قوستانايدا وبلىستىق «جاس تۇلپار» وقۋشىلار ايتىسى ءوتتى. استىقتى ءوڭىردىڭ 90 جىلدىعىنا وراي ۇيىمداستىرىلعان ءداستۇرلى جىر دوداسىندا 19 بالا اقىن باق سىناستى.
جىر سايىسىنىڭ شىمىلدىعىن اشىپ بەرگەن وبلىستىق كوركەمونەرپازدار شىعارماشىلىعى ورتالىعىنىڭ باسشىسى ءدامىر قالقاەۆ بيىل 34-مارتە ءوتىپ جاتقان «جاس تۇلپاردىڭ» تاريحىنا شولۋ جاساپ, جاس ۇرپاققا ۇلتىق تاربيە بەرۋدە اتالعان جوبانىڭ ورنى بولەك ەكەنىن تىلگە تيەك ەتتى.
«جاس تۇلپاردان» تۇلەگەن جاستاردىڭ كوبى – بۇگىندە وسى وڭىرگە ورەلى ونەرىمەن, ادال ەڭبەگىمەن تانىلىپ جۇرگەن ازاماتتار. سوناۋ 1992 جىلدان بەرى ۇزىلمەگەن ءداستۇرلى جوبا – ناعىز ونەر مەكتەبى. بۇگىن وسى ايتىستىڭ باسى-قاسىندا ءجۇرىپ, تالاي جاسقا قامقورلىق ەتكەن بەلگىلى اقىن-ساتيريك عۇمار احمەتشين اعامىزدىڭ اتىنا ارنايى سىيلىق تاعايىندالىپ وتىر. ول كىسى «جاس تۇلپاردىڭ» قازىلار القاسىنىڭ تۇراقتى توراعاسى, باتاگوي اقساقالى بولىپ ەدى. بۇگىنگى ايتىسقا ءبىرازدان بەرى رەسپۋبليكا كولەمىندە ونەر كورسەتىپ جۇرگەن, كادىمگىدەي توسەلگەن تاجىريبەلى اقىندارمەن قاتار, ساحناعا ءبىرىنشى رەت شىعايىن دەپ تۇرعان بالعىن ونەرپازدار دا قاتىسىپ وتىر», دەدى ءدامىر قالقاەۆ.
ايتىستىڭ ىرىكتەۋ كەزەڭىندە ءسوز سايىستىرعان 10 جۇپ ءوڭىر تاريحىن, ىبىراي, احمەت, مىرجاقىپ, شوقان سىندى ءبىرتۋار تۇلعالاردى جىرعا قوستى. ءبىرىنشى كەزەڭدە قارا ءۇزىپ شىققان 2 جۇپ شەشۋشى كەزەڭدە باق سىناستى.
«جاس تۇلپاردىڭ» باس جۇلدەسىن ارقالىق قالاسىنىڭ جاس اقىنى نۇريسلام راعات جەڭىپ الدى. نۇريسلام سوعىس ورتىندە قالعان ەلدەردى مىسال ەتە كەلىپ, بىرلىك-ىنتىماق, بەرەكەلى ەڭبەك, بەيبىت ومىرگە جەتەتىن ەشتەڭە جوق ەكەنىن جەتكىزە جىرلادى. كورەرمەن زالىنىڭ ارت جاعىنداعى بىرنەشە قاتاردا ۇلتتىق ۇلان ساربازدارى وتىرعان. جاس اقىننىڭ ۇلاندارعا قاراتا ءسوز ارناپ: «قالدى عوي بەيبىت ءومىر جاي ءتۇس بولىپ, قىرىلىپ اسكەرلەرى تال تۇستە ءولىپ, ال ءبىزدىڭ بەيبىت ەلدىڭ ساربازدارى, جايباراقات زالدا وتىر ايتىس كورىپ», دەگەنى كوپشىلىك كوكەيىندەگى ويدى ءدوپ باسقانداي بولدى.
ءبىرىنشى ورىندى تورعايلىق تاڭجارىق نيازبەك جەڭىپ الدى. وزىنەن 3–4 جاس ۇلكەندىگى بار اقىندارمەن تەڭ ونەر كورسەتە بىلگەن ەڭ جاس اقىن نۇربولات ايبول ۇلى (ارقالىق) ەكىنشى ورىننان كورىندى. ءۇشىنشى ورىن سارىكولدەن كەلگەن نۇريسلام ورالبايدىڭ ەنشىسىنە بۇيىردى. ال قوستانايدىڭ جاس اقىنى ينابات ناعاشىباي ع.احمەتشين اتىنداعى ارنايى سىيلىقتى الدى.
قوستاناي وبلىسى