بيىلعى 2 ناۋرىزدا باستالعان ۇبت-نىڭ العاشقى ەكى اپتاسىندا 67 مىڭنان استام تالاپكەر تەستىلەۋدەن ءوتتى. بۇل كەزەڭدە ءبىلىم الۋشىلاردىڭ 66,99%-ى – قازاق تىلىندە, 32,88% – ورىس تىلىندە, ال 85-ءى – اعىلشىن تىلىندە تەست تاپسىرعان, دەپ جازادى Egemen.kz.
ەكى اپتالىق ۇبت قورىتىندىسى بويىنشا تالاپكەرلەردىڭ 61%-ى شەكتى بالل جينادى. بەس ءپان بويىنشا ورتاشا بالل – 59, ال ەڭ جوعارى ناتيجە – 136 بالل. ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعدايلار جاسالىپ, 192 تالاپكەر ارنايى مۇمكىندىكپەن تەستىلەۋگە قاتىسقان.
تالاپكەرلەر تەست تاپسىرمالارىن تەست اياقتالعان سوڭ 30 مينۋت ىشىندە اپەللياتسياعا بەرە الادى. تەحنيكالىق سەبەپتەر تۋىنداعان جاعدايدا اپەللياتسيا تىكەلەي تەستىلەۋ كەزىندە قابىلدانادى. ناتيجەلەرى بار سەرتيفيكاتتار اپەللياتسيا قاراستىرىلعان سوڭ جەكە كابينەتتەردە قولجەتىمدى بولادى.
ەلىمىزدە ناۋرىز ايىنداعى ۇبت باستالدى
ەكى اپتالىق تەستىلەۋ كەزىندە 117 ەرەجە بۇزۋشىلىق تىركەلدى. ونىڭ ىشىندە 69 تالاپكەر سمارتفون, شپارگالكا جانە تىيىم سالىنعان زاتتاردى الىپ كىرمەك بولعانى ءۇشىن تەستىلەۋدەن شەتتەتىلدى, تاعى 48 ادام اۋديتوريادان شىعارىلادى. بۇل تۇلعالاردىڭ ناتيجەلەرى جويىلدى. وزگە ادامداردىڭ ورنىنا كىرۋ فاكتىلەرى انىقتالعان جوق.
2026 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن بەينەجازبالارعا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ انىقتالعان جاعدايدا ۇبت ناتيجەلەرى جويىلادى.
ايتا كەتۋ كەرەك, تەستىلەۋگە قاتىسۋعا 184 مىڭعا جۋىق كەلىپ تۇسكەن. بۇل ۇبت-نىڭ جوعارى سۇرانىستاعى جانە كەڭ قامتىلعانىن كورسەتەدى.