قىرعىزستان ۇلتتىق قاۋىپسىزدىك مەملەكەتتىك كوميتەتىنىڭ بۇرىنعى توراعاسى قامچىبەك تاشيەۆ ىشكى ىستەر مينيسترلىگىندەگى تەرگەۋدەن كەيىن العاش رەت جۇرت الدىنا شىقتى. الەۋمەتتىك جەلىلەردە تاراعان ۆيدەودا ول ورازا ايت مەرەكەسىمەن قۇتتىقتاپ, ەل-جۇرتتان كەشىرىم سۇرادى, دەپ جازادى Egemen.kz.
بەينەجازبادا تاشيەۆ كوپشىلىكتى مەرەكەمەن قۇتتىقتاپ, ەگەر بىرەۋدىڭ كوڭىلىنە تيگەن بولسا, كەشىرىم وتىنەتىنىن ايتتى.
«ەگەر مەن قاتەلىك جاساپ, بىرەۋدى رەنجىتكەن بولسام, كەشىرىم سۇرايمىن. قاسيەتتى ايدا ءتۇرلى وسەك تاراتىپ, جالا جاپقانداردىڭ بارلىعىن اللا رازىلىعى ءۇشىن كەشىردىم. كەلەسىدە شىندىققا ساي كەلمەيتىن اقپارات تاراتپايدى دەپ ۇمىتتەنەمىن», دەدى ول.
قىرعىزستان پرەزيدەنتى قامشىبەك تاشيەۆتى قىزمەتىنەن بوساتتى
بۇعان دەيىن, 19 ناۋرىز كۇنى قامچىبەك تاشيەۆتىڭ ىشكى ىستەر مينيسترلىگىنە تەرگەۋ-وپەراتيۆتىك ءىس-شارالار اياسىندا كۋاگەر رەتىندە شاقىرىلعانى حابارلانعان ەدى. اڭگىمە ەكى قىلمىستىق ءىس بويىنشا جۇرگىزىلگەن. ول تەرگەۋشىمەن ادۆوكاتىنىڭ قاتىسۋىمەن سويلەسكەن.
قامشىبەك تاشيەۆ: قىزمەتتەن بوساتىلۋ مەن ءۇشىن كۇتپەگەن شەشىم بولدى
ساياساتتانۋشى اركادي دۋبنوۆتىڭ پىكىرىنشە, بۇرىنعى كۇشتىك قۇرىلىم باسشىسىنىڭ توڭىرەگىندەگى وقيعالار جاي عانا كادرلىق وزگەرىس ەمەس.
«بۇل – اقپان ايىندا باستالعان «بەيبىت رەۆوليۋتسيانىڭ» جالعاسى. تاشيەۆكە قاتىستى تەرگەۋ بيلىك ىشىندەگى ىقپالدىڭ بايىپتى, بىراق قاتاڭ قايتا ءبولىنىپ جاتقانىن كورسەتەدى», دەدى ساراپشى.
وسىلايشا, تاشيەۆتىڭ كوپشىلىك الدىنا شىعۋى ەل ىشىندەگى ساياسي ۇدەرىستەردىڭ ءالى دە جالعاسىپ جاتقانىن اڭعارتادى.