مەملەكەت باسشىسى: تۇركىستان – اتاجۇرتىمىزدىڭ مىزعىماس تەمىرقازىعى

قاسىم-جومارت توقاەۆ تۇركىستاننىڭ تاريحي-رۋحاني ماڭىزىن اتاپ ءوتىپ, قالا تۇركى الەمىنىڭ قۇندىلىقتارىن بىرىكتىرەتىن قاسيەتتى ورتالىق ەكەنىن ايتتى.

«تۇركىستان – اتاجۇرتىمىزدىڭ مىزعىماس تەمىرقازىعى. ەكى دۇنيە ەسىگى, ەر تۇرىكتىڭ بەسىگى اتانعان شەجىرەلى شاھار. كونە قالا قاشاندا ءتۇبى ءبىر تۇركى جۇرتىنىڭ قاسيەتتى قارا شاڭىراعى سانالعان. تۇركىستان تورىندەگى ازىرەت سۇلتان كەسەنەسى – رۋحاني تۇتاستىق پەن تاريحي ساباقتاستىق سيمۆولى. قوجا احمەت ياساۋي باۋىرلاس ەلدەردىڭ دۇنيەتانىمىن كەڭەيتۋگە زور ۇلەس قوستى. ادامزاتقا ورتاق قۇندىلىقتاردى بارىنشا دارىپتەدى. حالىقتى جاقسىلىققا, جاسامپازدىققا, ادالدىققا شاقىردى», دەدى پرەزيدەنت.

پرەزيدەنت تۇركى مەملەكەتتەرى ۇيىمىنىڭ بەيرەسمي سامميتىنە قاتىسۋ ءۇشىن تۇركىستان قالاسىنا باردى

مەملەكەت باسشىسى قوجا احمەت ياساۋي مۇراسىنىڭ تۇركى حالىقتارىنىڭ دۇنيەتانىمى مەن رۋحاني تۇتاستىعىن نىعايتۋداعى ءرولىن ەرەكشە اتاپ ءوتىپ, ونىڭ گۋمانيستىك يدەيالارى بۇگىنگى كۇنگە دەيىن وزەكتىلىگىن جوعالتپاعانىن جەتكىزدى.

«عۇلاما ويشىل يسلام ءدىنىن تۇركى جۇرتىنىڭ تانىم-تۇسىنىگىمەن ۇشتاستىرا ءبىلدى. اسا قۇندى ەڭبەكتەر جازىپ, مول مۇرا قالدىردى. ءياساۋيدىڭ تاعىلىمدى ويلارى مەن حيكمەتتەرى – تۇركى حالىقتارىنىڭ باعا جەتپەس بايلىعى. ۇلى بابامىز دارىپتەگەن قۇندىلىقتار ءالى دە وزەكتىلىگىن جوعالتقان جوق. سوندىقتان ءبىز ءياساۋيدىڭ گۋمانيستىك يدەيالارىنا باسا ءمان بەرىپ وتىرمىز. قازىر ەلىمىزدە «ادال ازامات», «ادىلەتتى قازاقستان», «تازا قازاقستان» جانە باسقا دا بىرەگەي باستامالار تابىستى جۇزەگە اسىرىلىپ جاتىر. باستى ماقساتىمىز – ۇلت ساپاسىن بارىنشا جەتىلدىرىپ, مەملەكەتتىگىمىزدى نىعايتا ءتۇسۋ. تۇپتەپ كەلگەندە, وسى اۋقىمدى جۇمىستىڭ نەگىزى ياساۋي ىلىمىنەن باستاۋ الادى», دەدى قاسىم-جومارت توقاەۆ.

ەسكە سالا كەتەيىك, تۇركىستاندا تۇركى مەملەكەتتەرى ۇيىمىنىڭ بەيرەسمي ءسامميتى ءوتىپ جاتىر. سامميت الدىندا قاسىم-جومارت توقاەۆ پەن شاۆكات ميرزيوەۆ قازاقستان مەن وزبەكستان اراسىنداعى باۋىرلاستىق بايلانىس جانە رۋحاني ىنتىماقتاستىق نىشانى رەتىندە تۇركىستاندا بوي كوتەرگەن مەشىتپەن تانىستى.