قىزىلوردادا بوتانيكالىق باقتىڭ قۇرىلىسى اياقتالىپ, ەل يگىلىگىنە پايدالانۋعا بەرىلدى, دەپ حابارلايدى Egemen.kz.
Alem Qurylys AQ كومپانياسى قۇرىلىسىن جۇزەگە اسىرعان باق ەكى قاباتتى زاماناۋي عيماراتتا ورنالاسقان. كەشەن ىشىندە وڭتۇستىك امەريكا, افريكا, قىتاي, مەكسيكا, جاپونيا, ماداگاسكار, اۋستراليا جانە باسقا دا وڭىرلەردىڭ وسىمدىكتەرىنە ارنالعان تاقىرىپتىق ەكسپوزيتسيالار جاساقتالعان.
عيماراتتىڭ ءبىرىنشى قاباتىندا كەڭ ۆەستيبيۋل, قابىلداۋ ايماعى, ساۋدا پاۆيلوندارى مەن قىزمەتتىك بولمەلەر ورنالاسقان. كەشەننىڭ نەگىزگى بولىگىن جالپى اۋماعى 1,5 مىڭ شارشى مەتردەن اساتىن ەكى ءىرى جىلىجاي قۇرايدى. وندا الەمنىڭ ءتۇرلى كليماتتىق بەلدەۋلەرىنەن اكەلىنگەن ەكزوتيكالىق وسىمدىكتەر وسىرىلەدى.
الماتىنىڭ بوتانيكالىق باعىنا كىرۋ بيلەتتەرىنىڭ باعاسى ءوستى
تروپيكالىق جىلىجايدا اۋا ىلعالدىلىعىن تابيعي دەڭگەيدە ۇستاپ تۇراتىن تۇمان قالىپتاستىرۋ جۇيەسى جۇمىس ىستەيدى. سونداي-اق ارتىق ىلعالدى بۇرىپ اكەتەتىن درەناج جۇيەسى قاراستىرىلعان.
بۇدان بولەك بوتانيكالىق باقتا ءبىلىم بەرۋ ءىس-شارالارىن وتكىزۋگە ارنالعان 40 ورىندىق ءدارىس زالى دا بار. ەكىنشى قاباتتا اكىمشىلىك كابينەتتەر, دەمالىس ايماعى, اسحانا جانە جىلىجايلارعا پانورامالىق كورىنىس اشىلاتىن شولۋ كوپىرى ورنالاسقان.
ەسكە سالا كەتەيىك, بۇعان دەيىن سىر ەلىندە العاش بولىپ وندىرىستىك باعىتتا قاراسورا وسىرىلەتىنىن جازعان ەدىك.