باقسى, بالگەر, كورىپكەل دەسە ءىشىپ وتىرعان اسىن تاستاي بەرىپ ەلەڭ ەتە قالاتىنداردىڭ ءبىرى – ءبىزدىڭ قازەكەڭ. سەنگىش قازاقتار عانا ەمەس ەكەن. الەم جانكۇيەرلەرىنىڭ ەس-ءتۇسىن كەشەگى دودادا كورىپكەل وسمينوگ-سەگىزاياق پاۋل العانى راس. افريكاداعى چەمپيوناتتا ونىڭ بولجاۋى ايداي كەلدى ەمەس پە.
پاۋل 2008 جىلى اعىلشىنداردىڭ دورسەت پاركىندە دۇنيەگە كەلىپتى. ءوزىنىڭ ەرەكشە جاراتىلىس يەسى ەكەنىن بۇل سەگىزاياق جاندىك اكۆاريۋمعا كورەرمەندەر كەلگەندە اڭعارتۋعا تىرىسادى ەكەن. بۇگىندە ول گەرمانيانىڭ وبەرحاۋزەن قالاسىنداعى وكەاناريۋمدە ءومىر ءسۇرىپ جاتىر.
2008 جىلعى ەۋروپا چەمپيوناتىندا پاۋلدىڭ بولجاۋى 80 پايىز تۋرا كەلگەن. وكەاناريۋم قىزمەتكەرلەرى باسكە تۇسەتىن ەكى مەملەكەتتىڭ جالاۋى بار ميديا سالىنعان قوس كونتەينەردى سۋعا باتىرعاندا پاۋل جەم العان كونتەينەرگە جالاۋى ءىلىنگەن ەل جەڭىسكە جەتەدى ەكەن. ءبىر كەرەمەتى, وڭتۇستىك افريكا رەسپۋبليكاسىندا وتكەن الەم چەمپيوناتىندا پاۋلدىڭ ساۋەگەيلىگى 100 پايىز راستالدى.
سەگىزاياق نەمىستىڭ اسىن ءىشىپ-جەپ وتىرمىن, كوڭىلدەرىنە كەلمەسىن, الداي سالايىن دەگەندى بىلمەدى. جارتىلاي فينالداعى گەرمانيا مەن يسپانيا ماتچىنىڭ الدىندا ول يسپان جالاۋى بار كونتەينەردەن جەم العان. راسىندا, يسپانيا جەڭدى, گەرمانيا جەڭىلدى. قانىنا قارايعان نەمىس جانكۇيەرلەرىنىڭ ءبىرى بەيشارا جاندىكتى بورشالاپ سويىپ, قۋىرىپ جەۋگە دايىن ەكەنىن ايداي الەمگە ينتەرنەت ارقىلى ءبىلدىرتتى. بۇعان دەيىن اۆستراليا, گانا, انگليا جانە ارگەنتينا قۇرامالارىنىڭ جانكۇيەرلەرى دە ءپاۋلدى ءيتتىڭ ەتىنەن دە جەك كورەتىندىكتەرىن جاسىرعان جوق. ال, يسپاندىقتار فينالعا وتەتىنىن بىلدىرگەن پاۋلعا ارناۋلى كۇزەت تە قويدىرماق بولعان دەسەدى.
سەگىزاياق سوڭعى ماتچتارداعى ويىن تاعدىرلارىن ءدال كورسەتكەن. گەرمانيا مەن ۋرۋگۆاي ءۇشىنشى ورىن ءۇشىن تالاسقاندا پاۋل نەمىس جانكۇيەرلەرىنىڭ تالاعىن تارس ايىرا جازداپ, ون مينوتتەي “ويلانىپتى”. سودان سوڭ گەرمانيا جالاۋى بار كونتەينەرگە بارعان. راسىندا, جەڭىس نەمىستەرگە وڭاي كەلگەن جوق. ەكىنشى تايمنىڭ باسىندا ۋرۋگۆايلىقتار ەسەپتى تەڭەستىرگەنى بىلاي تۇرسىن, ءبىراز ۋاقىتقا دەيىن 2:1 ەسەبىمەن الدا تۇردى عوي. سەگىزاياق دالباسالاي بەرەدى, بۇل ادامداردىڭ ويىنى, ال مىناۋ ۇلكەن شوۋ دەگەندەر دە بولعان. الايدا, پاۋل گەرمانيانىڭ ءۇشىنشى ورىن ءۇشىن ايقاستا مەرەيى ۇستەم بولاتىنىن ەكى كۇن بۇرىن بولجاعاندىقتان ونىڭ ساۋەگەيلىگىنە الگىندەي اڭگىمەلەر كولەڭكە تۇسىرە العان جوق.
كورىپكەل جاندىك دۇنيە ءجۇزىن وسىنداي تاماشاعا باتىرىپ جاتقاندا بۋكمەيكەرلەر كەڭسەلەرى پايداعا بەلشەسىنەن باتىپتى. پاۋل جارتىلاي فينالدا يسپانيا جەڭەدى دەپ بولجاسا دا گەرمانيانىڭ ءبىر قىزۋقاندى جانكۇيەرى سۇيىكتى قۇراماسى جەڭەدى دەپ 500 مىڭ ەۆرو سالىپتى. گەرمانيانىڭ مەرەيى ۇستەم بولاتىنىنا سەنگەن بۇنداي بوزىم جالعىز بولماسا كەرەك. ءWىllىam ءHىll بۋكمەكەر كەڭسەسى گەرمانيانىڭ جەڭىلۋىنىڭ وزىنەن عانا 5 ميلليون ەۆرو پايدا تاپقان.
سەگىزاياق پاۋل الەمنىڭ كوزقۇرتى بولىپ تۇرعانىن ءوزى سەزە مە, سەزبەي مە, بۇل بولەك اڭگىمە. ول – جاراتىلىستىڭ ادام ۇعىمىنا سىيمايتىن ءبىر كەرەمەتى, تىلسىم قۇپياسى. ايتايىق دەگەنىمىز, قازىر قازاقتا بالشى, بالگەر, قۇشىناش, ساۋەگەيلەر كوبەيىپ كەتتى. “سۇڭقارلار” مەن “اققۋلار” كوپ, اۋليەلى جەردى قويماي ارالاپ ءجۇر ولار. ارۋاقتارمەن تىلدەسىپ, ارعى دۇنيەنىڭ “جاڭالىعىن” ءبىلىپ وتىراتىن سولاردىڭ ابىرويىن پاۋل-ماق ۇلىق الەم چەمپيوناتىندا قاتتى ءتۇسىرىپ كەتتى.
باقتيار تايجان.