ەيفمان قويىلىمى – استانادا

گاسترول شىمىلدىعى «قىزىل جيزەل» بالەتىمەن ءتۇرىلدى. 2025 جىلى جاڭاشا تىنىسپەن قايتا ساحنالانعان تۋىندى – ساحنا ونەرىنىڭ سيمۆولىنا اينالعان ولگا سپەسيۆتسەۆا تاعدىرىنا ارنالعان اسەرلى ارناۋ بولدى. حورەوگراف كەيىپكەر ءومىرىنىڭ قاسىرەتتى بەلەستەرىن – رەۆوليۋتسيا داۋىلى, جات جەردەگى جالعىزدىق, جان كۇيزەلىسى مەن اقىل-سانانىڭ كۇيرەۋىن ءسوزسىز-اق, تەك قيمىلدىڭ قۇدىرەتىمەن سويلەتتى. ءاربىر پلاستيكالىق شەشىم مەن بەينەلى قوزعالىس كورەرمەندى ادام جانىنىڭ ەڭ تەرەڭ قاتپارلارىنا جەتەلەپ, ونەر مەن ءومىردىڭ شەكاراسى جويىلاتىن ساتتەردى ايقىن سەزدىردى.

ال «كۇنانىڭ ار جاعىندا» بالەتى كەشتىڭ رۋحاني شارىقتاۋ شەگىنە اينالدى. فيودور دوستوەۆسكيدىڭ «اعايىندى كارامازوۆتار» رومانى نەگىزىندە قويىلعان بۇل تۋىندى ادام بولمىسىنىڭ ماڭگىلىك قايشىلىقتارىن بەينەلەدى. سەنىم مەن كۇمان, ىزگىلىك پەن ازعىندىق, قۇداي مەن شايتان تارتىسى – بارلىعى دا ساحنا تىلىندە ەرەكشە پلاستيكالىق ورنەكپەن ءورىلدى. ەيفمان كورەرمەندى سىرتقى وقيعادان گورى ىشكى الەمگە ۇڭىلۋگە شاقىرىپ, اركىمدى ءوز جانىنىڭ ايناسىمەن بەتپە-بەت قالدىردى.

بۇل گاسترول تەك سپەكتاكلدەر لەگى عانا ەمەس, ەيفمان تەاترىنىڭ كوپ­جىلدىق شىعارماشىلىق ىزدەنىسىنىڭ ايقىن كورىنىسى بولدى. بۇعان دەيىن دە استانالىقتار «رودەن», «ەۆگەني ونەگين», «اننا كارەنينا», «پيگماليون اسەرى» سىندى قويىلىمدار ارقىلى حورەوگرافتىڭ قايتالانباس قولتاڭباسىنا كۋا بولعان ەدى. سونداي-اق قازاقستان بالەت ونەرىنىڭ جارىق جۇلدىزى, «استانا وپەرانىڭ» جەتەكشى ءسوليسى ايگەرىم بەكەتاەۆا ەيفمان ترۋپپاسىمەن بىرگە الەم ساحنالارىندا ونەر كورسەتىپ, ۇلتتىق ونەردىڭ ابىرويىن اسقاقتاتىپ كەلگەنى بەكزات ونەر جانكۇيەرلەرىنە جاقسى تانىس.

تەاتر ديرەكتورى الەكساندر سوۆوستيانوۆ بۇل گاسترولدىڭ ماڭىزىن اي­رىقشا اتاپ ءوتتى. ونىڭ ايتۋىنشا, پەتەر­بورلىق ۇجىمنىڭ ونەرى بالەتتىڭ تەك ەستەتيكالىق ءلاززات سىيلايتىن جانر عانا ەمەس, ادام جانىنىڭ ەڭ نازىك يىرىمدەرىن اشاتىن تەرەڭ فيلوسوفيالىق قۇبىلىس ەكەنىن تاعى ءبىر مارتە دالەلدەدى.