مەكتەپ پارتاسىنداعى بالا ەرتەڭ قانداي ماماندىق يەسى بولادى؟ بۇعان كەيدە توقساندىق باعا مەن ەمتيحان ناتيجەسىنەن بۇرىن, ونىڭ بەلگىلى ءبىر سالاعا دەگەن تۇراقتى قىزىعۋشىلىعى جاۋاپ بەرەدى. اسىرەسە جاراتىلىستانۋ, تەحنيكا جانە اقپاراتتىق تەحنولوگيالار باعىتىنا ەرتە بەيىمدەلگەن وقۋشىنىڭ بولاشاق كاسىبى دە سول ىزدەنىستەن باستاۋ الىپ جاتادى. ءبىرى عارىشقا قىزىعىپ تەلەسكوپ قۇراستىرسا, ەندى ءبىرى درون تەحنولوگياسىن مەڭگەرۋگە تالپىنادى. استاناداعى وقۋشىلار سارايىندا وتكەن «التىن وردا» مەكتەبى وقۋشىلارىنىڭ جوبالار فەستيۆالى وسىنداي ىزدەنىستىڭ ناقتى كورىنىسىن كورسەتتى.
مۇنداعى باستى ماقسات – بالانىڭ العان ءبىلىمىن ومىرمەن ۇشتاستىرىپ, ويىن تاجىريبە ارقىلى دالەلدەۋگە باۋلۋ. ياعني, وقۋشى دايىن اقپاراتتى جاتتاپ قانا قويماي, ءوزى زەرتتەپ, بايقاپ, سۇراق قويىپ, وعان جاۋاپ ىزدەۋگە تالپىنادى. سوندىقتان بۇل الاڭدا بالالار قىزىعۋشىلىعىن ناقتى جوباعا اينالدىرىپ, ەڭبەگىن كوپشىلىك الدىندا تانىستىردى. ءبىرى شاعىن راكەتا قۇراستىرىپ, ۇشىرۋ مەحانيزمىن زەرتتەسە, ەندى ءبىرى گاليلەي تەلەسكوپىنىڭ جۇمىس ىستەۋ قاعيداتىن تاجىريبە ارقىلى كورسەتۋگە تىرىسقان. بولاشاق عارىش كەمەسىنىڭ 3D ۇلگىلەرى, درون تەحنولوگيالارى مەن IT باعىتىنداعى جوبالار دا كوپشىلىك نازارىنا ۇسىنىلدى.
فيزيكا ءپانىنىڭ مۇعالىمى اسپانديار تىلەۋقاباقوۆتىڭ ايتۋىنشا, فەستيۆالدە ۇسىنىلعان جوبالاردىڭ بىرقاتارى بۇعان دەيىن قالالىق جانە رەسپۋبليكالىق بايقاۋلاردا جۇلدە العان.
«وقۋشىلارىمىز فيزيكا, استرونوميا, عارىش تاقىرىبىندا عىلىمي جوبالار ازىرلەدى. راكەتا ۇشىرۋ, گاليلەي تەلەسكوپىن جاساۋ, بولاشاق عارىش كەمەسىن 3D مودەلدەۋ باعىتىنداعى جۇمىستار بالالاردىڭ عىلىمعا قىزىعۋشىلىعىن ارتتىرادى. مۇنداي ىزدەنىس ولاردىڭ شىعارماشىلىق پەن زەرتتەۋ قابىلەتىن دامىتادى», دەيدى مۇعالىم.
مەكتەپ ديرەكتورى ءنازيلا تۇرماحامبەتتىڭ ايتۋىنشا, «التىن وردا» مەكتەبىندە وقۋشىلاردىڭ شەت تىلدەرىن مەڭگەرۋىنە, تسيفرلىق ساۋاتتىلىعىن ارتتىرۋعا, زەرتتەۋ قابىلەتىن دامىتۋعا باسىمدىق بەرىلەدى. باستاۋىش سىنىپتاردا «سينگاپۋر ماتەماتيكاسى» ادىستەمەسى قولدانىلىپ, بالالاردى ەسەپتى جاتتاپ ەمەس, لوگيكالىق ءارى جۇيەلى ويلاۋ ارقىلى شىعارۋعا ۇيرەتەدى. سونىمەن قاتار مەكتەپتە زاماناۋي تەحنولوگيالار كەڭىنەن پايدالانىلىپ, نەگىزگى پاندەر تەرەڭدەتىلىپ وقىتىلادى. وقۋشىلارعا ءتۇرلى ۇيىرمەلەر مەن سپورت سەكتسيالارى دا جۇمىس ىستەيدى.
ء«بىز ءۇشىن مەكتەپ تەك ءبىلىم بەرەتىن ورىن عانا ەمەس, جاڭا يدەيالار مەن جوبالار تۋىندايتىن ورتا. ەڭ ماڭىزدىسى, ءار بالا ءوزىن قولداۋلى, نازارداعى تۇلعا رەتىندە سەزىنۋى كەرەك», دەيدى مەكتەپ ديرەكتورى.
فەستيۆالدە وقۋشىلار قوناقتاردىڭ سۇراعىنا جاۋاپ بەرىپ, يدەياسىنىڭ ءمانىن تۇسىندىرۋگە تىرىستى. 10-سىنىپ وقۋشىسى الىبەك ونەرباي بيىل وسى مەكتەپكە اۋىسقان. ونىڭ ايتۋىنشا, «التىن وردا» مەكتەبىن تاڭداۋعا IT باعىتى مەن ۇستازدار, وقۋشىلار اراسىنداعى اشىق قارىم-قاتىناس اسەر ەتكەن. الىبەك درون تەحنولوگيالارىنا قىزىعادى. ول ورتالىق ازيا دەڭگەيىندەگى درون سيمۋلياتور جارىسىندا العاشقى وندىققا كىرگەنىن, سونداي-اق بىرنەشە شاعىن جارىستا جۇلدەلى ورىن العانىن ايتتى. وقۋشىنىڭ سوزىنشە, درون فۋتبولى كوماندالىق ويىنعا ۇقسايدى: بەس ادامنان قۇرالعان توپ درونداردى باسقارىپ, بەلگىلەنگەن تاپسىرمالاردى ورىندايدى. مۇنداي جوبا بالادان تەحنيكالىق ماشىقپەن بىرگە جىلدام شەشىم قابىلداۋ, دالدىك, كوماندالىق ۇيلەسىم تالاپ ەتەدى.
جي داۋىرىندەگى مەكتەپ: وقۋشىلارعا پايداسى مەن قاۋپى قانداي؟
اتا-انالار ءۇشىن دە فەستيۆال مەكتەپتىڭ ىشكى ءومىرىن جاقىنىراق تانۋعا مۇمكىندىك بەردى. ءبىرىنشى سىنىپ وقۋشىسىنىڭ اناسى گۇلنۇر دوسقاليەۆا «التىن وردا» مەكتەبى تۋرالى العاش Instagram ارقىلى بىلگەنىن, كەيىن مەكتەپكە ارنايى ەكسكۋرسياعا كەلىپ, بالاسىن وسى ءبىلىم ورداسىنا بەرۋگە شەشىم قابىلداعانىن ايتتى.
«قىزىمنىڭ قاي سالاعا بەيىم ەكەنىن ءالى ناقتى ايتا المايمىن, بىراق ماتەماتيكاعا يكەمى بار سياقتى. مەنى مەكتەپتىڭ IT باعىتى قىزىقتىردى. قازىر بولاشاق تسيفرلىق تەحنولوگيالارمەن تىعىز بايلانىستى ەكەنى انىق. مۇندا ماتەماتيكاعا دا ايرىقشا كوڭىل بولىنەدى. وسىنداي ءىس-شارالار بالالاردىڭ قارىم-قاتىناس جاساۋ قابىلەتىن, وزىنە سەنىمىن, ءوزىن ەركىن ۇستاۋىن قالىپتاستىرادى», دەيدى اتا-انا.
ايتا كەتەيىك, «التىن وردا» مەكتەبى اشىلعانىنا ەكى جىل عانا بولعانىمەن, ءبىلىم بەرۋ ساپاسى مەن وقۋشىلار جەتىستىگى ارقىلى كوزگە تۇسە باستاعان. وقۋ جىلى ىشىندە 94 وقۋشى قالالىق وليمپيادالاردىڭ, 37 وقۋشى وبلىستىق كەزەڭدەردىڭ, 12 وقۋشى رەسپۋبليكالىق دەڭگەيدەگى بايقاۋلاردىڭ جۇلدەگەرى اتاندى. سونداي-اق 5 وقۋشى حالىقارالىق كونكۋرستار مەن عىلىمي جوبالارعا قاتىستى. مەكتەپ كومانداسى 22-26 ءساۋىر ارالىعىندا تۇركيانىڭ انتاليا قالاسىندا وتكەن Fibonacci International Robot Olympiad-2026 حالىقارالىق روبوتوتەحنيكا وليمپياداسىنا دا قاتىسقان.
مەكتەپتەردە وقۋشىلارعا سمارتفون قولدانۋعا تىيىم سالىنۋى مۇمكىن
جوبالار فەستيۆالى وقۋشى ەڭبەگىن كوپشىلىككە كورسەتۋ عانا ەمەس, بالانىڭ بويىنداعى ىزدەنىس پەن سەنىمدى كۇشەيتەتىن ورتا ەكەنىن اڭعارتتى. عىلىمعا قىزىققان جاس ءۇشىن العاشقى مودەل, العاشقى تاجىريبە, العاشقى كوپشىلىك الدىنداعى تانىستىرىلىم ۇلكەن جولدىڭ باسى بولۋى مۇمكىن.