ينكليۋزيۆتى ءتاسىل جۇزەگە استى

ۋچاسكە عيماراتى مەڭىرەۋ تى­نىشتىققا ءتىل ءبىتىرىپ, قاراڭ­عىنى جارىق ەتەتىن «اقىلدى» قۇ­رىلعىلارمەن جابدىقتالعان. ءجۇرىپ-تۇرۋى قيىن جانداردىڭ كىرىپ-شىعۋىنا قاجەت جاعدايدىڭ ءبارى قاراستىرىلعان. ۋچاسكە پاندۋسپەن, كىرەبەرىستەگى تاكتيلدى كورسەتكىشتەر, تاكتيلدى ناۆيگا­تسيا قۇرالدارى, ەلەكتروندىق دىبىس بەرگىش اپپاراتپەن قام­تاماسىز ەتىلگەن. سونداي-اق  كورۋ قابىلەتى ناشار جاندارعا باعىت-باعدار سىلتەيتىن برايل قارپىمەن جاسالعان ترافەرەتتەر, اۋديو-نۇسقاۋلىقتار قويىلعان. ءبىر بۇرىشتا ۇلكەيتكىش اينەك, قوسىمشا جارىق كوزدەرى, دىبىس ۇلعايتقىش قوندىرعىلار قوسىلعان. كومپيۋتەردەن كونستي­تۋتسيا جوباسى تۋرالى قا­جەتتى اقپارات الۋعا بولادى. داۋىس بەرۋ كابيناسىنا دەيىن دى­بىس­تىق قوندىرعى ورناتىلعان. شىمىلدىعى اشىلسا, ەكى تىلدە سويلەپ قويا بەرەدى.

جالپى, اتالعان ۋچاسكەدە داۋىس بەرۋ قۇقىنا يە 2 356 ادام تىركەلگەن. ونىڭ ىشىندە ەستۋ قابى­لەتى ناشار – 5, كورۋ قابىلەتى تومەن – 12, ارباعا تاڭىلعان 4 ازامات بار.

«بۇعان قوسا, كورۋ قابىلەتى ناشار ادامدارعا ارنايى ماياك­تار ورناتىلعان. تاكتيلدى كور­سەتكىشتەردىڭ ەرەكشەلىگى, ۋچاس­كەگە كەلگەن مۇمكىندىگى شەكتەۋلى ادام قۇرىلعىنى ساۋساعىمەن وقىپ, رەفەرەندۋم كوميسسياسىنىڭ قاي­دا وتىرعانىن, بيۋلەتتەندى قايدان الۋ كەرەگىن بىردەن تۇسىنەدى. سونداي-اق داۋىس بەرۋ كابيناسى مەن داۋىس بەرۋ جاشىگىن دە ەشكىمنىڭ كومەگىنسىز ءوزى تابا الادى. بۇعان قوسا, ارباعا تاڭىلعان جاندار ءۇشىن باستىرما نۇكتەسى بار ارنايى كوتەرگىش قۇرىلعى ورناتىلدى. ازامات نۇكتەنى باسىپ, كوتەرگىشكە ءمىنىپ عيماراتقا ەنەدى. ودان ءارى كىرەبەرىستە تۇرعان كوميسسيا مۇشەسى ونى داۋىس بەرۋ زالىنا دەيىن جەتكىزەدى. سونىمەن قاتار ەستۋ قابىلەتى ناشار ازاماتتارعا ارنالعان يندۋكتسيالىق ىلمەك بار. بۇل قۇرالدىڭ كومەگىمەن كوميسسيا مۇشەلەرى داۋىس بەرۋشىمەن ەش كەدەرگىسىز تۇسىنىسە الادى. ادەتتە, مۇنداي ازاماتتار ۇنەمى ارنايى ەستۋ اپپاراتىن تاعىپ جۇرەدى. ال ميكروفون تاققان كوميسسيا مۇشەسى ايتقان ءاربىر ءسوز سول ارنايى قۇرىلعىعا بليۋتۋز ارقىلى جەتىپ وتىرادى. وسىلايشا, ەكەۋى ەش كەدەرگىسىز وپ-وڭاي تۇسىنىسەدى», دەيدى ۋچاسكەلىك رەفەرەندۋم كوميسسياسىنىڭ توراعاسى باۋىر­جان قاجياقباروۆ.

ينكليۋزيۆتى داۋىس بەرۋ ۋچاس­كەسى ءۇش ءتۇستى ايماققا بولىنگەن. ءبىرىنشى ايماق سارى ءتۇستى بوياۋمەن قورشالعان. سارى ءتۇس كوزى ناشار كورەتىندەردىڭ داۋىس بەرۋ زالىن جازباي تاۋىپ بارۋىنا كومەكتەسەدى. زاعيپ جان كوك تۇسپەن قورشالعان ايماقتان بيۋللەتەن الاتىنىن, ال جاسىل ايماق داۋىس بەرۋگە ارنالعان الاڭ ەكەنىن بىردەن تۇسىنەدى.

كورۋ قابىلەتىنەن ايىرىلعان الەكساندر ءپرياحيننىڭ ايتۋىنشا, اتالعان سايلاۋ ۋچاسكەسى مۇگەدەكتىگى بار جانداردىڭ ماڭىزدى وقيعادان شەت قالىپ قويماۋىنا سەپتىگىن تيگىزەدى.

«مەن بۇعان دەيىنگى سايلاۋ, رەفەرەندۋمداردا ۇيدە وتىرىپ داۋىس بەرەتىنمىن. كوميسسيا مۇشەلەرى جاشىكتەرىن كوتەرىپ وزدەرى كەلەتىن. بۇگىن ەلدەن قالماي كوپشىلىكپەن بىرگە داۋىس بەرۋگە كەلىپ تۇرمىن. ۋچاسكەلىك كوميسسيا جىبەرگەن ينۆاتاكسيمەن جەتتىم. ەل بولاشاعى ءۇشىن اسا ماڭىزدى تاريحي وقيعادان تىس قالدىرماي, ءبىزدى دە ەلەپ-ەسكەرىپ بار جاعدايدى جاساپ قويعان. بۇگىن ەلىمىزدىڭ جارقىن بولاشاعى ءۇشىن, ءوزىم سياقتى مۇمكىندىگى شەكتەۋلى جانداردىڭ جاقسى ءومىر ءسۇرۋى ءۇشىن داۋىس بەردىم», دەيدى ا.پرياحين.

قوستاناي وبلىسىندا 717 رەفەرەندۋم ۋچاسكەسى جۇمىس ىستەدى. وڭىردە 536 824 ازامات داۋىس بەرۋ قۇقىعىنا يە. ماڭىزدى ناۋقان­عا تۇرعىنداردىڭ اسا بەلسەندى ات­سالىسقانىن دا ايتا كەتۋ كەرەك. ۋچاسكەلەر اشىلعان ساتتەن باستاپ كەشكە دەيىن قوعامدىق كولىكتەر دە توقتاۋسىز تەگىن ءجۇرىپ تۇردى.

قوستاناي وبلىسى