اقوردادا كونستيتۋتسيانى قابىلداۋعا ارنالعان سالتاناتتى جيىن ءوتتى. مەملەكەت باسشىسى قاسىم-جومارت توقاەۆ قازاقستان رەسپۋبليكاسىنىڭ كونستيتۋتسياسىنا جانە «2026 جىلعى 15 ناۋرىزدا قابىلدانعان قازاقستان رەسپۋبليكاسىنىڭ كونستيتۋتسياسىن ىسكە اسىرۋ جونىندەگى شارالار تۋرالى» جارلىققا قول قويىپ, ءسوز سويلەدى, دەپ حابارلايدى Egemen.kz.
پرەزيدەنت ءوز سوزىندە جاڭا اتا زاڭ ەلدىڭ دامۋ باعىتىن ايقىندايتىن تاريحي قۇجات ەكەنىن اتاپ ءوتتى.
«ازاماتتارىمىز تاڭداعان جاڭا كونستيتۋتسيا قازاقستاننىڭ جاڭا داۋىرىنە جول اشادى. قازاقستان – اياعىنا نىق تۇرعان, حالىقارالىق بەدەلى بيىك مەملەكەت. ەلىمىز ىشكى تۇراقتىلىعىن ساقتاپ, وزگە جۇرتپەن دوستىق قاتىناس ورناتىپ, زور سەنىممەن العا قاراي قادام باسىپ كەلەدى.
ەندى مەملەكەتىمىز دامۋدىڭ داڭعىل جولىنا تۇسەدى. سوندىقتان بىزگە تاتۋلىق پەن دوستىق, سابىرلىق پەن تاباندىلىق, جاسامپازدىق پەن ۇقىپتىلىق, ەڭبەكقورلىق پەن سەنىمدىلىك اۋاداي قاجەت. ءبىزدىڭ بيىك ماقساتتارىمىز, ناقتى جوسپارلارىمىز بار. كوپ سوزباي ءبارىمىز وسى مىندەتتەردى ىسكە اسىرۋعا كىرىسۋىمىز كەرەك», دەدى مەملەكەت باسشىسى.
پرەزيدەنت حالىق كونستيتۋتسياسىنىڭ قابىلدانۋى جالپىۇلتتىق بىرلىكتىڭ ايقىن كورىنىسى ەكەنىن ەرەكشە اتاپ ءوتتى.
«شىن مانىندە, حالىق كونستيتۋتسياسىن ازىرلەۋ مەن قابىلداۋ جالپىۇلتتىق بىرلىكتىڭ سالتانات قۇرعانىن, جاڭعىرۋ ستراتەگياسى مەن رەفورمالار جاپپاي قولداۋ تاپقانىن اڭعارتادى. ارينە, بۇل قۇجاتتىڭ تاريحي ماڭىزىنا, قازىرگى قوعام مەن كەلەر ۇرپاق باعا بەرەدى. ال بىزگە مەملەكەتتىلىك جىلناماسىن جازۋ ميسسياسى جۇكتەلدى. بۇل – ابىرويلى ءارى جاۋاپتى ميسسيا.
سونىمەن بىرگە ازاماتتىق وي-پىكىرىڭ ارقىلى تۋعان وتانىڭنىڭ دامۋ باعدارىن بەلگىلەۋگە بەرىلگەن سيرەك مۇمكىندىكتەردىڭ ءبىرى, تاعدىردىڭ سىيى. سوندىقتان ءبارىمىز تاريحي ءارى ۇلى بەتبۇرىستىڭ بەل ورتاسىنان تابىلىپ, تاعدىرشەشتى ساتكە كۋا بولدىق دەپ سەنىممەن ايتا الامىز. رەفەرەندۋمعا قاتىسىپ, ازاماتتىق جاۋاپكەرشىلىك پەن وتانشىلدىق تانىتقان بارشاڭىزعا العىس ايتامىن. اسىرەسە, جاستارعا شىنايى ريزاشىلىعىمدى بىلدىرەمىن. جاس بۋىن ەل جىلناماسىنا ەسىمدەرىن التىن ارىپپەن جازىپ, اتا زاڭ اۆتورلارىنىڭ بىرىنە اينالدى.
قازاقستاننىڭ بۇگىنى مەن كەلەشەگى جاستاردىڭ قولىندا. بۇل – ەشقانداي ۇران ەمەس, قاراپايىم ءومىر زاڭى, مەملەكەتتىك ساياساتىمىزدىڭ وزەگى», دەدى قاسىم-جومارت توقاەۆ.
بۇعان قوسا پرەزيدەنت الداعى رەفورمالاردىڭ اۋقىمىنا توقتالىپ, جۇيەلى وزگەرىستەر كەزەڭى باستالعانىن ايتتى.
«الدىمىزدا اۋقىمدى جۇمىس تۇرعانىن, ءبىز مەملەكەتىمىزدى جان-جاقتى جاڭعىرتۋ جولىن ەندى عانا باستاعانىمىزدى ايرىقشا اتاپ وتكىم كەلەدى.
دۇنيە دۇربەلەڭگە تولىپ, اينالامىزدا تۇراقسىزدىق بەلەڭ العان جاعدايدا بۇل جولدى ەڭسەرۋدىڭ وڭاي بولمايتىنى انىق. الايدا جولدىڭ قيىندىعىنا قاراماي, العا قادام باسۋىمىز كەرەك.
ول ءۇشىن ۇلتىمىز اۋىزبىرشىلىك تانىتىپ, جاۋاپتى ءارى جاسامپاز ءپاتريوتيزمنىڭ, تەرەڭ ءبىلىم مەن كاسىبيلىكتىڭ ۇلگىسىن كورسەتۋى قاجەت. ءبىز كوزدەگەن ماقساتىمىزعا جەتەمىز. جەڭىمپاز بولۋعا مىندەتتىمىز!» دەدى مەملەكەت باسشىسى.
پرەزيدەنت قول قويعان جارلىق اتا زاڭ نورمالارىن ىسكە اسىرۋدىڭ نەگىزگى باعىتتارىن ايقىندايدى. الداعى ۋاقىتتا پارلامەنت قاراۋىنا پرەزيدەنت, قۇرىلتاي, حالىق كەڭەسى, استانانىڭ مارتەبەسى جانە اكىمشىلىك-اۋماقتىق قۇرىلىس تۋرالى بەس جاڭا كونستيتۋتسيالىق زاڭ ۇسىنىلادى. سونىمەن قاتار سەگىز كونستيتۋتسيالىق زاڭعا جانە 60-تان استام زاڭعا وزگەرىس ەنگىزىلەدى.
پرەزيدەنت: جاڭا حالىق كونستيتۋتسياسى – كەلەر ۇرپاقپەن بىرگە جاساي بەرەتىن قاسيەتتى قۇجات
جاڭا كونستيتۋتسيا ەلدىڭ قۇقىقتىق, ەكونوميكالىق جانە قوعامدىق-ساياسي جۇيەسىن جاڭعىرتىپ, قازاقستاننىڭ دامۋىنداعى جاڭا كەزەڭنىڭ نەگىزىن قالايدى.
پرەزيدەنت كونستيتۋتسيانى قابىلداۋعا ارنالعان سالتاناتتى جيىنعا قاتىستى