مەملەكەت باسشىسى مادەنيەت جانە ونەر قىزمەتكەرلەرىن ماراپاتتاۋ راسىمىندە ءسوز سويلەدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنت, ەڭ الدىمەن, سالتاناتتى ءىس-شاراعا قاتىسۋشىلاردى مادەنيەت جانە ونەر قىزمەتكەرلەرى كۇنىمەن قۇتتىقتادى.
«بۇل – ەلىمىز ءۇشىن ءمان-ماڭىزى ايرىقشا مەرەكە. مادەنيەت – حالقىمىزدىڭ ۇلتتىق بولمىسى مەن رۋحاني دەربەستىگىنىڭ ارقاۋى ەكەنىن ءبارىمىز جاقسى بىلەمىز. مادەني جانە رۋحاني دۇنيەسىن ساقتاي بىلگەن ەلدىڭ مارتەبەسى بيىك, مەرەيى ۇستەم بولارى ايقىن. سىزدەر وسى يگى ماقسات جولىندا تاباندى جۇمىس ىستەپ كەلەسىزدەر. قوعامىمىز بۇل ەڭبەكتى جوعارى باعالايدى. بۇگىن مەن كاسىبي مەرەكە كۇنى ەلىمىزدەگى بارشا مادەنيەت جانە ونەر سالاسى ماماندارىنا شىنايى العىسىمدى بىلدىرەمىن! قازاق – ونەردىڭ كيەسىن ۇعاتىن, ونەرپازدىڭ قادىرىن بىلەتىن جۇرت. ءبىز ەرەكشە دارىن يەلەرىنە ءاردايىم لايىقتى قۇرمەت كورسەتەمىز. جۇرتىمىز «ونەردىڭ ءورىسى كەڭ» دەپ سىزدەردى قاشاندا قادىرلەگەن. مىنە, بۇگىنگى جيىن دا سونىڭ ءبىر كورىنىسى. شىن مانىندە, رۋحانياتى باي ەلدىڭ ويى وزىق, بولاشاعى جارقىن بولادى», دەدى قاسىم-جومارت توقاەۆ.مەملەكەت باسشىسى قازىر قازاقستاندا اۋقىمدى وزگەرىستەر بولىپ جاتقانىن ايتتى.
«بۇل جاي عانا وزگەرىستەر ەمەس: ەلىمىزدىڭ بولاشاعىنا تىكەلەي قاتىسى بار, ماعىناسى اۋقىمدى, تەرەڭ, كەشەندى, جۇيەلى رەفورمالار جاسالۋدا. ماقساتىمىز – وتانىمىزدى كۇشتى, وزىق مەملەكەت رەتىندە دامىتۋ, سونداي-اق, دارىندى, وتانشىل, جىگەرلى جانە كوزى اشىق, كوكىرەگى وياۋ جاستاردىڭ ءومىر جولىن اشىپ بەرۋ. ناۋرىز ايىندا ءبارىمىز ءبىر ەل, ءبىر حالىق بولىپ كونستيتۋتسيالىق رەفورماعا ءبىراۋىزدان قولداۋ كورسەتتىك. ورتاق ىسكە مادەنيەت سالاسىنىڭ ماماندارى مەن ونەر قايراتكەرلەرى دە بەلسەنە اتسالىستى. ساياسي ناۋقان كەزىندە حالقىمىز ەلىمىزدىڭ جارقىن بولاشاعىنا ۇلكەن سەنىممەن قاراپ, تاريحي تاڭداۋىن جاسادى. وسىلايشا, جاڭا كونستيتۋتسيامىز تۇعىرىنا قوندى. راسىندا, بۇل قازاقستاننىڭ كەلەشەگىن ايقىندايتىن ماڭىزدى شەشىم بولعانى انىق. اتا زاڭ – ەل تاۋەلسىزدىگى مەن مەملەكەتتىگىنىڭ مىزعىماس كەپىلى, حالقىمىز ءجۇرىپ كەلە جاتقان جولدىڭ باستى تەمىرقازىعى. كونستيتۋتسيادا ۇلتىمىزدىڭ مۇددەسى, ماقسات-مۇراتى مەن ارمان-تىلەگى ايقىن كورىنىس تاپتى. اتا زاڭعا سايكەس ەلىمىزدىڭ ەگەمەندىگىن, جەرىمىزدىڭ تۇتاستىعىن, ازاماتتاردىڭ قۇقىعى مەن بوستاندىعىن قورعاۋ بۇلجىماس قاعيدات سانالادى»دەدى پرەزيدەنت.