ورال قالاسىنىڭ تۇرعىنى دينا عابباسوۆا الداۋشىنىڭ قۇربانى بولىپ قالا بەرە مە؟
رەداكتسياعا جولداعان شاعىم حاتىندا ورال قالاسىنىڭ تۇرعىنى دينا عابباسوۆا ءوزىن الداۋشىنىڭ قۇربانى بولىپ وتىرعانىن اشىنا جازىپتى. ماسەلەنىڭ ءمانىسى مىنادا دەۋگە بولادى. ول 2013 جىلدىڭ باسىندا وبلىس ورتالىعىنداعى «ارجان» لومباردىنا قىزمەتكە ورنالاسقان. لومبارد تۇرعىنداردىڭ التىن بۇيىمدارىن كەپىلدىككە قويىپ, ودان ۋاقىتشا اقشا الا تۇراتىن ورىن ەكەنى بەلگىلى. وسى ارالىقتا ول ءوزىنىڭ ايتۋىنشا لومبارد يەلەرى تاراپىنان ەشقانداي ەسكەرتۋ الماعان. وزىنە تاپسىرىلعان ءىستى ادال اتقارعان.
ارينە, ادام التىنىن لومباردقا جەتىسكەننەن تاپسىرمايدى عوي. بۇل قادامعا قارجىدان قيىندىق كورگەن سوڭ باسقا ىستەيتىن امالىنىڭ جوقتىعىنان بارادى. وسى تاپشىلىق تاپسىرىلعان التىندى بەلگىلەنگەن كۇن جەتكەن سوڭ دا اقشاسىن تولەپ الۋعا اسەرىن تيگىزەتىنى دە بار. وسىنداي كەزدە دينا عابباسوۆاعا گۇلميرا ناۋرىزوۆا ەسىمدى كليەنت كەزدەسە كەتەدى دە ودان سىر تارتقانداي بولادى. ويى مەن كوڭىلىندە ەشقانداي بوتەن وي جوق جاس قىز بولعان جاعدايدى جاسىرماي ايتىپ سالادى. ەندەشە, مەن سول التىن بۇيىمداردى ساتىپ اقشاسىن ساعان قايتارا الامىن دەپ ديناعا جەلىمدەي جابىسا تۇسەدى. وعان ۋادەنى ءۇيىپ-توگىپ التىننان تۇسكەن اقشانى قايتارىپ بەرەتىن كۇندى ايتادى. يمانى بەتىنە توگىلىپ تۇرعان پەرىشتە قىز وعان سەنىپ قالادى. ءسويتىپ, ونىڭ ايتقانىن ورىندايدى. الايدا, لومبارد قىزمەتكەرى سەنىم بىلدىرگەن ادام نە التىندى, نە اقشانى قايتارماي ۋاقىتتى سوزا بەرەدى. جالعان ءسوز جارعا جىعادى دەگەن وسى دا.
ارينە, بۇل ارادا جانى شىرقىراپ «ەگەمەنگە» جانايقايىن جولداپ وتىرعان دينا عابباسوۆانى دا مۇلدەم اقتاپ الۋ قيىن-اق. ويتكەنى, وعان تۇرعىندار لومباردقا تاپسىرعان التىندى ءوز قالاۋىنشا باسقا بىرەۋگە بەرۋگە قۇقىق بەرىلمەگەنى ايتپاسا دا تۇسىنىكتى شىعار. ونى الداۋشىنىڭ قۇرعان تورىنا قاپيادا ءتۇسىپ قالعان دينانىڭ ءوزى دە مويىنداپ, بارماعىن تىستەپ وتىر. بۇل رەتتە ول گ.ناۋرىزوۆا ءوزىنىڭ ۇيالى تەلەفونىنا جولداعان ۋادە تۇردەگى جازبالارعا عانا ءۇمىت ارتادى. مۇندا لومبارد قىزمەتكەرىن جالعان سوزىنە سەندىرىپ التىندى الىپ كەتكەن ايەل جوعارىدا كورسەتىلگەن ماسەلەنىڭ ءبارىن موينىنا العان ەكەن. وسىلايشا, باسىنا قىلمىستىق ءىس قوزعالۋ جونىندەگى قاۋىپ تونگەن حات يەسى 2014 جىلدىڭ 29 جەلتوقسانى كۇنى ءوزىنىڭ قۇقىن قورعاۋ ءۇشىن باتىس قازاقستان وبلىسىنىڭ ىشكى ىستەر دەپارتامەنتىنىڭ باستىعى ماحامبەت ابيساتوۆتىڭ اتىنا شاعىم حات جازۋعا ءماجبۇر بولادى. وزگەگە ەمەس بۇل ۇنقاتۋ ناق پوليتسيا ورگانى باسشىسىنا نەگە ارنالعان؟
مۇنىڭ ءمانىسىن دينا عابباسوۆا ءوز حاتىندا بىلايشا تۇسىندىرەدى. ونىڭ ايتۋىنشا گۇلميرا ناۋرىزوۆا ىشكى ىستەر ورگانىنىڭ قىزمەتكەرى سامات ناۋرىزوۆتىڭ زايىبى ەكەن. سونىمەن بىرگە, د.سەرىكقىزى وسى اڭگىمە باستالىپ كەتكەننەن كەيىن ول ءوز ايەلىنەن اجىراسقانى جونىندەگى اقپارات تا بار ەكەنىن العا تارتادى. بۇل كورىنىس ماتەريالدىق جاۋاپكەرشىلىكتەن جالتارۋ ءۇشىن سانالى تۇردە جاسالۋى ابدەن مۇمكىن ەكەنىن قوسا جازىپتى.
الايدا, ىشكى ىستەر دەپارتامەنتىنىڭ باستىعى م.ابيساتوۆ تاراپىنان جولدانعان شاعىم حاتقا قاتىستى جاۋاپ كەلمەگەن. بۇدان سوڭ جابىرلەنۋشى ونىڭ اتىنا ەكىنشى رەت حات جازىپ گ.ناۋرىزوۆا وزىنەن العان التىندى 2014 جىلدىڭ ماۋسىم-قىركۇيەك ايلارىندا قالاداعى وزگە لومباردتارعا تاپسىرۋى مۇمكىن ەكەنىن ايتىپ وسى ىسكە تەكسەرۋ جۇرگىزۋدى ءوتىنىپ تاعى دا حات جولدايدى. وعان دا جاۋاپ كەلمەگەن. ابدەن امالى قۇرىعان دينا عابباسوۆا 2015 جىلدىڭ 28 قاڭتارى كۇنى بۇدان سوڭ ورال قالاسىنىڭ پروكۋرورى, ادىلەت كەڭەسشىسى ايدىن راشيدوۆتىڭ اتىنا شاعىم حات تۇسىرەدى. مۇندا ول وزىنەن باسقا تاعى دا ءۇش ادام جوعارىدا اتى-ءجونى اتالعان جالعان ءسوزدى توپان سۋداي قاپتاتىپ, وتىرىكتى شىنداي, شىندى قۇداي ۇرعانداي جاسايتىن جاننىڭ ۇستىنەن شاعىم جازعانىن كەلتىرىپتى. اتى-جوندەرىن دە اتاعان. ءارى ولاردىڭ ءدال وزىنە جاسالعانداي جالعان ءسوز سالدارىنان ءزابىر كورىپ وتىرعانىن جەتكىزىپتى. سوندىقتان دا, ادامداردى الداۋعا بەيىم تۇراتىن ادامنىڭ ءىس-ارەكەتىنە ءتيىستى قۇقىقتىق باعا بەرىلۋىن سۇراعان.
بۇعان قوسارىمىز بىزگە دينا عابباسوۆا ۇسىنعان قىلمىستىق ءىستى قوزعاۋ جانە ءوز وندىرىسىنە الۋ تۋرالى قاۋلىدا ورال قالالىق ىشكى ىستەر ءبولىمى, اباي پوليتسيا بولىمشەسى تەرگەۋ ءبولىمىنىڭ اعا تەرگەۋشىسى, پوليتسيا مايورى گ.بيسەنوۆا 2014 جىلدىڭ ماۋسىم ايىندا بەلگىسىز تۇلعا «ارجان» لومباردىنىڭ قىزمەتكەرى د.عابباسوۆانىڭ سەنىمىنە كىرىپ, بىرنەشە التىن بۇيىمدارىن الىپ كەتىپ, انىقتالماعان سوماعا ماتەريالدىق زيان كەلتىرىپ, وقيعا بولعان جەردەن بوي تاسالاعانىن انىقتاعانى كورسەتىلگەن.
بۇدان سوڭ ونىڭ قاۋلى ەتكەنى قوسا جازىلعان. مۇندا بىلاي دەلىنگەن. ازاماتشا د.عابباسوۆانىڭ ارىزى بويىنشا قر قىلمىستىق كودەكسى 177-بابى, 1-بولىمىمەن قىلمىستىق ءىس قوزعاپ, ونى ءوز وندىرىسىنە الىپ تەرگەۋ جۇرگىزۋگە. قاۋلى كوشىرمەسىن ورال قالاسىنىڭ پروكۋراتۋراسىنا جولداۋعا, قابىلدانعان شەشىم تۋرالى مۇددەلى جاقتارعا حابارلاۋعا. قىلمىستىق ءىستى قوزعاۋ جانە ونى وندىرىسكە الۋ تۋرالى قاۋلى 2014 جىلدىڭ 11 قاراشاسى كۇنى الىنعان.
ءسوز جوق, بۇل قۇجات «ەگەمەنگە» ارنايى حات جولداعان دينا عابباسوۆانىڭ جانايقايى نەگىزسىز ەمەس ەكەنىن تانىتادى.
تەمىر قۇسايىن,
«ەگەمەن قازاقستان».
ورال.