2026 جىلى الەمدىك ەكونوميكا كولەمى 219 دوللار ترلن-نان اسادى. بۇل كورسەتكىش ساتىپ الۋ قابىلەتىنىڭ پاريتەتى (PPP) نەگىزىندە ەسەپتەلگەن. ساراپشىلاردىڭ ايتۋىنشا, ءدال وسى ءتاسىل ەلدەردىڭ ناقتى ەكونوميكالىق قۋاتىن سالىستىرۋعا مۇمكىندىك بەرەدى. جاھاندىق ەكونوميكانىڭ شامامەن 49%-ى ازياعا تيەسىلى, بۇل قۇرلىقتىڭ حالىقارالىق ساۋدا مەن وندىرىستەگى ءرولىن ايقىنداي تۇسەدى, دەپ حابارلايدى Egemen.kz.
PPP – ەلدەر اراسىنداعى ءومىر ءسۇرۋ قۇنىنىڭ ايىرماشىلىعىن ەسكەرىپ, ەكونوميكالىق كورسەتكىشتەردى تۇزەتەتىن ءادىس. سوندىقتان نومينالدى ءىجو-مەن سالىستىرعاندا, بۇل ءتاسىل بويىنشا ەلدەردىڭ رەيتينگى ايتارلىقتاي وزگەرەدى.
حالىقارالىق ۆاليۋتا قورىنىڭ بولجامىنا سايكەس, 2026 جىلى الەمدەگى ەڭ ءىرى ەكونوميكا – قىتاي. ونىڭ ءىجو-ءنىڭ كولەمى 43,5 ترلن دوللارعا جەتەدى. ال اقش ەكونوميكاسى 31,8 ترلن دوللار دەڭگەيىندە قالىپ, ەكىنشى ورىندا تۇر. ءۇشىنشى ورىندى 19,1 ترلن دوللار كورسەتكىشپەن ءۇندىستان يەلەنەدى.
العاشقى وندىققا سونداي-اق رەسەي, جاپونيا, گەرمانيا, يندونەزيا, برازيليا, فرانتسيا جانە ۇلىبريتانيا كىرەدى. رەسەي ەكونوميكاسى 7,3 ترلن دوللارعا جەتىپ, الەمدە ءتورتىنشى ورىنعا كوتەرىلەدى.
ازيا ەلدەرىنىڭ باسىمدىعى ايقىن بايقالادى. قىتاي, ءۇندىستان, جاپونيا, يندونەزيا جانە وڭتۇستىك كورەيا سياقتى مەملەكەتتەر ارزان ءومىر ءسۇرۋ قۇنىنىڭ ارقاسىندا PPP كورسەتكىشى بويىنشا ايتارلىقتاي جوعارى ناتيجەگە يە. بۇل ەلدەردە تاۋار ءوندىرۋ مەن قىزمەت كورسەتۋ شىعىندارى تومەن بولعاندىقتان, ولاردىڭ ەكونوميكالىق الەۋەتى كۇشەيە تۇسەدى.
الەمدىك ەكونوميكانىڭ جاڭا كارتاسى: قازاقستان قاي ورىندا؟
سونىمەن قاتار ازيا حالقىنىڭ سانى 4,7 ملرد ادامعا جەتىپ, الەمدەگى ەڭ ءىرى نارىققا اينالىپ وتىر. ساراپشىلار ۆەتنام مەن تايلاند سەكىلدى دامۋشى ەكونوميكالار الداعى جىلدارى دا قارقىندى ءوسىم كورسەتەدى دەپ بولجايدى. بۇل ءۇردىس ازيانىڭ جاھاندىق ەكونوميكاداعى ۇستەمدىگىن ودان ءارى نىعايتا تۇسەدى.
ەۋروپادا جاعداي وزگەشە. نومينالدى كورسەتكىش بويىنشا گەرمانيا كوش باستاپ تۇرسا, PPP ەسەبىندە رەسەي العا شىعىپ, قۇرلىقتاعى ەڭ ءىرى ەكونوميكاعا اينالادى. فرانتسيا دا ۇلىبريتانيانى باسىپ وزادى. دەگەنمەن, جالپى العاندا, ەۋروپا ەلدەرى ازياداعى باسەكەلەستەرىنەن قالىپ كەلەدى. سەبەبى ءوندىرىس پەن قىزمەت كورسەتۋ قۇنى بۇل وڭىردە جوعارى.
امەريكا قۇرلىعىندا دا وزگەرىستەر بار. برازيليا (5,2 ترلن دوللار) مەن مەكسيكا (3,6 ترلن دوللار) كانادادان وزىپ, ايماقتاعى ءىرى ەكونوميكالار قاتارىنا كىرەدى. ال افريكادا الەمدىك ءىجو-ءنىڭ نەبارى 6%-ى عانا شوعىرلانعان. بۇل وڭىردە ەگيپەت, نيگەريا جانە وڭتۇستىك افريكا ەلدەرى نەگىزگى ەكونوميكالىق كۇش سانالادى.
جالپى العاندا, PPP كورسەتكىشى جاھاندىق ەكونوميكانىڭ جاڭا قۇرىلىمىن ايقىن كورسەتەدى. دامۋشى ەلدەر مەن ازيا مەملەكەتتەرى العا شىعىپ, الەمدىك ەكونوميكالىق تەپە-تەڭدىك بىرتىندەپ وزگەرىپ كەلەدى.
قارا التىن مەن قۇبىلمالى نارىق: الەمدىك ەكونوميكا قاي باعىتقا بەت الدى؟