پەتروپاۆل. 13 مامىر. م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ پروفەسسورى ۆ.پولياكوۆ تەرەك بۇرشىكتەرىنەن ءدارى-دارمەك شىعارۋمەن كوپتەن بەرى اينالىسىپ كەلەدى. وسى جولى ويلاپ تاپقان ەمدىك پرەپاراتتار ادام اعزاسىنا وتە پايدالىلىعىمەن ەرەكشەلەنىپ وتىر. بۇل تۋرالى ۋنيۆەرسيتەتتىڭ «پاراسات» ءباسپاسوز ورتالىعى حابارلادى.
حيميا عىلىمدارىنىڭ دوكتورىنىڭ ايتۋىنشا, قىزىلجار وڭىرىندە وسەتىن تەرەك بۇرشىكتەرى نەگىزىندە جاسالعان 8 بىرەگەي ەمدىك پرەپاراتتار سۋىق تيگەندە, كۇيىك شالعاندا تاپتىرمايتىن بىردەن-ءبىر ءدارۋ كورىنەدى. سونداي-اق, ستوماتولوگيادا, تۋبەركۋلەزگە قارسى كەڭىنەن قولدانۋعا بولادى. وسىنداي ەمدىك پرەپاراتتاردى پايدالانۋدىڭ ارقاسىندا 50-گە جۋىق ناۋقاس دەنساۋلىعىن وڭالتىپتى.
«ەفير مايى الماتىداعى تۋبەركۋلەز ورتالىعى بازاسىندا ابدەن زەرتتەلىندى. تاماق بۋلاۋ كەزىندە بۇل ماي تۋبەركۋلەزدىڭ ميكروباكتەريالارىنا اسەر ەتىپ, اۋرۋدى 2 ايدا ساۋىقتىرادى. باستى وزگەشەلىگى سول, وكپەدەگى جارالار قۇلان-تازا جازىلىپ شىعادى», دەيدى سقمۋ پروفەسسورى ۆلاديلەن پولياكوۆ.
بۇگىندە «قىزىل ماي» فيرماسىمەن بىرلەسىپ جاسالعان پرەپاراتتاردىڭ پاتەنتتەرى بار. الايدا مەديتسينا سالاسىندا كەڭىنەن قولدانۋعا قاراجات جاعى قيىندىق كەلتىرىپ وتىر.
ءومىر ەسقالي.
دەرەك: م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتى.
سۋرەت: egemen.kz