فوتو: اقوردا
مەملەكەت باسشىسى قازاقستاننىڭ وركەنيەتتى ءارى وزىق ويلى ۇلت رەتىندە وزىنە سەنىمدى بولۋى كەرەكتىگىن جەتكىزدى.
«ءبىز وركەنيەتتى ءارى وزىق ويلى ۇلت رەتىندە وزىمىزگە سەنىمدى بولۋىمىز كەرەك. ەشكىمگە جالتاقتاماي باتىل ارەكەت ەتۋىمىز قاجەت. بۇدان باسقا جول جوق. ماقساتى ايقىن, كوزى اشىق, كوكىرەگى وياۋ ازاماتتارىمىز مەملەكەت تاعدىرىنا جاۋاپتى ەكەنىن تەرەڭ تۇسىنەدى. ولار ەرىكتىلەر قاتارىنا قوسىلىپ, قايىرىمدىلىق جاساپ, ماڭىزدى باستامالاردى تابىستى ىسكە اسىرىپ ءجۇر. ناعىز وتانشىل ادام كوزبوياۋشىلىققا بارمايدى, شىن پاتريوت ەل مۇددەسى ءۇشىن تاباندى ەڭبەك ەتەدى. جاسامپاز وتانشىلدىق دەگەنىمىز دە – وسى», دەدى قاسىم-جومارت توقاەۆ.
مەملەكەت باسشىسى: تاۋەلسىزدىكتىڭ 35 جىلدىعىن ناقتى ناتيجەلەرمەن قارسى الۋىمىز كەرەك
پرەزيدەنت مەملەكەت ءۇشىن قىسقا مەرزىمدى ەمەس, ۇزاق مەرزىمدى دامۋ ماڭىزدى ەكەنىن ايتتى.
«مەملەكەت ءۇشىن ءبىر كۇننىڭ قامى ەمەس, بولاشاقتىڭ جايى ماڭىزدى. سوندىقتان ءبىز ابايدىڭ ۇلاعاتىنا ساي «اقىرىن ءجۇرىپ, انىق باسامىز». ۇلت مۇددەسىن بارىنەن بيىك قويىپ, الىسقا كوز تىگەمىز. ءتول تاريحىمىزعا قۇرمەتپەن قاراپ, ۇرپاقتار ساباقتاستىعىن ساقتاۋعا باسا نازار اۋدارامىز. بۇل باعىتتا بەلسەندى جۇمىس ىستەلۋدە. جوشى حان جەرلەنگەن ۇلىتاۋ ايماعىنا وبلىس مارتەبەسى بەرىلدى. ەلىمىزدە جوشى ۇلىسىن زەرتتەۋ ينستيتۋتى قۇرىلدى. ءبىز بۇل مەكەمەنىڭ عىلىمي الەۋەتىن كۇشەيتە بەرەمىز. كوپ ۇزاماي قازاقستان تاريحىنىڭ جەتى تومدىق اكادەميالىق ەڭبەگى جارىققا شىعادى. ونىڭ ءبىر تومى تۇگەلدەي التىن وردا تاقىرىبىنا ارنالدى», دەدى مەملەكەت باسشىسى.
ەسكە سالا كەتەيىك, بۇگىن ەلىمىزدە مەملەكەتتىك رامىزدەر كۇنى اتالىپ ءوتىپ جاتىر. ەلىمىزدىڭ تاۋەلسىزدىگى مەن ەگەمەندىگىن ايقىندايتىن رامىزدەر 1992 جىلعى 4 ماۋسىمدا رەسمي تۇردە بەكىتىلدى.
