مەملەكەت باسشىسى قاسىم-جومارت توقاەۆ مادەنيەت جانە ونەر قىزمەتكەرلەرىن ماراپاتتاۋ راسىمىندە ءسوز سويلەپ, ءداستۇرلى ونەردى, اسىرەسە, جىر, تەرمە, كۇي ونەرىن دامىتۋعا ەرەكشە ءمان بەرۋ قاجەت دەپ سانايدى, دەپ حابارلايدى Egemen.kz.
پرەزيدەنتتىڭ ايتۋىنشا, مادەنيەت پەن ونەر سالاسى ەل ءومىرىنىڭ اجىراماس بولىگى رەتىندە ءاردايىم مەملەكەت نازارىندا بولادى.
«ەلىمىزدىڭ ءتول مادەنيەتى دۇنيە جۇزىنە لايىقتى دەڭگەيدە تانىلىپ كەلەدى. حالقىمىز جاقسى كورەتىن ايگىلى مۋزىكانتتار, انشىلەر, اكتەرلەر, سۋرەتشىلەر, بيشىلەر, كرەاتيۆتى يندۋستريا وكىلدەرى جانە باسقا دا ونەر شەبەرلەرى قازىرگى قازاق رۋحانياتىنىڭ جارقىن بەت-بەينەسىنە اينالدى. قازاقستاننىڭ شەتەلدە كەڭىنەن تانىلعان مەديا جوباسى – Silk Way Star حالىقارالىق ءان بايقاۋى. بۇل – زاماناۋي مادەني ديپلوماتيانىڭ ءبىر ۇلگىسى. ەلىمىز حالىقارالىق ۇيىمدارمەن ىقپالداستىقتى ايتارلىقتاي كۇشەيتتى. ءىرى مادەني-اعارتۋ جوبالارى بەلسەندى تۇردە قولعا الىنىپ, عىلىمي باستامالار كوتەرىلۋدە. بۇل سان قىرلى قازاق مادەنيەتىن ناسيحاتتاۋ باعىتىنداعى دۇرىس ءارى قاجەتتى ءىس. بۇگىنگى كەزدەسۋىمىز ماڭىزدى كۇننىڭ قارساڭىندا وتۋدە. مۇنىڭ سيمۆولدىق ءمانى زور. 1992 جىلى 22 مامىردا قازاقستان يۋنەسكو-نىڭ تولىق مۇشەسى اتاندى. ايتپاقشى, وسىدان 34 جىل بۇرىن, ءدال سول كۇنى ءمينيستردىڭ ورىنباسارى رەتىندە اتالعان بەدەلدى حالىقارالىق ۇيىمنىڭ پاريجدەگى شتاب-پاتەرىنە بارىپ, يۋنەسكو-نىڭ سول كەزدەگى باس ديرەكتورى فەدەريكو مايورمەن بىرگە وسى تاريحي ۋاقيعاعا قاتىستى قۇجاتقا قول قويعان ەدىم. سودان بەرى ەلىمىزدىڭ جيىرماعا جۋىق ماتەريالدىق جانە ماتەريالدىق ەمەس مۇراسى, سونىڭ ىشىندە تۇركىستانداعى قوجا احمەت ياساۋي كەسەنەسى يۋنەسكو تىزبەلەرىنە ەندى. بۇل ءتىزىم الداعى ۋاقىتتا ۇلعايا تۇسەدى. يۋنەسكو ىستەرى جونىندەگى ۇلتتىق كوميسسيا مەن ءتيىستى مينيسترلىكتەرگە وسىنداي مىندەت جۇكتەلدى», دەدى مەملەكەت باسشىسى.پرەزيدەنت سالتاناتتى ءىس-شاراعا قاتىسۋشىلاردى مادەنيەت جانە ونەر قىزمەتكەرلەرى كۇنىمەن قۇتتىقتادى.