ەڭبەك داڭقى الاسارمايدى

1992 جىلى «ناقحان» شارۋا قوجالىعىن قۇردى. اداي جىل­قىسىن وسىرۋمەن تىڭعىلىقتى اينالىسىپ, بيە بايلاپ, قىمىز دايىنداپ, قىمىزدى قۇتىعا قۇيۋ تسەحىن اشتى. بۇگىندە شارۋاشى­لىعىنداعى جىلقى باسى 400-گە تاياپ قالعان. جۇمىس بارىسىن­دا قارجىعا, تەحنيكا, ەڭبەك كۇشى­نە قاتىستى كەزدەسكەن قيلى قيىن­دىقتى ەڭسەرە بىلگەن قاي­سار ازامات پەرزەنتتەرىمەن, كومەك­شىلەرىمەن بىرگە ساي-وتەس اۋىلى ماڭىنداعى قاراتورتكۇل جايلاۋىندا كاسىبىن دوڭگەلەتىپ وتىر.

«ايتا كەتكەن ءجون, اداي تۇقىم­دى جىلقى ەشقاشان قولدان ازىق­تانبايدى. دالا توسىندە ەر­كىن جايى­لىپ ءوسۋى سەبەپتى, ەتى دە, ءسۇتى دە قۇنارلى. جىلقى ساۋ, ساۋ­مال, قى­مىز دايىنداۋ تاسىل­دەرى تۋرالى مامانداردىڭ ەڭبەك­تەرىن وقىپ, ىزدەنە ءجۇرىپ, ساۋمال, قىمىز دا­يىنداۋدى قولعا الدىق. قىمىزدى بوتەلكەلەرگە قۇيىپ, ارنايى شتريح كود جاپسىرىپ, قالا ماڭىنداعى بىرقاتار دۇكەن­گە وتكىزەمىز. بۇرىن 5–6 مىڭ ليتر­گە دەيىن وندىرسەك, قازىر قاجەتتى­لىككە قاراي 2–3 مىڭ ليتر عانا دايىنداپ وتىرمىز», دەيدى م.قويشىباەۆ.

كاسىپكەردىڭ كوپ جىلعى ەرەن ەڭبەگى ەلەۋسىز قالعان جوق. 2017 جىلى III دارەجەلى «ەڭبەك داڭ­قى» وردەنىمەن, سونداي-اق مەم­­لەكەت باسشىسىنىڭ العىس­حا­تىمەن, اۋىل شارۋاشى­لى­عى مينيسترلىگىنىڭ «اۋىل شا­رۋا­­شى­لىق سالاسىنىڭ ۇزدىگى» بەلگى­سىمەن, ماڭعىستاۋ اۋدانىنىڭ «جىلدىق ۇزدىك فەر­مەرى» اتاعى­مەن, بىرنەشە مەرەكە­لىك توسبەلگى­لەرمەن, وبلىس, اۋدان اكىمدەرىنىڭ العىسحاتتارىمەن ماراپاتتالدى. بىلتىر جىلدىڭ اياعىندا وسى ماراپاتتار جۇلگەسى جالعاسىن تاۋىپ, استانادان پرە­زيدەنت ق.توقاەۆتىڭ قولىنان II دارەجەلى «ەڭبەك داڭقى» وردەنىن كەۋدەسىنە تاعىپ ورالدى.

وتباسىندا التى قىز, ءبىر ۇل ءوسىرىپ, ولاردان نەمەرە, جيەن ءسۇيىپ وتىرعان ارداقتى اكە, اتپال ازامات­تىڭ شارۋاشىلىعىن ودان ءارى وركەندەتۋدەن باسقا ماقساتى جوق.

«ەڭبەگىمدى ەلەپ, ءار كەز ماراپاتتان تىس قالدىرماي, وبلىستىق, رەسپۋبليكالىق دەڭگەيدەگى مەم­لە­كەتتىك, مەرەكەلىك ءتۇرلى سىي-سيا­پاتپەن اتاپ ءوتىپ جاتاتىن ءىس باسىنداعى ازاماتتارعا العى­سىم شەكسىز. ەڭبەكتى, كاسىپتى مارا­پاتقا بولا جاسامايسىڭ, ايتسە دە ەڭبەكتىڭ ەلەنگەنى قاناتتان­دىرادى», دەيدى ول.

ماڭعىستاۋ وبلىسى