مالايزيانىڭ پۋترادجايا اكىمشىلىك ورتالىعىندا قازاقستاننىڭ كانديداتۋراسىن بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە ىلگەرىلەتۋ بويىنشا قازاقستان پرەزيدەنتىنىڭ ارنايى وكىلى – سىرتقى ىستەر ءمينيسترىنىڭ ورىنباسارى اسقار مۋسينوۆ مالايزيانىڭ پرەمەر-ءمينيسترى نادجيب تۋن ابدۋل رازاكپەن كەزدەستى.
كەزدەسۋ بارىسىندا 2014 جىلى 22-24 مامىرداعى مالايزيا پرەمەر-ءمينيسترىنىڭ قازاقستانعا ساپارىنىڭ قورىتىندىلارى اياسىندا ەكىجاقتى قاتىناستاردىڭ قازىرگى جاعدايى مەن بولاشاق دامۋ مۇمكىندىكتەرى تالقىلاندى. پرەمەر-مينيستر ەكى ەل اراسىنداعى ساياسي ۇنقاتىسۋدىڭ دامۋ قارقىنىن جانە قازاقستاننىڭ تاۋەلسىزدىك جىلدارىنداعى الەۋمەتتىك-ەكونوميكالىق تابىستارىن جوعارى باعالادى. ن.رازاك قازاقستاننىڭ ەكونوميكاسى دامىعان, ساياسي جانە الەۋمەتتىك جۇيەسى تۇراقتى, ەگەمەن مەملەكەت بولىپ قالىپتاسۋىنداعى پرەزيدەنت نۇرسۇلتان نازارباەۆتىڭ ءرولىن ەرەكشە اتاپ ءوتىپ, 26 ساۋىردەگى كەزەكتەن تىس پرەزيدەنتتىك سايلاۋدا مەملەكەت باسشىسىنىڭ ۇلكەن باسىمدىقپەن جەڭىسكە جەتكەنىنە ءتانتى بولعانىن ءبىلدىردى. كەزدەسۋ بارىسىندا 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە قازاقستاننىڭ كانديداتۋراسىن قولداۋ جونىندەگى قازاقستان پرەزيدەنتىنىڭ مالايزيا پرەمەر-مينيسترىنە جولداعان حاتى تابىستالدى. ا. مۋسينوۆ بۇۇ قك تۇراقتى ەمەس مۇشەسى بولىپ سايلانۋ قازاقستاننىڭ سىرتقى ساياساتىنداعى ماڭىزدى باسىمدىقتارىنىڭ ءبىرى بولىپ تابىلاتىنىن جانە قازاقستان الەمدىك تۇراقتىلىق پەن قاۋىپسىزدىككە ءوز ۇلەسىن قوسۋعا مۇددەلى ەكەنىن اتاپ ءوتتى. سونىمەن بىرگە, مالايزيانىڭ بۇۇ قك 2015-2016 جىلدارى تۇراقتى ەمەس مۇشەلىگىندە باستاعان الەمدىك ءتارتىپتى زاڭناماعا ساي نىعايتۋ, بۇۇ بىتىمگەرشىلىك كۇشتەرىن قولداۋ جانە ت.ب. ىستەرىن جالعاستىرۋعا نيەتتى. ا.مۋسينوۆ مالايزيانىڭ «ازىق-ت ۇلىك قاۋىپسىزدىگى جونىندەگى يسلام ۇيىمى» جاڭا حالىقارالىق قۇرىلىمىنا قوسىلاتىنىنا ءۇمىت ارتىپ, اتالعان ۇيىمنىڭ جارعىسىنا يسلام ىنتىماقتاستىق ۇيىمىنا مۇشە 23 مەملەكەتتىڭ قول قويعانىن حابارلادى. ن.رازاك ەلىمىزدىڭ حالىقارالىق ساحناداعى جەتىستىكتەرىن جانە بەلسەندىلىگىن اتاپ ءوتىپ, قازاقستاننىڭ بۇۇ قك تۇراقتى ەمەس مۇشەسى بولۋعا دەگەن نيەتىن جوعارى باعالادى. سول كۇنى قازاقستاندىق دەلەگاتسيا مالايزيانىڭ سىرتقى ىستەر مينيسترلىگىنىڭ باسشىلىعىمەن دە كەلىسسوزدەر جۇرگىزدى.
«ەگەمەن-اقپارات».