ەلدە تۇرعىن ءۇي الۋ-ساتۋ ازايىپ, نارىق ءبىراز سايابىرسىدى. قاڭتاردا 27 745, اقپاندا 27 421 عانا كەلىسىم جاسالعان. بۇل بىلتىرعى دەڭگەيدەن ەداۋىر تومەن, دەپ جازادى Egemen.kz.
2025 جىلى اي سايىن شامامەن 40 مىڭعا جۋىق ءۇي ساتىلىپ كەلگەن ەدى. ءتىپتى ەرەكشە جوعارى بولعان جەلتوقساندى ەسەپتەمەگەننىڭ وزىندە, بيىلعى كورسەتكىشتەر الدەقايدا تومەن. ياعني حالىقتىڭ ءۇي الۋعا دەگەن ىقىلاسى ازايىپ وتىر.
فلوريدا تۇرعىنى ChatGPT-ءدىڭ كومەگىمەن ءۇيىن 5 كۇندە ساتقان
ۇلتتىق ستاتيستيكا بيۋروسىنىڭ مالىمەتىنە سۇيەنسەك, اقپاندا 20 ءوڭىردىڭ تەڭ جارتىسىندا ساۋدا كەمىگەن. اسىرەسە شىمكەنتتە (–28,3%), جامبىل وبلىسىندا (–15,8%), قىزىلوردا وبلىسىندا (–12,9%) قاتتى تومەندەگەن. ال اباي وبلىسىندا (+20,4%), سولتۇستىك قازاقستاندا (+14,2%) جانە الماتىدا (+10,4%) كەرىسىنشە, قوزعالىس جاندانا تۇسكەن.
ولجاس بەكتەنوۆ: اۋىلدىق جەرلەردەگى تۇرعىن ءۇي قۇرىلىسىنا كوڭىل ءبولۋ كەرەك
ساتىلعان ۇيلەردىڭ باسىم بولىگى – پاتەرلەر. اقپاندا 21 مىڭنان استام پاتەر وتكەن. بۇل قاڭتارمەن سالىستىرعاندا ءسال از. جەكە ۇيلەر كەرىسىنشە, ازداپ كوبەيگەن – 6 مىڭنان اسا كەلىسىم جاسالعان. ەڭ كوپ الىنعانى – ءبىر بولمەلى پاتەرلەر.
2026 جىلى تۇرعىن ءۇي قۇرىلىسىنا قانشا قارجى بولىنەدى؟
بىلتىرمەن سالىستىرعاندا دا كورسەتكىش تومەن. جالپى ساۋدا كولەمى 5,5 پايىزعا قىسقارعان. 20 ءوڭىردىڭ 14-ىندە تومەندەۋ بايقالسا, ەڭ كوپ ازايعانى – ۇلىتاۋ وبلىسى (–30,3%). ال اتىراۋ وبلىسىندا عانا ءوسىم بار.
ماماندار مۇنى جىل باسىنداعى ادەتتەگى باياۋلىقپەن بايلانىستىرادى. ادەتتە كوكتەمگە قاراي حالىقتىڭ قوزعالىسى كوبەيىپ, ءۇي الۋ-ساتۋ قايتا جاندانادى.