استانا. 28 اقپان. وتە كۇشتى ايازدىڭ سالدارىنان اقش-تىڭ سولتۇستىگىندەگى نياگارا سارقىراماسىنىڭ بەتىن تۇگەل مۇز جاپتى. بۇل تۋرالى Lenta.ru حابارلادى.
نياگارا سارقىراماسى ورنالاسقان اقش پەن كانادانىڭ شەكاراسىندا گرادۋس نولدەن 22 گرادۋسقا دەيىن ءتۇسىپ كەتتى. مۇنىڭ ءوزى نياگارادان تومەن قاراي قۇلايتىن مىڭداعان توننا سۋدىڭ بەتىن مۇز جاۋىپ قالۋىنا اپارىپ سوقتىردى. ءسويتىپ, الەمنىڭ تۇكپىر-تۇكپىرىنەن مىڭداعان تۋريستەردىڭ كەلىپ تاماشالاپ تۇراتىن كەرەمەت سۇلۋ مەكەندى ءوزىنىڭ كوركىنەن ايىردى. ماماندار قازىر نياگارانىڭ تولىق قاتىپ قالماعانىن, مۇزدىڭ استىنداعى سىزاشىقتان تومەنگە قاراي سارقىراپ سۋ اعىپ جاتقانىن ايتىپ وتىر. ال اتاقتى سارقىراما ءوزىنىڭ تاريحىندا بۇعان دەيىن ءبىر-اق رەت, 1848 جىلى عانا وسىلاي قاتىپ قالعان ەكەن. ايتكەنمەن, سينوپتيكتەر ايماقتاعى اۋا تەمپەراتۋراسىنىڭ بۇدان ءارى تومەندەي تۇسەتىنىن, دەمەك, سارقىرامانىڭ قاتۋى الداعى ۋاقىتتاردا دا بولاتىنىن العا تارتادى.
كانادانىڭ ونتاريو جانە امەريكانىڭ نيۋ-يورك شتاتتارىنىڭ شەكاراسىندا ورنالاسقان نياگارا الەمدەگى ەنى ەڭ ۇلكەن سارقىراما بولىپ تابىلادى. ونىڭ اقش-تاعى ەنى – 323, ال كاناداداعى ەنى 792 مەتردى قۇرايدى.
اقپاننىڭ ورتاسىنان باستاپ اقش-تا وتە سالقىن اۋا رايى قالىپتاستى. وتە كۇشتى اياز بەن قارلى بوراننان امەريكا اەروپورتتارىندا جۇزدەگەن رەيستەر كەيىنگە قالدىرىلدى, ال نيۋ-يوركتە, ۆاشينگتوندا جانە فيلادەلفيادا تەمپەراتۋرانىڭ تومەندەۋى رەكوردتىق كورسەتكىشكە جەتتى. الداعى ۋاقىتتاردا اقش-تىڭ اتلانت ايماعى مەن ورتا باتىس اۋماعىندا اۋا رايىنىڭ تەمپەراتۋراسى تسەلتسي بويىنشا مينۋس 40 گرادۋسقا دەيىن تومەن تۇسەدى دەپ كۇتىلىپ وتىر.
مۇرات ايتقوجا.
دەرەك, فوتو: Lenta.ru.