ەكى ەل دەلەگاتسيالارىنىڭ قاتىسۋىمەن وتكەن كەلىسسوز بارىسىندا پرەزيدەنت ءوزارا ىقپالداستىقتى ودان ءارى نىعايتۋدىڭ الەۋەتى مول ەكەنىنە توقتالدى, دەپ جازادى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«ەكىجاقتى ساياسي ىنتىماقتاستىق پەن ەكونوميكالىق قارىم-قاتىناستىڭ بولاشاعى زور دەپ سانايمىن. بۇۇ, ەقىۇ جانە باسقا دا حالىقارالىق ۇيىمدار اياسىنداعى ميسسيالارىمىز تىعىز جۇمىس ىستەپ, ديالوگتى تۇراقتى تۇردە ساقتاپ كەلەدى. كوپتەگەن باعىت بويىنشا بايلانىستارىمىزدى دامىتۋعا مۇمكىندىك جەتكىلىكتى», دەدى مەملەكەت باسشىسى.
قاسىم-جومارت توقاەۆ چەحيانىڭ سىندارلى ءارى پراگماتيكالىق سىرتقى ساياساتىنا جوعارى باعا بەردى. پرەزيدەنتتىڭ ايتۋىنشا, ەكى ەل اراسىنداعى ساياسي ديالوگ سان قىرلى سەرىكتەستىككە قولايلى جاعداي جاسايدى. پارلامەنتارالىق ىقپالداستىق قارقىندى دامىپ كەلەدى.
مەملەكەت باسشىسى چەحيا قازاقستاننىڭ ەۋروپا وداعىنداعى نەگىزگى ساۋدا سەرىكتەستەرىنىڭ ءبىرى ەكەنىنە نازار اۋداردى.
«تاۋار اينالىمىنىڭ ديناميكاسى كوڭىل كونشىتەرلىكتەي. ارينە, ءبىز الداعى ۋاقىتتا دا ساۋدا-ەكونوميكالىق بايلانىستاردى كەڭەيتۋگە نيەتتىمىز. بۇگىندە ەلىمىزدە 190-نان استام چەح كومپانياسى جۇمىس ىستەپ جاتىر, سونىڭ ىشىندە Škoda, Omnipol, Tatra جانە ZVVZ سەكىلدى ماڭدايالدى كاسىپورىندار مەن باسقا دا ءوندىرىس سالاسىنداعى سەنىمدى ارىپتەستەرىمىز بار. بىرلەسكەن جوبالاردى جۇزەگە اسىرۋعا مۇمكىندىك مول», دەدى قاسىم-جومارت توقاەۆ.
قاسىم-جومارت توقاەۆ پەن اندرەي بابيش شاعىن قۇرامدا كەلىسسوز جۇرگىزدى
ءوز كەزەگىندە اندرەي بابيش بۇگىنگى ساپار ەكىجاقتى قارىم-قاتىناستىڭ جاڭا كەزەڭىنە جول اشاتىنىن ايتتى.
ء«بىز قازاقستاندى ستراتەگيالىق سەرىكتەس سانايمىز. بىرلەسكەن كۇش-جىگەردىڭ ارقاسىندا ەكىجاقتى تاۋار اينالىمىنىڭ كولەمىن ارتتىرامىز دەپ سەنەمىن. ەڭ الدىمەن, ەنەرگەتيكا سالاسىنداعى ىقپالداستىقتى نىعايتقىمىز كەلەدى. ءسىزدىڭ ەلدەن ۇزاق مەرزىمدى مۇناي تاسىمالىنا مۇددەلىمىز. ەنەرگەتيكا سالاسىن دامىتۋ ستراتەگيامىز اتوم ەنەرگياسىنا ارقا سۇيەيدى. سوندىقتان قازاقستانعا الەمدەگى ۋران وندىرەتىن ءىرى مەملەكەت رەتىندە دە قىزىعۋشىلىق تانىتامىز», دەدى چەحيا پرەمەر-ءمينيسترى.
چەح ۇكىمەتىنىڭ باسشىسى قازاقستاننىڭ ەنەرگەتيكالىق قاۋىپسىزدىگى قۋات ءوندىرۋدىڭ ارتاراپتاندىرىلعان تاسىلىنە نەگىزدەلگەنىنە ءمان بەردى. سونداي-اق ول چەح كومپانيالارىنىڭ اتالعان سالادا بىرلەسكەن جوبالاردى جۇزەگە اسىرۋعا دايىن ەكەنىن راستادى.
اندرەي بابيش قاسىم-جومارت توقاەۆتى جاڭا كونستيتۋتسيا قابىلداۋ بويىنشا رەفەرەندۋمنىڭ تابىستى وتۋىمەن قۇتتىقتاپ, بۇعان مەملەكەتتىلىكتى نىعايتاتىن جانە ەلدى جارقىن بولاشاققا جەتەلەيتىن ماڭىزدى قادام رەتىندە باعا بەردى.
قاسىم-جومارت توقاەۆ پەن اندرەي بابيش ونەركاسىپ, مۇناي-گاز, اتوم ەنەرگياسى, كولىك-لوگيستيكا, قورعانىس ونەركاسىبى, تسيفرلاندىرۋ, اۋىل شارۋاشىلىعى جانە دەنساۋلىق ساقتاۋ سالالارىنداعى ءوزارا ىنتىماقتاستىق پەرسپەكتيۆالارىن تالقىلادى.
پرەزيدەنت اقوردادا چەح رەسپۋبليكاسىنىڭ پرەمەر-ءمينيسترىن قارسى الدى
اڭگىمەلەسۋ بارىسىندا ەكى ەل اراسىنداعى قارىم-قاتىناس تەك ەكونوميكامەن شەكتەلمەيتىنى, ورتاق تاريحي وقيعالار مەن مادەني-گۋمانيتارلىق بايلانىستارعا نەگىزدەلەتىنى جايىندا ايتىلدى.
مەملەكەت باسشىسى قازاق دالاسىنا پرجەۆالسكي جىلقىلارىن قايتا جەرسىندىرۋدى كوزدەيتىن بىرەگەي جوباعا اتسالىسقانى ءۇشىن چەحيالىق ارىپتەستەرىنە ريزاشىلىعىن ءبىلدىردى. پرەزيدەنت وڭىرلىك ەكولوگيالىق سامميتتە بۇل باستامانى ەلىمىزدىڭ بيوالۋانتۇرلىلىكتى ساقتاۋ سالاسىندا جەتكەن جەتىستىكتەرىنىڭ ءبىرى رەتىندە اتاعان بولاتىن.
پرەمەر-مينيستر قازاقستان ازاماتتارىنا ۆيزا رەجيمىن جەڭىلدەتۋ ماسەلەسىنە چەحيانىڭ ەكىجاقتى دەڭگەيدە جانە ەۋروپا وداعى اياسىندا ىقپال ەتۋگە نيەتتى ەكەنىن جەتكىزدى.
كەلىسسوز قورىتىندىسى بويىنشا تاراپتار جوعارى دەڭگەيدە قول جەتكىزىلگەن ۋاعدالاستىقتاردى ناقتى ىسكە اسىرۋ ءۇشىن جوبالار ءتىزىمىن ازىرلەيدى.
اندرەي بابيش قاسىم-جومارت توقاەۆتى وزىنە ىڭعايلى ۋاقىتتا چەحياعا ساپارمەن كەلۋگە شاقىردى. مەملەكەت باسشىسى بۇل ۇسىنىستى ىقىلاسپەن قابىل الدى.