پرەزيدەنتكە كومپانيا قىزمەتىنىڭ بىلتىرعى ناتيجەلەرى مەن الداعى كەزەڭگە ارنالعان جوسپارى جونىندە مالىمەت بەرىلدى, دەپ جازادى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قاسىم-جومارت توقاەۆقا وتكەن جىلدىڭ قورىتىندىسى بويىنشا حولدينگتىڭ ءوندىرىس كولەمى 25,8 مىڭ توننا ۋراندى قۇراعانى, سونىڭ ىشىندە كومپانيا ۇلەسىنە 13,5 مىڭ توننا تيەسىلى ەكەنى باياندالدى. ساۋدا-ساتتىق كولەمى 11 پايىزعا ءوسىپ, 18,5 مىڭ توننا بولدى.
مەيىرجان يۋسۋپوۆ مەملەكەت باسشىسىنىڭ بۇعان دەيىن بەرگەن تاپسىرمالارىن ورىنداۋ اياسىندا «قازاتومونەركاسىپ» ەلىمىزدىڭ مينەرال-شيكىزات بازاسىن ۇلعايتۋ جانە گەولوگيالىق بارلاۋ جۇمىستارىن جۇيەلى تۇردە جالعاستىرىپ كەلە جاتقانىن اتاپ ءوتتى. جالپى اۋدانى 1 مىڭ شارشى شاقىرىمنان اساتىن التى جاڭا پەرسپەكتيۆالى ۋران ۋچاسكەسىنەن تۇراتىن پورتفەل قالىپتاستى, ال 2030 جىلعا دەيىن گەولوگيالىق بارلاۋ جۇمىستارىنا جوسپارلانعان ينۆەستيتسيالاردىڭ جالپى كولەمى 75-85 ميلليارد تەڭگەنى قۇرايدى.
پرەزيدەنتكە ۋران ءوندىرۋشى وڭىرلەردى الەۋمەتتىك قولداۋ تۋرالى اقپارات ۇسىنىلدى. ماسەلەن, 2025 جىلى كومپانيا وبلىستاردىڭ الەۋمەتتىك-ەكونوميكالىق دامۋىنا 11 ميلليارد تەڭگەدەن اسا, سونىڭ ىشىندە كەلىسىمشارتتىق مىندەتتەمەلەر اياسىندا 6 ميلليارد تەڭگە قاراجات ءبولدى.
2025-2034 جىلدارعا ارنالعان دامۋ ستراتەگياسىنا سايكەس, كومپانيا جاڭا وتكىزۋ نارىقتارىنا قاتىسۋدى كەڭەيتىپ كەلەدى. بىلتىر شۆەيتساريالىق AxpoPower AG, چەحيالىق ČEZ Group جانە جاپوندىق Kansai Electric Power Co., Inc. كومپانيالارىمەن ۋران جەتكىزۋ جونىندە كەلىسىمشارتتار جاسالدى. قازىرگى ۋاقىتتا ۇندىستانعا تابيعي ۋران كونتسەنتراتتارىن جەتكىزۋ بويىنشا ۇزاقمەرزىمدى كەلىسىمشارت جاساۋ جونىندەگى جۇمىستار جالعاسۋدا.
توقاەۆ يزرايل پرەزيدەنتى يتسحاك گەرتسوگپەن تەلەفون ارقىلى سويلەستى
كاسىپورىن عىلىمي زەرتتەۋلەر مەن يننوۆاتسيالار سالاسىنداعى جوبالارعا دا اتسالىسادى. ءوندىرىس تيىمدىلىگىن ارتتىرۋعا, ەكولوگيالىق زياندى ازايتۋعا جانە وزىق تەحنولوگيالاردى ەنگىزۋگە باعىتتالعان 2034 جىلعا دەيىنگى عىلىمي-تەحنولوگيالىق دامۋ ستراتەگياسى ازىرلەندى.
سونداي-اق «قازاتومونەركاسىپتىڭ» جاريا كومپانيا رەتىندەگى جەتىستىكتەرى اتاپ ءوتىلدى. 2018 جىلى IPO-عا شىققان ساتتەن باستاپ كومپانيانىڭ نارىقتىق كاپيتالداندىرىلۋى 7 ەسەدەن اسا ءوستى.
كەزدەسۋ سوڭىندا مەملەكەت باسشىسى رەسۋرستىق بازانى ودان ءارى دامىتۋ, حالىقارالىق ىنتىماقتاستىقتى كەڭەيتۋ جانە الەۋمەتتىك باستامالاردى ىسكە اسىرۋ جونىندە بىرقاتار تاپسىرما بەردى.
بۇعان دەيىن مەملەكەت باسشىسى ساۋدا جانە ينتەگراتسيا ءمينيسترى ارمان شاققاليەۆتى قابىلداعانىن حابارلاعانبىز.