تۋعان كۇنىندە داۋىس بەرىپ, سىيلىق الدى

جالپى ءوڭىر بويىنشا بارلىعى 446 391 ازاماتتىڭ داۋىس بەرۋ قۇقىعى بار. ونىڭ باسىم بولىگى – 237 532 ادام – وبلىس ورتالىعىندا تىركەلگەن. وبلىستا 4089 جاس العاش رەت داۋىس بەرەدى.

«وسىناۋ ماڭىزدى ناۋقاندى وتكىزۋگە 1 وبلىستىق اۋماقتىق كوميسسيا, 1 قالالىق اۋماقتىق (ورال) جانە 12 اۋداندىق اۋماقتىق كوميسسيا قىزمەت كورسەتىپ جاتىر, كوميسسيا مۇشەلەرىنىڭ جالپى سانى – 3215 ادام» دەپ حابارلادى بقو اۋماقتىق رەفەرەندۋم كوميسسياسى.

102 جاستاعى ۇلى وتان سوعىسىنىڭ ارداگەرى رەفەرەندۋمدا داۋىس بەردى

ءبىز ورال قالاسىنىڭ ەڭ ۇلكەن اۋدانى – زاچاگان كەنتىندەگى بىرنەشە رەفەرەندۋم ۋچاسكەسىن ارالاپ شىعىپ, داۋىس بەرۋدىڭ بارىسىن باقىلاپ قايتتىق.

ء«بىزدىڭ ۋچاسكەدە حالىق تاڭداۋىن جاساۋ ءۇشىن بارلىق جاعداي جاسالعان, ۋچاسكە ۋاقىتىندا اشىلدى, ءبارى رەتىمەن ءجۇرىپ جاتىر. بىزدە 2788 داۋىس بەرۋشى تىركەلگەن. تاڭعى ساعات 7:00-دە ءابۋ داۋلەتوۆ دەگەن داۋىس بەرۋشى وتباسىمەن كەلىپ, داۋىس بەرىپ, سىيلىعىن الىپ كەتتى. تۇسكى ساعات 12-دەن كەيىن ءوز ۇيىنەن داۋىس بەرەتىن جاندارعا بارامىز», دەيدى №421 ۋچاسكەلىك رەفەرەندۋم كوميسسيانىڭ توراعاسى ساۋلە ايتقاليەۆا.

ءبىز باس سۇققان №427 ۋچاسكەدە دە ادام قاراسى اجەپتاۋىر ەكەن. كوميسسيا توراعاسى تولقىن جاستالاپقىزى تاڭداۋ جاساۋعا تىركەلگەن 2037 ادام بار ەكەنىن, 13 ادام ۇيدەن داۋىس بەرەتىنىن, بارلىعى ءبىر قالىپتى, زاڭنىڭ تارتىبىنە سايكەس ۇيىمداستىرىلىپ جاتقانىن حابارلادى.

«داۋىس بەرۋشىلەرگە ىڭعايلى بولۋى ءۇشىن بۇرىن قادىر مىرزا ءالي اتىنداعى مەكتەپتە ورنالاسقان №400 ۋچاسكە قازىر احمەت بايتۇرسىن ۇلى اتىنداعى مەكتەپ عيماراتىنا كوشىرىلدى. جالپى ءبىزدىڭ اۋدان – كوپتەگەن ۇيلەر سالىنىپ, حالىق تەز كوبەيىپ كەلە جاتقان اۋماق قوي. سوعان قاراماستان ءبارى ۇيلەسىمدى, حالىققا ىڭعايلى ەتىپ ۇيىمداستىرىلعان», دەيدى تولقىن جاستالاپقىزى.

شۇعىلا شاعىن اۋدانىندا تۇراتىن تۇراربەك سۇندەتوۆ رەفەرەندۋم ۋچاسكەسىنە تاڭعى 6:30-دا كەلىپ الىپتى. ول داۋىس بەرۋ ۋچاسكەسى اشىلىپ, ەلىمىزدىڭ ءانۇرانى ورىندالعان سالتاناتتى ساتكە كۋا بولىپ, №427 ۋچاسكەدە تۇڭعىش تاڭداۋ جاساعان سايلاۋشى بولىپ تىركەلدى. سول ءۇشىن شاعىن سىيلىققا دا يە بولدى.

رەفەرەندۋم: ەلىمىزدىڭ چەمپيوندارى ءوز تاڭداۋىن جاسادى

ء«بىزدىڭ ۋچاسكەدە بەكجانوۆ اباي ەسىمدى سايلاۋشى بيىل تۇڭعىش رەت تاڭداۋ جاسادى. قازىر جوعارى وقۋ ورنىندا ستۋدەنت بولىپ جۇرگەن بۇل جىگىت ءبىزدىڭ №47 مەكتەپتە ءبىلىم العان شاكىرتىمىز ەدى. ماڭىزدى ساياسي ناۋقانعا سانالى تۇردە قاتىسىپ, ءوز تاڭداۋىن جاساعان وقۋشىمىزعا ريزا بولىپ قالدىق», دەيدى №400 ۋچاسكەنىڭ باسشىسى اقساۋلە قوبىلاندىقىزى.

بۇل ۋچاسكە دە قالاداعى ەڭ ءىرى داۋىس بەرۋ ورتالىقتارىنىڭ ءبىرى. مۇندا 2502 ادام تىركەلگەن.

«مەن ءوزىم كوپ جىلدان بەرى سايلاۋ ۋچاسكەلەرىندە جاساپ ءجۇرمىن عوي. بايقاعانىم – وسى رەفەرەندۋم ەرەكشەلەۋ ءوتىپ جاتىر, ويتكەنى حالىقتىڭ بەلسەندىلىگى وتە جوعارى. مىسالى ءبىزدىڭ ۋچاسكەدە جارتى ساعاتتىڭ ىشىندە 100-گە جۋىق ادام كەلىپ, تاڭداۋ جاساپ ۇلگەردى», دەيدى اقساۋلە قوبىلاندىقىزى.

جانات تولەن ۇلى ەسىمدى داۋىس بەرۋشى ءدال بۇگىن 58 جاسقا تولىپ جاتىر ەكەن. ونىڭ كۋالىگىن كورگەن رەفەرەندۋم ۋچاسكەسى قىزمەتكەرلەرى تۋعان كۇن يەسىنە ءتاتتى سىيلىق تارتۋ ەتىپ ۇلگەردى.

كوپتەگەن ۋچاسكە ماڭىندا كوڭىلدى اۋەن ويناپ, كيىز ۇيلەر تىگىلىپ, قازان كوتەرىلىپ, وشاق جانىپ جاتقانىن بايقادىق. جالپى ورال قالاسىندا مەرەكەلىك كوڭىل-كۇي بايقالادى. ادامدار دوستىق راۋىشتە, ءبىر-بىرىمەن قول الىسىپ كورىسىپ, كەشە عانا باستالعان كورىسۋ – امال مەرەكەسىمەن ءبىرىن ءبىرى قۇتتىقتاپ جاتىر. قالا بيلىگى بۇگىن قوعامدىق كولىكتەر جولاۋشىلاردى تەگىن تاسىمالدايتىنىن حابارلاعان.

باتىس قازاقستان وبلىسى