جۇگەرىنى قالدىقسىز وڭدەيتىن كاسىپورىن

توعىز جولدىڭ تورابىندا ورنالاسقان شۋ اۋدانىن­­­­دا ءىرى جوبالار قولعا الى­­­نىپ جاتىر. بىرنەشە جىل بۇ­­رىن قۇرىلعان «جىبەك جولى» ار­­نايى ەكونوميكالىق ايماعىندا كەيىنگى بىرەر جىلدىڭ بەدەرىندە 10 كاسىپورىن بوي كوتەرىپ, 4 مىڭ ادامدى جۇمىسپەن قامتۋ كوز­دەل­گەن. ال قىتايلىق ينۆەس­تورلار قول­عا العان جۇگەرىنى قال­دىقسىز وڭ­دەيتىن زاۋىت قۇرى­لىسى بۇگىندە قارقىندى ءجۇرىپ جاتىر.

«كاسىپورىن قۇرىلىسىن جۇر­گى­زۋ ماقساتىندا مىڭداعان ادام ىسكە كىرىستى. زاۋىت اشىلعان كەزدە 1 500 ازامات جۇمىسپەن قامتىلادى. ءبىز جۇگەرىنى تەرەڭ وڭدەۋ ىسىنە كىرىسۋ ارقىلى لەيتسين, يزولەيتسين, ۆالين, گلۋتامين, تسيترۋلين سەكىلدى امين قىشقىلدارىن الامىز. بۇدان بولەك, كراحمال, گليۋكوزا جانە مال ازىعىن وندىرەمىز.

جالپى العاندا, جاڭا زاۋىتتا جۇمىس ىستەيتىن مامانداردىڭ 90 پايىزى جەرگىلىكتى ازاماتتار بولادى. جۇمىسشىلار الداعى جىلدارى شەت مەملەكەتتەردە بىلىكتىلىگىن ارتتىرادى. شۋ اۋدانىنا ۇزىن سانى 19 ينۆەستور كەلەدى», دەيدى «Shenqtai Biotech CO. LTD» جشس باسشىسىنىڭ ورىنباسارى سيۋ تسزين چجاو.

مامانداردىڭ سوزىنە سۇيەنسەك, زاۋىتتىڭ ونىمدىلىك قۋاتى جىلىنا 500 مىڭنان 1 ملن توننا جۇگەرى وڭدەۋگە دەيىن جەتەدى. ال كاسىپورىن تولىق قۋاتىندا جۇمىس ىستەگەن كەزدە بۇل كورسەتكىشتى 3 ملن تونناعا دەيىن جەتكىزۋ مۇمكىندىگى تۋماق. جاڭا زاۋىت قۇرىلىسىن جۇرگىزۋگە شامامەن 420 ملرد تەڭگە ينۆەستيتسيا تارتىلعان.

وبلىس اكىمى ەربول قاراشوكەەۆ­­­­تىڭ ايتۋىنشا, جاڭا جوبا وڭتۇستىك وڭىر­لەردەگى اگرو­­­­­ونەر­كاسىپ سالاسىن دامىتۋعا ايرىقشا سەرپىن بەرەدى. ويتكەنى مۇندا جۇمىستى جۇيەلى تۇردە جۇزەگە اسىرۋعا بارلىق مۇم­كىن­دىك قاراستىرىلعان.

«مەملەكەت باسشىسى وڭدەلگەن اۋىل شارۋاشىلىعى ونىمدەرىنىڭ ۇلەسىن 70 پايىزعا جەتكىزۋ مىندەتىن جۇكتەگەنى ءمالىم. ءبىز تاڭداعان باسىم باعىتتىڭ ءبىرى – ءداندى داقىلداردى تەرەڭ وڭدەۋ. بۇل جوبا – جۇكتەلگەن مىندەتتى جۇزەگە اسىرۋدىڭ ناقتى كورىنىسى. ىرگەسى قالانىپ جاتقان جاڭا زاۋىتتا ەگىستىكتەن باستاپ, تۇتىنۋشىعا دەيىنگى جوعارى سۇ­­رىپ­تى ءونىم وندىرەتىن ءبىرتۇتاس جۇيە قالىپتاستىرىلعان. بىرەگەي جوبا ەلىمىزدىڭ وڭتۇستىك وڭىر­لە­رىندە اگروونەركاسىپ كەشەنىن قارقىندى تۇردە وركەندەتۋگە تىڭ سەرپىن بەرەرى انىق. سونداي-اق اۋىل شارۋاشىلىعى تاۋار وندىرۋشىلەرىنە تۇراقتى تابىس اكەلەدى», دەيدى ە.قاراشوكەەۆ.

كومپانيا باسشىلىعىنىڭ ايتۋىنشا, سەرىكتەستىك قۇرىلىس جۇمىسى كەزىندە نەگىزىنەن قىتايلىق تەحنولوگيانى قولدانادى. سون­دىق­تان ماماندار دا اتالعان ەلدەن جۇمىلدىرىلاتىنى تۇسىنىكتى. الايدا زاۋىت قۇرىلىسى اياقتالعاننان كەيىن جۇمىستىڭ باسىم بولىگىن جەرگىلىكتى ماماندار جۇزەگە اسىرادى.

«جەرگىلىكتى ازاماتتاردى جۇ­مىس­پەن قامتۋ تۋرالى ۋادەمىزگە بەرىك بولۋعا مۇددەلىمىز. بۇل ءوز كەزە­گىندە شىعىنىمىزدى ازايتاتىنىن ايتا كەتكەن ءلازىم. ءبىزدىڭ جوس­­پار بويىنشا باسقارۋ جۇيەسىندەگى 50 مامان عانا قىتايدان كەلەدى. قالعان شارۋانى جۇزەگە اسىرۋعا ەلىمىزدىڭ   ازاماتتارى جۇمىسقا قابىلداناتىنى انىق. ءبىز قازىر الماتى قالاسى مەن جامبىل وبلىسىنداعى ۋنيۆەرسيتەتتەرمەن سويلەسىپ جاتىرمىز. ولار بىزگە كەرەك مامانداردى دايار­لاۋ­عا كومەكتەسەدى. جەرگىلىكتى 40 ستۋدەنتتى جاڭا تەحنولوگيانى مەڭگەرۋ ماقساتىندا قىتايعا وقۋعا جىبەرىپ, ولاردىڭ بىلىكتىلىگىن ارت­تىر­دىق. ال كومپانيا جامبىل وبلىسى اۋماعىندا تىركەلگەندىكتەن, سالىقتىق تۇسىمدەر جامبىل وبلىسىنا تولەنەدى», دەيدى سەرىكتەستىك باسشىسىنىڭ ورىنباسارى. 

ماماندار كەلتىرگەن دەرەككە جۇگىن­سەك, زاۋىت وسى جىلى جۇ­مىس­تى ءىشىنارا باستاۋعا دەن قويىپ وتىر. ناقتىراق ايتساق, بيىل 500 مىڭ توننا جۇگەرىنى وڭدەۋگە كۇش سالماق. ال 2027 جىلى سە­رىكتەستىك 1–1,5 ملن توننا كولە­مىن­دە جۇگەرى سا­تىپ الۋعا بەكىنىپ وتىر.

ء«بىز وزىمىزگە قاجەتتى جۇگەرىنىڭ ءبارىن قازاقستاننىڭ وڭتۇستىك وڭىرلەرىنەن الۋعا نيەتتىمىز. ال­بەتتە, مۇمكىندىك جەتسە, ەلدىڭ بار­لىق وڭىرىنەن ساتىپ الۋعا قاۋ­قا­رىمىز جەتەدى. سىزدەردىڭ كومەك­تەرىڭىزدىڭ ارقاسىندا وڭتۇس­تىك­تەگى شارۋالاردىڭ باسىم كوپشىلىگى جۇگەرى ەگەدى دەپ سەنەمىن. وسى ورايدا جامبىل وبلىسى اكىمدىگى مەن اۋىل شارۋاشىلىعى مينيستر­­­لى­گى بىزگە قولدان كەلگەنشە قول­داۋ كورسەتىپ وتىرعانىن ايتا كەتكەن ءجون. ال جۇگەرىنىڭ سۇرپىنا قاتىستى ايتار بولسام, ءبىزدىڭ زاۋىتقا جەرگىلىكتى ءونىم جارايدى. قانداي دا ءبىر تالابىمىز جوق. جۇمساق جۇگەرىنى عانا قابىلدايمىز. شارۋالار وسىنى نازاردا ۇستاسا دەيمىز. ال جۇگەرىنى ساتىپ الۋ نارىقتىق باعا جۇيەسىمەن جۇزەگە اسىرىلادى. سەبەبى بىزدە بەكىتىلگەن ناقتى باعا ءتاريفى جوق», دەيدى كومپانيا وكىلى.

سەرىكتەستىك باسشىسىنىڭ ورىنباسارى كەلتىرگەن دەرەككە جۇگىنسەك, وتاندىق شارۋالار جۇگەرى القابىن كەڭەيتۋگە نيەتتەنسە, «Shenqtai Biotech CO. LTD» جشس تاراپىنان ولارعا تەحنيكالىق كومەك كورسەتۋگە مۇمكىندىك بار. الايدا جەرگىلىكتى ازاماتتارمەن بىرلەسىپ جۇگەرى القاپتارىن كەڭەيتە المايدى. ويتكەنى ەلىمىزدىڭ زاڭناماسىندا شەتەلدىك كومپانيالاردىڭ قازاق­­ستان اۋماعىندا مۇنداي جۇمىس اتقارۋىنا تىيىم سالىنعان.

«زاۋىت تولىق قۋاتىندا جۇمىس ىستەگەن كەزدە وندىرىلگەن ءونىمدى جەرورتا تەڭىزى ماڭايىنداعى ەلدەرگە, دالىرەك ايتساق, ەۋروپا مەم­لە­كەتتەرى مەن سولتۇستىك افريكا ەلدەرىنە ەكسپورتتاۋعا بەل بۋىپ وتىرمىز. ونى ناقتى ۋاقى­­­تىن­دا جۇزەگە اسىراتىن ءوزىمىزدىڭ جوبا-جوسپارىمىز بار», دەيدى ول.

جۇمىسىن كەزەڭ-كەزەڭىمەن جاندان­دىرۋعا تاۋەكەل ەتكەن زاۋىت باسشىلى­عىنان جەرگىلىكتى ازا­مات­تاردىڭ جالا­­قىسى تۋرالى دا سۇرادىق. كومپانيا باسشى­لى­عىنىڭ سوزىنشە, مۇنداعى قىز­مەت­­كەر­لەردىڭ ەڭبەكاقىسى 200 مىڭ تەڭگە­دەن 1 ميل­ليون تەڭگە ارا­لى­عىندا بولماق. جالا­قى كولە­مى قىز­مەت­كەردىڭ فۋنك­تسيو­نال­دىق مىن­دە­تىنە بايلانىستى تاعايىن­دالادى.

«كاسىپورىندا جاتىپ جۇمىس ىستەۋگە نيەتتى ازاماتتارعا ارنالعان ەكى بىردەي جاتاقحانامىز بار. ولار­دىڭ وسىندا قالىپ قىزمەتتىك مىندەتىن اتقارۋعا ەشقانداي كەدەرگى جوق. ارقايسىسىنا 900-دەن استام ادام سىيادى. بۇدان بولەك, وتباسىلى جۇمىسشىلارعا ارنالعان پاتەرلەر دە بار. ال ۇيىنە بارىپ كەلىپ جۇمىس ىستەگىسى كەلەتىندەرگە ارنايى كولىك قاراستىرىلعان», دەيدى سەرىكتەستىك باسشىسىنىڭ ورىن­باسارى.

كومپانيا ۋنيۆەرسيتتەرمەن كەلى­سىم جۇرگىزۋ اياسىندا قىتايعا وقۋعا جىبە­­رىلگەن جاستاردىڭ ءبارىن جۇ­مىس­قا قا­بىلداعان. ولار تەك جۇ­مىس ىستەۋ جۇيە­سىن تولىق مەڭ­گە­رۋ, كاسىبي بىلىكتى­لىگىن جەتىل­دىرۋ ماق­ساتىندا عانا ارنايى كۋرستارعا جىبەرىلەدى. زاۋىت ماڭايىندا ور­نا­لاسقان اسحانادا قازاقى مازىر­گە ساي تاعامدار دايىندالاتىنىن دا ايتا كەتكەن ءجون. ءبىر سوزبەن ايتقاندا, جۇگەرىنى تەرەڭدەتىپ وڭدەيتىن زاۋىتتا جۇمىس ىستەۋگە بارلىق مۇمكىندىك قاراس­تى­رىلعانى كوڭىل توعايتادى.

جامبىل وبلىسى,

شۋ اۋدانى