جەر اياعى كەڭىپ, تىرشىلىك اتاۋلى قايتا جاندانا باستاعان شاقتا قازاق جۇرتى ءبىر-بىرىمەن كورىسىپ, ناۋرىز مەيرامىن تويلايدى. بۇل ايدا سامارقاننىڭ تاسى سياقتى ادامداردىڭ كوڭىل مۇزى ءجىبىپ, وكپە-رەنىشتى ۇمىتادى.
بۇگىندە بۇل ءداستۇر زامانمەن ۇندەسىپ, جاڭا مازمۇنعا يە بولدى. 2024 جىلى مەملەكەت باسشىسى قاسىم-جومارت توقاەۆتىڭ باستاماسىمەن «ناۋرىزناما» ونكۇندىگى ەنگىزىلىپ, ناۋرىز مەرەكەسىن تويلاۋ تۇتاس ءبىر مادەني-رۋحاني باعدارلاماعا اينالدى. 14-23 ناۋرىز ارالىعىن قامتيتىن بۇل كەزەڭ ءار كۇنگە مازمۇن جۇكتەپ, ۇلتتىق قۇندىلىقتاردى جۇيەلى تۇردە دارىپتەۋگە جول اشتى. كورىسۋ, قايىرىمدىلىق, مادەنيەت پەن سالت-ءداستۇر, شاڭىراق, ۇلتتىق كيىم, جاڭارۋ, ۇلتتىق سپورت, ىنتىماق, جىل باسى, تازارۋ كۇندەرى – ارقايسىسى حالقىمىزدىڭ دۇنيەتانىمىن, ءومىر سالتىن, رۋحاني وزەگىن تانىتادى.
وسى ونكۇندىكتىڭ ەرەكشە مانگە يە كۇندەرىنىڭ ءبىرى – ۇلتتىق كيىم كۇنى. بۇل كۇن – اتا-بابا مۇراسىن قايتا جاڭعىرتىپ, ۇلتتىق بولمىستى زاماناۋي ومىرمەن ۇشتاستىراتىن تاعىلىمدى بەلەس. ۇلتتىق كيىم – تەك ساندىك بۇيىم ەمەس, وندا حالىقتىڭ تاريحى, تانىمى, ءتىپتى دۇنيەگە كوزقاراسى قاتپارلانىپ جاتىر. ءار ورنەك, ءار ويۋ – عاسىرلاردان جەتكەن بەلگى, ۇرپاقتان ۇرپاققا جالعاسقان كود.
بۇگىندە سول ۇلتتىق ناقىش جاڭا سيپاتتا كورىنىس تاۋىپ كەلەدى. سونىڭ ايقىن ءبىر مىسالى – ىشكى ىستەر مينيسترلىگىنە قاراستى ۇلتتىق ۇلانداعى اسكەري كيىم مەن تەحنيكاداعى قازاقى ورنەكتەردىڭ ۇيلەسىمدى قولدانىلۋى. مۇندا اسكەري ءتارتىپ پەن ۇلتتىق ءداستۇر بىتە قايناسىپ, ەرەكشە مادەني مازمۇن قالىپتاستىرعان.
ناۋرىزناما ونكۇندىگى اياسىندا 747 سپورتتىق ءىس-شارا وتەدى
مەملەكەتتىك سالتاناتتى راسىمدەردىڭ اجارىن اشاتىن قۇرمەت قاراۋىل روتاسىنىڭ كيىمى – ۇلتتىق ناقىشتىڭ ايقىن كورىنىسى. بۇل روتانىڭ ساربازدارى اسكەري شەرۋلەرگە قاتىسىپ, جوعارى دەڭگەيدەگى رەسمي ءىس-شارالاردا ەل نامىسىن بىلدىرەدى, شەتەلدىك دەلەگاتسيالاردى قارسى الادى. ولاردىڭ ءار قادامى, ءار كەلبەتى – قازاق ەلىنىڭ ايبىنى مەن ايشىعى. ساربازداردىڭ ۇستىندەگى كيىم تەك اسكەري فورمانى ەمەس, تۇتاس ءبىر ۇلتتىڭ ەستەتيكالىق بولمىسىن پاش ەتەدى.
قۇرمەت قاراۋىل روتاسىنىڭ سالتاناتتى كيىمى ۇلتتىق كوركەمدىك ءداستۇر نەگىزىندە ازىرلەنگەن. وندا قازاقتىڭ ويۋ-ورنەك ونەرىندەگى ەڭ تانىمال ءارى تەرەڭ ماعىنالى ەلەمەنتتەردىڭ ءبىرى – «قوشقار ءمۇيىز» كەڭىنەن قولدانىلعان. بۇل ورنەك ەجەلدەن كۇش-قۋاتتىڭ, بەرەكە مەن مولشىلىقتىڭ, ۇرپاق ساباقتاستىعىنىڭ بەلگىسى سانالادى. كيىمنىڭ ءار بولىگىندە كورىنىس تاپقان وسىنداي ەلەمەنتتەر حالىقتىڭ دۇنيەتانىمى مەن مادەني جادىن جاڭعىرتىپ تۇر.
ۇلتتىق ناقىش تەك سالتاناتتى كيىممەن شەكتەلمەيدى. ۇلاندىقتاردىڭ كۇندەلىكتى جانە كەڭسەلىك فورمالارىنداعى پوگونداردىڭ وزىندە قازاقى ورنەكتەردىڭ ءىزى بايقالادى. بۇل – ويۋ-ورنەكتىڭ حالقىمىز ءۇشىن جاي اشەكەي ەمەس, ماعىنالىق جۇك كوتەرەتىن سيمۆول ەكەنىن اڭعارتادى. ورنەك – ءبىر جاعىنان كوركەمدىك بولسا, ەكىنشى جاعىنان – رۋحاني بەلگى, كەيدە ءتىپتى بويتۇمار.
ناۋرىزناما ناقىشى
ناۋرىزناما اياسىندا ۇلتتىق سيپات قىزمەتتىك تەحنيكادان دا كورىنىس تاپتى. ۇلاندىقتار پايدالاناتىن Hyundai Staria اۆتوكولىكتەرى قازاقى ويۋ-ورنەكپەن بەزەندىرىلىپ, زاماناۋي تەحنيكا مەن ءداستۇرلى ناقىش ۇيلەسىم تاپتى. قوعامدىق ءتارتىپتى قامتاماسىز ەتەتىن كولىكتەردىڭ وسىلايشا ۇلتتىق رەڭككە ەنۋى – ەلدىڭ مادەني كودىنىڭ جاڭا قىرىن تانىتادى.
بۇل باستامالاردىڭ بارلىعى ءبىر عانا ماقساتقا سايادى – ۇلتتىق قۇندىلىقتاردى تەك مۇراجايدا ساقتاپ قويماي, كۇندەلىكتى ءومىردىڭ بولشەگىنە اينالدىرۋ. ۇلتتىق ۇلان ساپىنداعى كيىم مەن تەحنيكاداعى ورنەكتەر – سونىڭ جارقىن دالەلى.
ناۋرىزناما: بۇگىن – قايىرىمدىلىق جاسايتىن كۇن
ناۋرىز – جاڭارۋ مەن جاڭعىرۋدىڭ مەرەكەسى. ال ۇلتتىق ناقىش – سول جاڭعىرۋدىڭ وزەگى. كورىسۋدەن باستالعان يگى ءداستۇر ۇلتتىق كيىم كۇنى ارقىلى تەرەڭ ماعىناعا يە بولىپ, ەلدىڭ رۋحىن اسقاقتاتا تۇسەدى. ۇلتتىڭ بولمىسى تەك سوزبەن ەمەس, وسىنداي ناقتى كورىنىستەرمەن ايشىقتالعاندا عانا ومىرشەڭ بولماق.