اقتوبە وبلىسىنىڭ اكىمى اسحات شاحاروۆ توتەنشە جاعدايعا بايلانىستى جەدەل شتابتىڭ شۇعىل وتىرىسىن وتكىزدى. جيىندا وبلىس اكىمدىگى عيماراتىنىڭ شاتىرىندا بولعان ورتكە قاتىستى احۋال جان-جاقتى قارالدى, دەپ جازادى Egemen.kz.
كەڭەس بارىسىندا توتەنشە جاعدايلار دەپارتامەنتى, پوليتسيا دەپارتامەنتى جانە وزگە دە جاۋاپتى باسقارمالار باسشىلارى قازىرگى جاعداي جونىندە بايانداما جاسادى. قابىلدانعان شارالاردىڭ ناتيجەسىندە اكىمدىك عيماراتى تولىقتاي ەلەكتر جەلىسىنەن اجىراتىلعان.
ءوڭىر باسشىسى جاعدايدىڭ ماڭىزىن اتاپ ءوتىپ, مەملەكەتتىك ورگاننىڭ قىزمەتى توقتاپ قالماۋى ءتيىس ەكەنىن جەتكىزدى.
«اكىمدىك – جاي عانا عيمارات ەمەس, بۇل ءوڭىردىڭ تۇتاستاي باسقارۋ جۇيەسىن جۇزەگە اسىراتىن نىسان. مۇندا ءاربىر تۇرعىننىڭ ومىرىنە اسەر ەتەتىن ماڭىزدى شەشىمدەر قابىلدانادى. بۇگىن ءبىز توتەنشە جاعدايمەن بەتپە-بەت كەلدىك, الايدا ەڭ باستىسى – قىزمەتكەرلەردىڭ قاۋىپسىزدىگى ءبىزدىڭ باستى نازارىمىزدا تۇر. بارلىق قىزمەت ۇيلەسىمدى جۇمىس جۇرگىزىپ جاتىر. ءبىز اكىمدىك جۇمىسىنىڭ قىسقا مەرزىمدە قالپىنا كەلۋىن قامتاماسىز ەتىپ, جاعدايدى جويۋ بارىسى تۋرالى تۇرعىندارعا تولىق اقپارات بەرەمىز», دەدى اسحات شاحاروۆ.
اقتوبەدە وبلىس اكىمدىگى عيماراتىندا ءورت شىقتى
جيىن قورىتىندىسىندا وبلىس اكىمى بىرقاتار ناقتى تاپسىرما بەردى. اتاپ ايتقاندا, اكىمدىك اۋماعىنداعى قاۋىپسىزدىك شارالارىن كۇشەيتۋ, ءورتتىڭ سالدارى تولىق جويىلعانعا دەيىن جەدەل قىزمەتتەردىڭ تاۋلىك بويى كەزەكشىلىگىن ۇيىمداستىرۋ, سونداي-اق ءورتتىڭ شىعۋ سەبەبىن انىقتاۋ ءۇشىن جان-جاقتى تەكسەرۋ جۇرگىزۋ مىندەتتەلدى.
قازىرگى تاڭدا جاعداي باقىلاۋعا الىنعان. ءتيىستى قىزمەتتەر ءورتتىڭ سالدارىن جويۋ جانە ونىڭ سەبەپتەرىن انىقتاۋ باعىتىندا كەشەندى جۇمىس جۇرگىزىپ جاتىر.
شىمكەنتتە اكىمدىك عيماراتى ورتەندى