پرەزيدەنت عالىمداردى ماراپاتتاۋ راسىمىندە سويلەگەن سوزىندە قولدانبالى عىلىمدى دامىتۋ باعىتىنداعى جوبالاردىڭ سانى كوبەيىپ كەلە جاتقانى وتە جاقسى ءۇردىس ەكەنىن ايتتى. اسىرەسە, ۋنيۆەرسيتەتتەردىڭ تەحنولوگيالىق دامۋ ورتالىعى رەتىندە قالىپتاسىپ جاتقانىن ايرىقشا اتاپ ءوتتى, دەپ جازادى Egemen.kz.
قاسىم-جومارت توقاەۆ دەگەنمەن عىلىم سالاسىندا شەشىلمەگەن تۇيتكىلدەر دە از ەمەس ەكەنىنە توقتالدى.
«مىسالى, بىلتىر University Medical Center مەكەمەسىنە قاراستى جۇرەك ورتالىعىنىڭ دارىگەرلەرى ALEM (Astana Life Ex-situ Machine) دەپ اتالاتىن يننوۆاتسيالىق مەديتسينالىق قۇرىلعى ويلاپ تاپتى. مۇنى وتكەن جىلدىڭ ەڭ ايتۋلى عىلىمي جاڭالىعى دەپ ايتۋعا بولادى. وسى قۇرىلعى دونورلىق اعزالاردىڭ ومىرشەڭدىگىن 24 ساعاتتان استام ۋاقىت ساقتاۋعا مۇمكىندىك بەرەدى. مۇنداي بىرەگەي جاڭالىقتار قازاق عىلىمىنىڭ الەۋەتى, جالپى ەلىمىزدىڭ دامۋ دەڭگەيى جوعارى ەكەنىن كورسەتەدى. مەن ناۋرىز ايىندا ءال-فارابي اتىنداعى قازاق ۇلتتىق ۋنيۆەرسيتەتىندە بولعانىمدى بىلەسىزدەر. سول جەردە عالىمدارمەن ارنايى كەزدەسىپ, ءبىراز ماسەلەگە توقتالدىم. اسىرەسە, عىلىمدى قارجىلاندىرۋ جۇمىسىن رەتكە كەلتىرىپ, قاتاڭ باقىلاۋعا الۋ قاجەتتىگى تۋرالى ايتتىم. باستى ماقسات قارجىنى يگەرۋ ەمەس, قوعامعا پايداسى تيەتىن جوبالاردى جۇزەگە اسىرۋ بولۋعا ءتيىس», دەدى پرەزيدەنت.
مەملەكەت باسشىسى سونىمەن قاتار ينجەنەرلىك-تەحنيكالىق كادرلاردى دايارلاۋ, عىلىم قالاشىقتارىن دامىتۋ ماسەلەلەرىنە نازار اۋداردى.
پرەزيدەنت: ادامزاتتىڭ بارلىق جەتىستىگى – عالىمداردىڭ زياتكەرلىك ەڭبەگىنىڭ جەمىسى
«بىلىكتى ينجەنەرلىك-تەحنيكالىق كادرلاردى دايارلاۋعا باسا نازار اۋدارعان ءجون. بۇل رەتتە نەگىزگى جاۋاپكەرشىلىك جوعارى وقۋ ورىندارىنا جۇكتەلەدى. ۇلتتىڭ زياتكەرلىك قۋاتى ءدال وسى ءبىلىم وردالارىندا قالىپتاسادى. ۋنيۆەرسيتەتتەر ءوز ميسسياسىن ادال اتقارسا, بىلىكتى ماماندار مەن كاسىبي كادرلاردىڭ قاتارى ارتا تۇسەرى ءسوزسىز. بۇدان بولەك, عىلىم قالاشىقتارىنا جانە قارقىندى داميتىن قالالارعا جاڭا تەحنولوگيا ەنگىزۋدى جولعا قويۋىمىز كەرەك. قازىر كۋرچاتوۆ قالاسىنا عىلىم قالاشىعى مارتەبەسىن بەرۋ ءۇشىن ناقتى جۇمىس جۇرگىزىلىپ جاتىر. ينۆەستورلاردى وسىنداي دامۋ ورتالىقتارىنا قارجى سالۋعا ىنتالاندىرۋ قاجەت. بۇل دا – ۇكىمەتتىڭ وزەكتى مىندەتتەرىنىڭ ءبىرى. توقەتەرىن ايتساق, الدا اتقاراتىن شارۋا كوپ. شيراق قيمىلداپ, تياناقتى جۇمىس ىستەۋىمىز كەرەك. عىلىم سالاسىنداعى كۇردەلى ماسەلەلەردى مەملەكەت پەن عىلىمي قاۋىمداستىق كۇش جۇمىلدىرىپ, بىرلەسە شەشەدى دەپ ويلايمىن», دەدى ول.
قاسىم-جومارت توقاەۆ: عىلىم ەكونوميكا مەن قوعامنىڭ سۇرانىسىنا ساي بولۋعا ءتيىس