سولتۇستىك قازاقستان وبلىسىنىڭ تايىنشا اۋدانىندا ءبىر ينۆەستور سەگىز اي بويى قوي باسىن 1 مىڭعا دەيىن ارتتىرۋدى كوزدەگەن ينۆەستيتسيالىق جوباسىن ىسكە اسىرا الماعان. كاسىپكەردىڭ جۇمىسىنا كەدەرگى كەلتىرىپ, زاڭسىز ارەكەتكە بارعان مەملەكەتتىك ورگاننىڭ ءىسى پروكۋراتۋرانىڭ ارالاسۋىمەن اشكەرەلەندى.
انىقتالعانداي, ۆەتەرينارلىق باقىلاۋ جانە قاداعالاۋ كوميتەتىنىڭ جەرگىلىكتى ينسپەكتسياسى ءتيىستى قورىتىندىنى بەرۋدەن نەگىزسىز باس تارتقان. ۆەدومستۆو وكىلدەرى قوي شارۋاشىلىعى ىرگەلەس جاتقان تاپشىل اۋىلى تۇرعىندارىنىڭ مۇددەسىنە قايشى كەلەدى جانە سانيتارلىق-قورعاۋ ايماعىنا كىرىپ كەتەدى دەگەندى سىلتاۋ ەتكەن. ءتيىستى قۇجاتتىڭ بەرىلمەۋى سالدارىنان ينۆەستور ەسەپتىك ءنومىر الا الماي, جوبانى ىسكە قوسۋ مۇمكىندىگىنەن ايىرىلعان.
تاپشىل اۋىلى قازىرگى تاڭدا تاراۋ الدىندا تۇرعان ەلدى مەكەن ساناتىنا جاتادى. مۇندا نەبارى بەس تۇرعىن عانا قالعان. اۋدان ورتالىعىنان 35 شاقىرىم قاشىقتا ورنالاسقان اۋىل تۇرمىسقا قولايلى بولعانىمەن, جەرگىلىكتى حالىق ناپاقا ىزدەپ, وزگە وڭىرلەرگە قونىس اۋدارعان. وسى ورايدا, بوس قالعان اۋىلدى سىلتاۋراتىپ, اۋدان ەكونوميكاسىنا سەرپىن بەرمەك بولعان ينۆەستوردىڭ جولىن بوگەگەن مەملەكەتتىك ورگاننىڭ بۇل ارەكەتى كۇمان تۋدىرادى.
بىلتىر جەلتوقسان ايىندا باس پروكۋراتۋرا جانىنان ينۆەستورلاردى قولداۋ جونىندەگى فرونت-وفيس قۇرىلدى. قازىرگى تاڭدا جالپىۇلتتىق پۋلدا قۇنى 894 ملرد تەڭگەنى قۇرايتىن 51 ينۆەستيتسيالىق جوبا بار كورىنەدى. اتالعان جوبالاردىڭ جۇزەگە اسۋىنا جەرگىلىكتى جەرلەردەگى كەيبىر مەملەكەتتىك ورگاندار تاراپىنان جاسالعان زاڭسىز كەدەرگىلەردى جويۋ ماقساتىندا پروكۋراتۋرا ورگاندارىنىڭ تىكەلەي ارالاسۋىنا تۋرا كەلگەن. سولتۇستىك قازاقستان وبلىسىنىڭ پروكۋراتۋراسىندا دا ينۆەستورلاردىڭ قۇقىن قورعاۋ توبى قۇرىلىپ, قازىر جۇمىس ىستەپ جاتىر. وتكەن جىلدىڭ اياعىندا عانا اتالعان توپ 30 پروبلەمالىق جوبانىڭ ىسكە اسۋىنا سەپتىگىن تيگىزدى. ماسەلەلەردىڭ جەدەل ءارى وڭاي شەشىلۋى كەدەرگىلەردىڭ كوبىنە قولدان جاسالعانىن ايعاقتايدى. جاڭا جىل باستالعالى پروكۋراتۋرانىڭ ارالاسۋىمەن ەكىنشى مارتە ينۆەستيتسيالىق جوبانىڭ كەدەرگىسىز ىسكە اسۋى قامتاماسىز ەتىلدى.
سولتۇستىك قازاقستان وبلىسى پروكۋرورىنىڭ اعا كومەكشىسى قازبەك عالىمجان پروكۋراتۋرا ارالاسقاننان كەيىن ينۆەستورعا ۆەتەرينارلىق-سانيتارلىق قورىتىندى جاسالىپ, ەسەپتىك ءنومىر بەرىلگەنىن جەتكىزدى.
«ەندى ينۆەستور الاڭسىز جۇمىسقا كىرىسە الادى. كەدەرگىنىڭ زاڭسىز ەكەنى انىقتالدى. قازىردىڭ وزىندە ول 25 ملن تەڭگە سۋبسيديا الۋعا تاپسىرىس بەردى», دەدى.
ارينە, ينۆەستوردىڭ قۇقىعى قالپىنا كەلتىرىلگەنى كوڭىل قۋانتادى. الايدا سەگىز اي بويى بيزنەستىڭ ورىستەۋىنە زاڭسىز تۇساۋ بولىپ, جوبانى تەجەگەن مەملەكەتتىك ورگاننىڭ جاۋاپكەرشىلىگى قايدا؟ «جوعالعان تابىس» دەگەنى نەگە ەسەپتەلمەگەن؟ پروكۋراتۋرا ءوز قولىنان كەلمەسە مۇندايدى ەسەپتەپ, مەملەكەتتىك ورگاننان سوت ارقىلى ءوندىرىپ بەرمەي مە؟
پروكۋراتۋرانىڭ ءادىل شەشىم ىزدەپ, ەل يگىلىگى ءۇشىن ەڭبەك ەتپەك بولعان ينۆەستوردى قولداعانى تەك وسىمەن شەكتەلە مە؟ ينۆەستيتسيالىق جوبالارعا ءتۇرلى سىلتاۋمەن, ءتىپتى قاساقانا كەدەرگى كەلتىرگەن مەملەكەتتىك ورگاندار جازاسىز قالا بەرسە, ەلدە «زاڭ مەن ءتارتىپ» قاعيداتىنىڭ ورناۋى ەكىتالاي. پروكۋراتۋرا ءبىر وڭىردەگى ءتۇيىندى تارقاتقانىمەن, وزگە جەردەگى كەلەڭسىزدىكتىڭ ءبارى بىردەي نازارعا ىلىگە بەرمەۋى مۇمكىن. ەگەر زاڭسىزدىققا جول بەرگەندەرگە قاتاڭ شارا قولدانىلسا, مەملەكەتتىك ورگاندار تاراپىنان جاسالاتىن قولدانبالى كەدەرگىلەر دە ازايار ەدى. وسى ورايدا پروكۋراتۋرانىڭ زاڭسىزدىققا قارسى كۇرەسىن ءالى دە بولسا جۇيەلى ەمەس, جارتىكەش سيپاتتا دەپ باعالاۋعا تۋرا كەلەدى.
سولتۇستىك قازاقستان وبلىسى