«قازگيدرومەت» ەسكەرتكەندەي, استانادا بىرنەشە كۇن اۋا رايى كۇرت قۇبىلىپ, ەكپىنى قاتتى جەل جۇرتتى ابدەن ابىگەرگە سالدى. الەۋمەتتىك جەلىدە تاراعان بەينەجازبالاردىڭ ىشىنەن قالاداعى 9 قاباتتى تۇرعىن ءۇيدىڭ سىرتقى جابىندىسى وپىرىلىپ تۇسكەنى بارشانىڭ نازارىن اۋداردى. كوڭىلگە دەمەۋ بولاتىنى, زارداپ شەككەندەر جوق.
رەسمي اقپاراتتان بىلگەنىمىز, جابىندىسى ب ۇلىنگەن عيمارات «سارىارقا» اۋدانىنا قاراستى «ايكا» تۇرعىن ءۇي كەشەنى ەكەن. وقيعا 11 ناۋرىز كۇنى ساعات 17:00 شاماسىندا ورىن العان. عيماراتتىڭ جىلۋ وقشاۋلاعىش قاباتىنىڭ ءبىر بولىگى ءتۇسىپ قالعان. بەينەجازباداعى كادردان ءۇيدىڭ ءبىر ءبۇيىرى اشىلىپ, قالدىقتارى سالبىراپ ءىلىنىپ تۇرعانى بايقالادى. ونىڭ بۇزىلعان بولىكتەرى عيماراتتىڭ جانىنا, جىلۋ وقشاۋلاعىش پليتالار ءۇيدىڭ اۋلاسىنا قۇلاعان. مۇندايدا جوندەۋگە كەتەتىن قاراجات, شىعىننان بۇرىن قاۋىپسىزدىك جايى قاتتى الاڭداتادى. ءۇي 2015 جىلى سالىنعان. قۇرىلىسقا «الماتىقالاقۇرىلىس» كومپانياسى جاۋاپتى بولعان.
قالا اكىمدىگىنىڭ حابارلاۋىنشا, قازىر تۇرعىن ءۇي كەشەنىن باسقاراتىن كومپانيا جوندەۋ جۇمىسىنىڭ قۇنىن ەسەپتەپ, ب ۇلىنگەن جەردى قالپىنا كەلتىرۋگە ونەركاسىپتىك الپينيست تارتۋ ماسەلەسىن قاراستىرىپ جاتىر. «تۇرعىن ءۇي قاتىناستارى تۋرالى» زاڭنىڭ 34-بابىنا سايكەس, پاتەر يەلەرى كوندومينيۋمعا تيەسىلى ورتاق م ۇلىكتى كۇتىپ-ۇستاۋ مىندەتىن وزدەرى كوتەرەدى. زاڭنىڭ 2-بابىنىڭ 2-تارماعىنا سايكەس, مۇنداي ورتاق م ۇلىككە عيمارات قاسبەتى, كىرەبەرىستەر, ۆەستيبيۋلدەر, حولدار, دالىزدەر, باسپالداقتار مەن الاڭدار, ليفتىلەر, شاتىرلار, كىرەبەرىس توپتارىنىڭ قالقالارى, شاتىر استى, تەحنيكالىق قاباتتار, جەرتولەلەر, سونداي-اق ۇيگە ورتاق ينجەنەرلىك جۇيەلەر مەن جابدىقتار جاتادى», دەپ جازىلعان استانا قالاسى اكىمدىگىنىڭ ءباسپاسوز قىزمەتى ۇسىنعان اقپاراتتا.
ايتسا ايتقانداي, تۇرعىن ءۇي كەشەنىن باسقاراتىن كومپانيا جەدەل ىسكە كىرىسىپ, جوندەۋ جۇمىستارىنا كەتەتىن شىعىندى شامامەن ەسەپتەپ قويىپتى.
– وقىس وقيعادان سوڭ ءبىز ءوز تاراپىمىزدان بىردەن توڭىرەكتى قىزىل جىپپەن قورشاپ, تۇرعىندارعا ساق ءجۇرۋ كەرەگىن ەسكەرتتىك. ءۇيدىڭ سىرتقى جابىندىسىن جوندەۋ قۇزىرىمىزعا كىرمەيدى. تەك ءۇي ماڭىنان كۇل-قوقىس شىعارىپ, تازالاۋعا, سانتەحنيكالىق, ەلەكتريكتىك جۇمىستارعا عانا جاۋاپ بەرەمىز. شاعىمىمىزدى «الماتىقالاقۇرىلىس» كومپانياسىنا جولداعان ەدىك, بىراق ولار كەپىلدىك مەرزىمى وتكەنىن جەلەۋ ەتىپ, جوندەۋدەن باس تارتىپ وتىر. 2020 جىلى اتالعان تۇرعىن ۇيگە ىرگەلەس تاعى ءبىر ءۇيدىڭ ءبۇيىرى ءتۇسىپ, تۇرعىندار ءوز قاراجاتىنا سىلاعان ەدى. قازىر دە تۋرا سونداي جاعداي قايتالانىپ وتىر. دەمەك, كەلەڭسىزدىكتىڭ بىردەن-ءبىر سەبەبى – قۇرىلىس كومپانياسىنىڭ ساپاسىز جۇمىسى, – دەيدى «MSS-Servise» سەرىكتەستىگىنىڭ باسشىسى الما سالىقوۆا.
تۇرعىن ۇيگە جاۋاپتى كومپانيا الپينيست شاقىرىپ, جوندەۋگە كەتەتىن اقشانى ەسەپتەگەن ەكەن, 3 ملن تەڭگەنىڭ شاماسىندا شىعىپتى. ءۇيدىڭ تۇرعىنى گالينا لوگۆينەنكو 45 پاتەرلى ءۇي تۇرعىندارىنىڭ ول اقشانى بىردەن تۇگەل جيناۋعا مۇمكىندىگى جوق ەكەنىن ايتادى.
– تۇرعىن ءۇيدىڭ جىلۋ وقشاۋلاعىش پليتالارى ۇشقان سوڭ, سول ىرگەدەگى ۇيلەردىڭ ءىشى سۋي باستادى. وندا تۇراتىن كوپبالالى وتباسىلارعا, ەگدە جاستاعى كىسىلەرگە قيىن. ول ازداي, كوكتەمدە جاۋىن باستالسا, ىرگەدەگى ۇيلەر سىز تارتادى. سوندىقتان جوندەۋ جۇمىستارىن ەرتە باستاماساق, سالدارى اۋىر بولۋى مۇمكىن. قازىر قالا اكىمدىگىنەن تۇرعىن ءۇي جوندەۋ باعدارلامالارىنا قاتىسۋعا سۇرانىپ وتىرمىز, – دەيدى گ.لوگۆينەنكو.
بىلتىر قاراشادا استاناداعى كوپپاتەرلى ۇيلەردىڭ ءبىرىنىڭ قاسبەتى سوگىلىپ, بىرنەشە ادام زارداپ شەككەن ەدى. ولاردىڭ اراسىندا 23 جاستاعى فەلدشەر ۇلدانا مىرزۋان اپاتتى جاعدايعا قاراماستان, زارداپ شەككەندەرگە العاشقى كومەك كورسەتىپ جاتقان ساتتە اۋىر جاراقات الىپ, باقيلىق بولدى. وقيعا تۇگەل زەرتتەلىپ, جاۋاپتىلار جازاعا تارتىلعانىمەن, ادامنىڭ ورنىن ەشكىم تولتىرا المايدى. جالپى, قۇرىلىس بارىسىندا وندىرىستىك جاراقات الىپ, سوڭى قايعىلى اياقتالعان وقيعالار ءجيى كەزدەسەدى. قۇرىلىسشىلار قاۋىمداستىعىنىڭ پرەزيدەنتى ۆيكتور ميكريۋكوۆ:
– «ايكا» تۇرعىن ءۇي كەشەنىنە قاتىستى تەحنيكالىق تەكسەرىس جۇرگىزگەن ءجون. ياعني ءۇيدىڭ ءبۇيىرى ناقتى نەدەن ب ۇلىنگەنىن انىقتاپ الۋ قاجەت. ەگەر ونىڭ سەبەبى قۇرىلىس بارىسىندا ەسكەرمەگەن شامادان تىس, دولى جەلدىڭ سالدارىنان بولسا, وعان جەرگىلىكتى اكىمدىك ارالاسۋعا ءتيىس. ال بارلىق ماسەلە جوبالاۋ كەزىندەگى قاتەلىكتەردەن نەمەسە قۇرىلىس ساپاسىنان بولسا, وندا سۇراقتى جوبالاۋشى-لارعا, قۇرىلىس كومپانياسىنا قويعان دۇرىس. ءۇيدىڭ قاسبەتىنە كەپىلدىك مەرزىمى بۇعان دەيىن 2 جىل ەدى, جاڭا قۇرىلىس كودەكسى اياسىندا 10 جىلعا دەيىن ۇزارتىلماقشى. قابىلدانىپ جاتقان وزگەرىستەردىڭ ناتيجەسى ناقتى قالاي بولارىن ۋاقىت كورسەتەدى, – دەيدى.
ءبىر سوزبەن ايتقاندا, جاڭا قۇرىلىس كودەكسىندەگى وزگەرىستەر سالاداعى ءبىراز ولقىلىقتى رەتتەيدى دەگەن ءۇمىت باسىم. قۇرىلىس بارىسى جوسپارلانعان ساتتەن قاتاڭ باقىلاۋدا بولسا, قاۋىپسىزدىك كۇشەيسە, ولقىلىققا جول بەرگەن كومپانيالارعا دەر كەزىندە شارا قولدانىلسا وقىس وقيعالار تۋىنداماس ەدى.