شىمكەنت قالاسىندا وتكەن Digital Qazaqstan 2026 حالىقارالىق تسيفرلىق فورۋمىندا پرەمەر-مينيستر ولجاس بەكتەنوۆ تسيفرلاندىرۋ مەن جاساندى ينتەللەكتتىڭ ەل دامۋىنداعى شەشۋشى ءرولىن اتاپ ءوتتى. «يندۋستريا 5.0: ءوزارا ارەكەتتەسۋدىڭ كۇشى» تاقىرىبىنداعى جيىنعا ەاەو ەلدەرىنىڭ ۇكىمەت باسشىلارى, IT-يندۋستريا وكىلدەرى, حالىقارالىق كومپانيالار مەن ينۆەستورلار قاتىسىپ, 3 مىڭنان استام دەلەگات باس قوستى, دەپ جازادى Egemen.kz.
فورۋمنىڭ پلەنارلىق وتىرىسىندا ۇكىمەت باسشىسى جاساندى ينتەللەكتىنى دامىتۋدىڭ نەگىزگى باعىتتارىن ايقىنداپ بەردى. ونىڭ ىشىندە ينستيتۋتسيونالدىق نەگىز قالىپتاستىرۋ, تسيفرلىق ينفراقۇرىلىمدى دامىتۋ جانە ادامي كاپيتالدى نىعايتۋ ماسەلەلەرىنە باسىمدىق بەرىلدى.
«بۇگىندە قازاقستان تسيفرلاندىرۋ مەن جاساندى ينتەللەكت جاڭا ەكونوميكالىق مودەلدىڭ نەگىزىنە اينالاتىن كەزەڭگە قادام باستى. سوندىقتان قازاقستان پرەزيدەنتى قاسىم-جومارت كەمەل ۇلى توقاەۆ 2026 جىلدى تسيفرلاندىرۋ جانە جاساندى ينتەللەكت جىلى دەپ جاريالاپ, بۇل سالانىڭ ەلىمىز ءۇشىن ايرىقشا ماڭىزدىلىعىن اتاپ ءوتتى», دەدى ولجاس بەكتەنوۆ.
شىمكەنتتە ەۋرازيالىق ۇكىمەتارالىق كەڭەستىڭ وتىرىسى ءوتىپ جاتىر
پرەمەر-ءمينيستردىڭ ايتۋىنشا, ەلدە جۇرگىزىلىپ جاتقان ساياسي جاڭعىرۋلار اياسىندا جاڭا كونستيتۋتسيا قابىلدانىپ, وندا العاش رەت تسيفرلىق قۇقىقتار كونستيتۋتسيالىق دەڭگەيدە بەكىتىلدى. بۇل قادام تەك تەحنولوگيالىق دامۋعا سەرپىن بەرىپ قانا قويماي, مەملەكەتتىڭ ۇزاق مەرزىمدى ستراتەگيالىق باسىمدىقتارىن ايقىندايدى.
«تسيفرلىق قۇقىقتاردى ەڭ جوعارى دەڭگەيدە بەكىتۋ ءبىز ءۇشىن تسيفرلىق ترانسفورماتسيا تەك تەحنولوگيالاردى دامىتۋ تۋرالى عانا ەمەس, سونىمەن قاتار ناقتى قۇقىقتىق كەپىلدىكتەر, دەرەكتەردى قورعاۋ جانە سەنىم پرينتسيپتەرى تۋرالى ەكەنىن ايقىندايدى. وسىلايشا, قازاقستان تسيفرلىق تەحنولوگيالار مەن جاساندى ينتەللەكتىنى دامىتۋ ءۇشىن بولجامدى ءارى تۇراقتى قۇقىقتىق ورتا قالىپتاستىرۋدا», دەدى ۇكىمەت باسشىسى.
ولجاس بەكتەنوۆ ەاەو اۋماعىندا جۇك تاسىمالىن رەتتەيتىن جي پلاتفورماسىن قۇرۋدى ۇسىندى