باتىس قازاقستاندا قىزىلشا دەرتى ءورشىپ تۇر

وبلىستا قىزىلشا اۋرۋى بويىنشا ەپيدەميولوگيالىق جاعداي تۇراقسىز دەپ سيپاتتالىپ, اۋرۋشاڭدىقتىڭ ءوسۋى بايقالادى. بۇل جونىندە وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى ايناش عۇبايدۋللينا جاريا ەتتى.

«جىل باسىنان بەرى وڭىردە قىزىلشا جۇقپاسى دياگنوزىمەن 169 جاعداي تىركەلدى. ونىڭ 25-ءى – قاڭتاردا, 83-ءى – اقپان ايىندا, ال ناۋرىزدىڭ 1-18 ارالىعىندا تاعى 61 ادام انىقتالىپ وتىر», دەيدى ايناش جۇبانىشقىزى.

سىرقاتتاردىڭ باسىم بولىگى ورال قالاسىندا تىركەلگەن. سونداي-اق بايتەرەك, ءبورلى جانە تەرەكتى اۋداندارىندا دا جاعداي ءماز ەمەس. اۋرۋ جۇقتىرعانداردىڭ باسىم كوپشىلىگى, ياعني 141-ءى – 14 جاسقا تولماعان بالالار. ەڭ الاڭداتارلىق جاعداي – اۋىرعان بالالاردىڭ 91,1 پايىزى ۆاكتسينا الماعان! ونىڭ ىشىندە 41 بالا – ەكپەدەن ءوز ەركىمەن باس تارتقان اتا-انالاردىڭ پەرزەنتتەرى.

بالالاردى قىزىلشادان قالاي قورعاۋ كەرەك؟ دارىگەر كەڭەسىنە نازار اۋدارىڭىز

«ۇلتتىق پروفيلاكتيكالىق ەگۋ كۇنتىزبەسىنە سايكەس قىزىلشاعا قارسى ۆاكتسيناتسيا 1 جانە 6 جاسىندا 2 رەت جۇرگىزىلەدى, بۇل ۆاكتسيناتسيادان كەيىنگى يممۋنيتەتتى قالىپتاستىرۋعا مۇمكىندىك بەرەدى, يممۋنيتەت ۆاكتسيناتسيا العان ءادامدا ومىر بويى بولادى. سوندىقتان بالاڭىز قىزىلشاعا قارسى پروفيلاكتيكالىق ەكپەنى الماعان بولسا, ۆاكتسيناتسيا الۋ كەرەك» دەيدى ماماندار.

بقو سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆتىڭ ايتۋىنشا, قىزىلشانىڭ ەڭ ءتيىمدى ەمى – ۆاكتسينا الۋ. ەلىمىزدە ۇلتتىق پروفيلاكتيكالىق ەكپەلەر كۇنتىزبەسىنە سايكەس ءار ءسابي ەكپەنىڭ ءبىرىنشى دوزاسىن – جاسقا تولعانشا, ەكىنشى مارتە – 6 جاسىندا الۋى ءتيىس. قازىر وڭىردە 6-10 ايلىق بالالارعا قىزىلشاعا قارسى قوسىمشا ەگۋ جۇمىسى ءجۇرىپ جاتىر. بۇگىنگە دەيىن 1 626 بالا ەكپە العان. بىراق ول بارلىق بالانىڭ 49,1 پايىزىن عانا قۇرايدى.

مينيسترلىك: قىزىلشاعا قاتىستى ەپيدەميولوگيالىق احۋال جاقسارماي تۇر

وبلىستىق جۇقپالى اۋرۋلار اۋرۋحاناسىندا قىزىلشامەن اۋىرعان ناۋقاستارعا ارنالعان 60 كەرەۋەت بار. بۇگىندە ول جەردە 34 ناۋقاس قىزىلشادان ەمدەلىپ جاتىر. ونىڭ 28-ءى – بالا, 6-ى – ەرەسەك ادام ەكەن.

باتىس قازاقستان وبلىسى