پرەزيدەنت ارحيۆىندە «قازاقستان رەسپۋبليكاسىنىڭ مەملەكەتتىك بيلىك ورگاندارى» اتتى انىقتامالىق جارىق كوردى. ءۇش جىلدان اسا ۋاقىت بويى دايىندالعان ەڭبەكتە ەلدىڭ تاۋەلسىزدىك جىلدارىنان باستاپ بۇگىنگى ينستيتۋتسيونالدىق رەفورمالارعا دەيىنگى مەملەكەتتىك باسقارۋ قۇرىلىمىنىڭ ەۆوليۋتسياسى قامتىلعان.
قۇجاتتىق حرونيكا 800 بەتتەن, ءۇش تاراۋدان تۇرادى. پرەزيدەنت ءارحيۆىنىڭ ديرەكتورى ءاليا مۇستافينا باسىلىم ارحيۆشىلەر مەن عالىمداردىڭ بىرنەشە جىلدىق ەڭبەگىنىڭ ناتيجەسى ەكەنىن اتاپ ءوتتى.
«قۇجاتتىق تۇرعىدان تەكسەرىلگەن, شىنايى اقپارات كوزى بولا الاتىن انىقتامالىق باسىلىمدى دايىنداۋ جۇمىسى بىرنەشە جىلعا سوزىلدى. مۇندا تەك 1991 جىلدان بەرگى مەملەكەتتىك مەكەمەلەردىڭ تاريحى عانا ەمەس, سونىمەن قاتار مەملەكەتتىك باسقارۋ ينستيتۋتتارىنىڭ ەۆوليۋتسياسى, ساياسي شەشىمدەر قابىلداۋ تەتىگى مەن الگوريتمىنىڭ كورىنىسى بەرىلگەن. باسىلىمنىڭ ەلدە بالاماسى ءالى جوق دەپ نىق سەنىممەن ايتا الامىن. بۇل – پرەزيدەنت ارحيۆىندە قىزمەت ەتەتىن ءارحيۆشى-پراكتيكتەر مەن عالىمداردىڭ شىعارماشىلىق وداعىنىڭ, ءتۇرلى مەملەكەتتىك ورگان وكىلدەرىنىڭ ەڭبەگىنىڭ ناتيجەسى», دەدى ءا.مۇستافينا.
انىقتامالىق – پرەزيدەنت ءارحيۆى دايىنداعان سەريانىڭ ءتورتىنشى باسىلىمى. بۇعان دەيىن 2004, 2007, 2012 جىلدارى ءۇش نۇسقاسى جارىق كوردى. جاڭا باسىلىم بارلىق الدىڭعى بۋىنداردى بىرىكتىرىپ, 1991–2024 جىلدار ارالىعىنداعى كەزەڭدى قامتيدى.
«باسىلىمنىڭ ەرەكشە قۇندىلىعى – پرەزيدەنت ءارحيۆىنىڭ قورلارى. مەملەكەتتىك ورگانداردىڭ قۇرىلۋى, قىزمەتى, قۇرىلىمى, وكىلەتتىكتەرى, سونداي-اق قايتا ۇيىمداستىرىلۋى نەمەسە جويىلۋى تۋرالى قىسقاشا, بىراق تاريحي دەرەگى ناقتى, ۆەدومستۆولاردىڭ باعىنىستىلىعى مەن ىشكى قۇرىلىمىنداعى وزگەرىستەرى تولىق بەرىلدى. مۇنداي جيناقتى كوپشىلىككە جۇيەلى تۇردە ۇلكەن تيراجبەن قازاق, ورىس تىلىندە ءبىرىنشى رەت جيناپ وتىرمىز», دەدى پرەزيدەنت ءارحيۆى ديرەكتورىنىڭ ورىنباسارى قايرات الىمعازينوۆ.
كىتاپ تانىستىرىلىمىنا مەملەكەتتىك ورگاندار مەن عىلىمي قاۋىمداستىق وكىلدەرى قاتىستى. سونىڭ ىشىندە ءماجىلىس دەپۋتاتى ەركىن ءابىل, مەملەكەتتىك قىزمەت ىستەرى اگەنتتىگى توراعاسىنىڭ ورىنباسارى الىبەك احمەديار, پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى ازامات جولمانوۆ بار. ولار باسىلىمعا جوعارى باعا بەردى.
ساياسي عىلىمدار دوكتورى, پروفەسسور جومارت سيمتيكوۆ انىقتامالىقتىڭ اتقارۋشى بيلىك ورگاندارى تاريحىنا عىلىمي باعىتتالعان ناۆيگاتور ءرولىن اتقاراتىنىن ايتتى.
«بۇل جيناق عىلىمي مانگە يە, سەبەبى ول مەملەكەتتىك باسقارۋ تاريحىنا قاتىستى جۇيەلەنگەن قۇجاتتار ءماسسيۆىن عىلىمي اينالىمعا ەنگىزەدى, اكىمشىلىك رەفورمالاردىڭ تاريحىن زەرتتەۋدى دامىتادى, ساياسي تاريح, قۇقىقتانۋ, ارحيۆتانۋ سالاسىندا ەمپيريكالىق بازا بولا الادى,» دەدى ساراپشى.
بىلتىر پرەزيدەنت ءارحيۆى التى قۇجات جيناعىن, «جاڭا ارحيۆ» جۋرنالىنىڭ ءتورت سانىن وقىرمان نازارىنا ۇسىندى. تاۋەلسىزدىك جىلدارى ارحيۆ ەل تاريحىنداعى ماڭىزدى وقيعالارعا ارنالعان شامامەن 90 قۇجاتتىق باسىلىمدى دايىنداعان. ولاردىڭ قاتارىندا ساياسي قۋعىن-سۇرگىنگە ۇشىراعان ازاماتتاردان باستاپ ەلدىڭ قازىرگى دامۋ كەزەڭىنە دەيىنگى دەرەكتەر بار.