«كازگيدرومەت» ماماندارى 25 ساۋىردە ەلىمىزدىڭ بىرنەشە ءىرى قالاسىندا مەتەورولوگيالىق جاعدايدىڭ قولايسىز بولاتىنىن حابارلادى. اۋادا زياندى زاتتاردىڭ جينالۋىنا بايلانىستى تۇرعىنداردىڭ دەنساۋلىعىنا قاۋىپ ءتونۋى مۇمكىن, دەپ حابارلايدى Egemen.kz.
سينوپتيكتەردىڭ بولجامىنشا, قولايسىز مەتەورولوگيالىق جاعدايلار كەلەسى قالالاردا كۇتىلەدى:
الماتى, وسكەمەن, سەمەي, ريددەر جانە بالقاش. قاراعاندى مەن تەمىرتاۋدا جاعداي اسىرەسە تۇندە كۇردەلەنە تۇسپەك.مۇنداي جاعداي – جەل, تۇمان نەمەسە تەمپەراتۋرالىق ينۆەرسيا كەزىندە تۋىندايدى. بۇل ۋاقىتتا ءوندىرىس ورىندارى مەن كولىكتەردەن شىققان زياندى زاتتار اۋاعا تاراپ كەتپەي, جەر بەتىنە جاقىن قاباتتا جينالىپ قالادى.
اۋانىڭ لاستانۋى, اسىرەسە, تىنىس الۋ جولدارى, جۇرەك-قان تامىرلارى اۋرۋلارى مەن اللەرگياسى بار جاندارعا تىكەلەي اسەر ەتەدى. وسىعان بايلانىستى مەتەورولوگتار مىناداي كەڭەستەر بەرەدى:
1. دالادا سەرۋەندەۋ ۋاقىتىن شەكتەۋ;
2. اشىق اۋادا فيزيكالىق جاتتىعۋلار جاساماۋ;
3. اۆتوماگيسترالدار مەن وندىرىستىك نىسانداردان الىس ءجۇرۋ;
4. سوزىلمالى اۋرۋى بار ادامدارعا قاجەتتى ءدارى-دارمەگىن جانىندا ۇستاۋ.
ەسكە سالا كەتەيىك, بۇگىن ەلىمىزدىڭ وڭتۇستىك وڭىرلەرىندە اپتاپ ىستىق كۇتىلسە, سولتۇستىك پەن باتىس ايماقتاردا جاڭبىر جاۋىپ, نايزاعاي وينايدى.