داۋىس بەرۋدىڭ اياقتالۋىنا بايلانىستى جالعان اقپاراتقا قارسى ءىس-قيمىل ورتالىعى اقپاراتتىق كەڭىستىككە جۇرگىزىلەتىن مونيتورينگتى جالعاستىرىپ كەلەدى, دەپ حابارلايدى Egemen.kz.
ورتالىق كوممۋنيكاتسيالار قىزمەتىنىڭ جالعان اقپاراتقا قارسى ءىس-قيمىل ورتالىعى كۇنى بويى داۋىس بەرۋ راسىمىنە قاتىستى تيپتىك فەيكتەر مەن مانيپۋلياتسيالىق ماتەريالداردىڭ تارالۋى تىركەلگەنىن ايتتى.
سايلاۋ ۋچاسكەلەرىنىڭ جابىلۋىمەن مۇنداي اقپاراتتىق شابۋىلداردىڭ بەلسەندىلىگى, ادەتتە جاڭا كەزەڭگە وتەدى. ورتالىقتىڭ بولجامى بويىنشا, جالعان اقپاراتتىڭ قارقىنى تۇپكىلىكتى باسەڭدەگەنگە دەيىن نەگىزگى ەكپىن داۋىس بەرۋ پروتسەسىنەن داۋىستاردى ساناۋ ءراسىمى مەن ونىڭ ناتيجەلەرىنە كۇمان كەلتىرۋگە اۋىسادى.
اتاپ ايتقاندا, اقپاراتتىق كەڭىستىكتە مىناداي مالىمەتتەر تارالۋى مۇمكىن:
داۋىس بەرۋدىڭ ناتيجەلەرى الدىن الا بەلگىلى بولدى دەلىنگەن «اقپاراتتىڭ تاراپ كەتۋى»; جالعان ەكزيت-پولل ناتيجەلەرى; «داۋىس ساناۋ كەزىندە بيۋللەتەندەردى اۋىستىرۋ» تۋرالى نەگىزسىز مالىمدەمەلەر; «سايلاۋ جاشىكتەرىن» نەمەسە قۇجاتتامانى «جاسىرىن الىپ كەتۋ» تۋرالى حابارلامالار; جەلىدە تاراتىلاتىن, قورىتىندى ناتيجەلەر رەتىندە ۇسىنىلعان «قۇجاتتار» مەن كەستەلەر; «رەفەرەندۋمدى وتپەدى دەپ تانۋ» تۋرالى نەگىزسىز مالىمدەمەلەر.ءتۇرلى ەلدەردەگى ەلەكتورالدىق ناۋقانداردى باقىلاۋ تاجىريبەسى كورسەتكەندەي, قانداي ما اقپاراتتىق شابۋىلداردىڭ ءبىر بولىگى كەلەسى كۇنى دە تارالۋى مۇمكىن. بۇل كەزەڭدە داۋىس بەرۋدىڭ جەكەلەگەن ەپيزودتارىن بۇرمالاپ كورسەتۋ, سونداي-اق رەفەرەندۋمنىڭ ماڭىزدىلىعىن تومەندەتۋگە باعىتتالعان جاريالانىمدار ءجيى پايدا بولۋى مۇمكىن.
ايتا كەتەيىك, ەۋرازيالىق ينتەگراتسيا ينستيتۋتى جۇرگىزگەن ساۋالناما بويىنشا Exit poll ناتيجەسى جاريالاندى. قازاقستاندىقتاردىڭ 86,7%-ى رەفەرەندۋمدا ء«يا, قابىلدايمىن» دەپ جاۋاپ بەرگەن.
سونىمەن قاتار رەفەرەندۋمدا 9 126 850 ءازامات وز تاڭداۋىن جاسادى. ول تىزىمگە ەنگىزىلگەن ازاماتتاردىڭ 73,24 %-ىن قۇرادى. ايتا كەتەيىك, رەفەرەندۋمنىڭ رەسمي ناتيجەلەرى 2026 جىلعى 21 ناۋرىزعا دەيىن جاريالانادى.