مەن سۋديالارى, رەسپۋبليكاعا بەلگىلى عالىمدار, قۇقىق قورعاۋ ورگاندارىنىڭ وكىلدەرى, جوعارى وقۋ ورىندارىنىڭ عىلىم قىزمەتكەرلەرى مەن وقىتۋشىلارى, وبلىستىڭ ارداگەرلەر كەڭەسىنىڭ مۇشەلەرى مەن جاستار ۇيىمدارىنىڭ بەلسەندىلەرى جانە دە باق وكىلدەرى قاتىستى.
جوعارعى سوتتىڭ سۋدياسى ب.ماقۇلبەكوۆ شارانى اشىپ, جوعارعى سوت توراعاسى قايرات ءماميدىڭ اشىق حاتىن وقىپ بەردى: «سىر بويىندا مارجانداي ءتىزىلىپ جاتقان قالالاردىڭ ىشىندەگى ەڭ ماڭىزدى, تاريحي ورىن – سىعاناق قالاسى. ونىڭ 1468 جىلى قازاق حاندىعىنىڭ تۇڭعىش استاناسى بولعانى تۋرالى زەرتتەۋشى ادىربەك سوپىبەكوۆتىڭ ەڭبەگىندە كەڭىنەن جازىلعان.
بۇدان باسقا سىر بويىندا جاتقان ساۋران, سوزاق, وتىرار, تۇركىستان, جەنت, بارشىنكەنت جانە تاعى باسقا دا قالالاردىڭ قازاق حاندىعىنىنىڭ ەكونوميكالىق كۇش-قۋاتىن نىعايتۋداعى ءرولى زور بولعانىندىعىن اتاپ كورسەتتى. وڭىرلىك كونفەرەنتسياعا اقتوبە, اتىراۋ, باتىس قازاقستان, ماڭعىستاۋ وبلىستارىنىڭ سۋديالارىن, زاڭگەرلەردى جانە تاريحشىلار مەن ەتنوگراف عالىمداردى شاقىرۋداعى نەگىزگى ماقسات – مەملەكەتىمىزدىڭ تاريح قويناۋىندا جاتقان دەرەك كوزىن, قۇپيا سىرىن اشىپ, ۇرپاقتار جادىنا ءسىڭىرۋ», – دەلىنگەن اشىق حاتتا.
كونفەرەنتسيا بارىسىندا دوكتور-پروفەسسورلار, سوت سۋديالارى ءار ءتۇرلى تاقىرىپتاردا باياندامالار جاسادى. ايتا كەتۋ كەرەك, كونفەرەنتسيا ماتەريالدارىنان جيناق قۇراستىرىلاتىن بولادى.
ەرجان بايتىلەس.
دەرەك, سۋرەت: egemen.kz.