15 ناۋرىز كۇنى وتكەن رەسپۋبليكالىق رەفەرەندۋم بارىسىندا ەل بويىنشا قوعامدىق ءتارتىپ بۇزۋشىلىقتار تىركەلگەن جوق. بۇل تۋرالى ىشكى ىستەر مينيسترلىگىنىڭ رەسمي وكىلى شىڭعىس الەكەشەۆ مالىمدەدى, دەپ حابارلايدى Egemen.kz.
بۇگىن پوليتسيا قىزمەتكەرلەرى ەلىمىز بويىنشا رەسپۋبليكالىق رەفەرەندۋمنىڭ قاۋىپسىز ءوتۋىن قامتاماسىز ەتتى. ىشكى ىستەر مينيسترلىگى داۋىس بەرۋ اياقتالعاننان كەيىن دە قوعامدىق ءتارتىپتى قامتاماسىز ەتۋدى جالعاستىرادى. بۇل تۋرالى «رەفەرەندۋم – 2026» ونلاين-مارافونى اياسىندا وكق الاڭىندا وتكەن بريفينگ بارىسىندا رەسمي وكىل شىڭعىس الەكەشەۆ ايتتى.
ونىڭ ايتۋىنشا, سايلاۋ كوميسسيالارىنىڭ, بايقاۋشىلاردىڭ قاۋىپسىز جۇمىس ىستەۋىنە جانە ازاماتتاردىڭ ءوز تاڭداۋىن ەركىن تۇردە جاساۋىنا بارلىق جاعداي جاسالدى.
«ەلىمىزدەگى 10 مىڭنان استام رەفەرەندۋم ۋچاسكەسىنىڭ ەشقايسىسىندا قوعامدىق ءتارتىپتى ورەسكەل بۇزۋ فاكتىلەرىنە جول بەرىلمەدى. قازىرگى ۋاقىتتا ۋچاسكەلەردە داۋىستاردى ساناۋ جۇمىستارى ءجۇرىپ جاتىر. جاعداي تۇراقتى جانە پوليتسيانىڭ تولىق باقىلاۋىندا. داۋىستاردى ساناۋ اياقتالعاننان كەيىن پوليتسيا قىزمەتكەرلەرى بيۋللەتەندەر مەن حاتتامالاردى وڭىرلىك كوميسسيالارعا قاۋىپسىز جەتكىزۋدى قامتاماسىز ەتەدى», دەدى سپيكەر.ايتا كەتەيىك, قازاقستاندا 15 ناۋرىز كۇنى كەشكى ساعات 20:00-دە بارلىق رەفەرەندۋم ۋچاسكەلەرى جابىلدى. رەفەرەندۋمدا داۋىس بەرگەندەر سانى 9 126 850 ازاماتتى قۇرادى.