جەتىسۋ وبلىسىندا بالقاش كولى جاعالاۋىنداعى جەر تەلىمدەرى ينۆەستورلارعا اشىق اۋكتسيون ارقىلى ۇسىنىلاتىن بولادى. بۇل باستاما كول جاعالاۋىن دامىتۋعا باعىتتالعان ماڭىزدى قادامداردىڭ ءبىرى رەتىندە قاراستىرىلىپ وتىر, دەپ حابارلايدى Egemen.kz جەتىسۋ وبلىسى اكىمىنىڭ ءباسپاسوز قىزمەتىنە سىلتەمە جاساپ.
بۇعان دەيىن بالقاش كولىنىڭ جاعالاۋىنا قاتىستى باس جوسپار مەن ەگجەي-تەگجەيلى جوسپارلاۋ جوباسى ازىرلەنىپ, سونىڭ نەگىزىندە ايماقتى قاجەتتى ينجەنەرلىك ينفراقۇرىلىممەن قامتاماسىز ەتۋ جۇمىستارى قولعا الىنعان. ناتيجەسىندە تالدىقورعان قالاسىنان بالقاش كولىنە دەيىنگى اۆتوجول تولىقتاي اسفالتتالىپ, سۋ, ەلەكتر جانە كارىز جۇيەلەرى سياقتى نەگىزگى كوممۋنيكاتسيالار تارتىلدى. ەندىگى كەزەكتە جەرگىلىكتى بيلىك زاماناۋي دەمالىس ورىندارىن سالۋ ءۇشىن ينۆەستورلاردى تارتۋعا باسىمدىق بەرىپ وتىر.
بالقاشتا العاش رەت قىسقى بالىق اۋلاۋ فەستيۆالى ءوتتى
سارقان اۋدانىنىڭ اكىمى عالىمجان مامانباەۆتىڭ ايتۋىنشا, 12, 24 جانە 36 سوتىق كولەمىندەگى جەر ۋچاسكەلەرى بارلىق ينۆەستورلارعا اشىق اۋكتسيون ارقىلى ۇسىنىلادى. بۇل فورمات جوبالاردى جىلدام ىسكە اسىرۋعا مۇمكىندىك بەرىپ, شاعىن قوناق ۇيلەردەن باستاپ ءىرى تۋريستىك كەشەندەرگە دەيىن ءارتۇرلى اۋقىمداعى ينۆەستيتسيالىق باستامالاردى جۇزەگە اسىرۋعا جول اشادى. ال 2 گەكتارعا دەيىنگى ءىرى جەر تەلىمدەرى وڭىرلىك ۇيلەستىرۋ كەڭەسىنىڭ شەشىمىمەن بەرىلەدى.
قوسىمشا اقپارات الۋ ءۇشىن سارقان اۋداندىق اكىمدىگىنە جۇگىنۋگە نەمەسە كورسەتىلگەن بايلانىس ورتالىعى ارقىلى حابارلاسۋعا بولادى.
استانا – بالقاش باعىتىندا اۋە رەيسى قايتا اشىلادى
ايتا كەتەيىك, بالقاش كولىندە شومىلۋ ماۋسىمى 1 ماۋسىمنان 1 قىركۇيەككە دەيىن جالعاسادى. بۇل كەزەڭدە ءوڭىر تۋريستەر ءۇشىن قولايلى دەمالىس ورنىنا اينالادى. كول جاعالاۋى جاعاجاي دەمالىسى, سۋ سپورتى جانە بالىق اۋلاۋ سياقتى ءتۇرلى رەكرەاتسيالىق مۇمكىندىكتەرگە باي. قازىرگى تاڭدا ءبىر ماۋسىمدا شامامەن 50 مىڭ تۋريست قابىلدانسا, الداعى ۋاقىتتا بۇل كورسەتكىشتى 500 مىڭ ادامعا دەيىن ارتتىرۋ جوسپارلانىپ وتىر.