سۋداندا مەديتسينالىق مەكەمەگە جاسالعان سوققى سالدارىنان 64 ادام قازا تاۋىپ, تاعى 89 ادام جاراقات الدى, دەپ حابارلايدى Egemen.kz.
بۇل تۋرالى سەنبى كۇنى دۇنيەجۇزىلىك دەنساۋلىق ساقتاۋ ۇيىمى مالىمدەدى. بۇعان دەيىن بۇۇ-نىڭ سۋدانداعى گۋمانيتارلىق باسقارماسى شىعىس دارفۋرداعى اۋرۋحاناعا جاسالعان شابۋىلعا الاڭداۋشىلىق بىلدىرگەن. الدىن الا مالىمەت بويىنشا, قازا تاپقاندار اراسىندا بالالار دا بار.
سۋداندىق «جەدەل زاڭگەرلەر» قۇقىق قورعاۋ توبىنىڭ حابارلاۋىنشا, ەل-داەين قالاسىنداعى ۋنيۆەرسيتەتتىك اۋرۋحاناعا سوققىنى اسكەري درون جاساعان. الايدا دۇنيەجۇزىلىك دەنساۋلىق ساقتاۋ ۇيىمى شابۋىل فاكتىسىن راستاعانىمەن, وعان كىم جاۋاپتى ەكەنىن ناقتىلامادى. ۇيىم مالىمەتىنشە, شابۋىل سالدارىنان مەديتسينالىق مەكەمە, قىزمەتكەرلەر, ناۋقاستار, ءدارى-دارمەكتەر مەن قويمالار زارداپ شەككەن.
ەل-داەين قالاسى جەدەل ارەكەت ەتۋ كۇشتەرىنىڭ باقىلاۋىندا. قالاعا اسكەر تاراپىنان ءجيى شابۋىل جاسالادى, ولار ەلدىڭ ورتالىق ايماقتارىنان اسكەريلەندىرىلگەن توپتاردى ىعىستىرۋعا تىرىسىپ جاتىر.
سۋداندا ۇشاق اپاتىنان 18 ادام قازا تاپتى
ساراپشىلاردىڭ ايتۋىنشا, سۋدانداعى سوعىستا دروندىق سوققىلار كەڭىنەن قولدانىلىپ كەلەدى. بۇۇ دەرەگىنشە, قاقتىعىس باستالعالى مەديتسينالىق مەكەمەلەرگە جاسالعان شابۋىلداردان 1800-دەن استام ادام, ونىڭ ىشىندە 173 مەديتسينا قىزمەتكەرى قازا تاپقان.
جالپى, سۋدانداعى سوعىس ونداعان مىڭ ادامنىڭ ءومىرىن جالماپ, 11 ميلليوننان استام ادامدى باسپاناسىن تاستاپ كەتۋگە ءماجبۇر ەتتى. بۇۇ باعالاۋىنشا, ەلدە 33 ميلليوننان استام ادام گۋمانيتارلىق كومەككە مۇقتاج.