الماتىدا ادەبيەت سىنشىسى, پۋبليتسيست, كومپوزيتور تۇرسىنجان شاپاي تۋرالى «qonyr media group» تۇسىرگەن «تاۋدان تۇسكەن ساۋلە» اتتى دەرەكتى ءفيلمنىڭ كورسەتىلىمى ءوتتى. تۋىندى كەيىپكەر تاعدىرى ارقىلى تۋعان جەرگە دەگەن ساعىنىشتىڭ, ۇلتتىق جادى مەن رۋحاني تامىردىڭ تەرەڭدىگىن بەينەلەيدى.
ء«تاڭىرىنىڭ قۇدىرەتىن تانىعىڭ كەلسە, تاۋعا شىق» دەمەۋشى مە ەدى. تاۋ شىڭدارىندا جەر-دەگى ۇساق-تۇيەك ماسەلە-لەردەن ارىلىپ, جانىڭا قۋات تاباسىڭ. فيلم كەيىپكەرى دە جان داۋاسىن تۋعان جەر باۋرايىنداعى اسقاق شىڭداردان, جازيرا جوتالاردان ىزدەيدى.
«تاۋعا كەلگەندە تۇندە جۇلدىزعا, كۇندىز كۇنگە جاقىنداعانداي كۇي كەشەسىڭ. ءبىتىپ بولماس بار قامىڭدى, مازاسىز تىرلىكتەگى ۇساق-تۇيەك بار كەيىس, وكپە-رەنىشىڭدى, ءتىپتى وسى ساتكە دەيىنگى بار عۇمىرىڭدى اسقارلاردىڭ ار جاعىندا, ءتۇۋ تومەندە مۇنارتقان شىڭىراۋ ەتەگىندە قالدىرىپ, كوك پەن جەردىڭ شەگىندە تۇرعان مىنا بيىككە جانىڭدى نۇرمەن شايعانداي سەرگىپ, سەرپىلىپ شىعاسىڭ», دەپ تەبىرەنەدى كەيىپكەر.
تەكەس وزەنىنىڭ باستاۋىندا تۇسىرىلگەن تۋىندى كورەرمەندى جەتىسۋدىڭ تۇمسا تابيعاتىنا تامساندىرىپ, ادام مەن تۋعان توپىراق اراسىنداعى كورىنبەس بايلانىسقا وي جۇگىرتەدى. شۇبارتال, كوككەمەر, بەلتوبە جايلاۋى, لاباسى سەكىلدى جەر اتاۋلارى ارقىلى تابيعات پەن تاعدىر, تاريح پەن تۇلعا ءبىر ارنادا توعىسقان.
فيلمدە تۇرسىنجان شاپايدىڭ رۋحاني قالىپتاسۋىنا اسەر ەتكەن اكەسى مۇقان اقساقالدىڭ اباي ولەڭدەرىن جاتقا ايتۋى, «ابايدى وقى» دەگەن وسيەتى دە ەرەكشە ماعىنامەن كورىنىس تابادى. بۇل – ابايتانۋدىڭ عانا ەمەس, ۇرپاقتان-ۇرپاققا جالعاسقان ۇلتتانۋدىڭ دا ايقىن ۇلگىسى. تاۋدىڭ بيىگىنەن ادام ءوز ومىرىنە, ءوز بولمىسىنا باسقا قىرىنان قارايتىنى تۋرالى كەيىپكەر تولعانىسى كورەرمەندى دە تەرەڭ ويعا جەتەلەيدى. وسى تۇرعىدان العاندا فيلم – تۇلعاتانۋ شەڭبەرىنەن اسىپ, قازاق دالاسىنىڭ رۋحاني كەڭىستىگىن تانىتقان كوركەم بەينەەسسە ىسپەتتى.
فيلم اۆتورى جانە رەجيسسەرى – سەرجان مولداسان ۇلى, قويۋشى-رەجيسسەر – اتلان ب ۇلىباەۆ, رەداكتورى – اياگۇل رامازانقىزى, وپەراتورلارى – اسحات داۋرەنبەكوۆ, ارسەن ساندىباەۆ, نۇرالي باقىت, پروديۋسسەرى – گۇلزات قارعاباەۆا, اكىمشى – ماحاببات قۇرمانعالي.
كورسەتىلىم بارىسىندا قوعام قايراتكەرى نۇرلان ورازالين تۋىندى ەل مەن جەردىڭ رۋحىن سويلەتكەنىن اتاپ ءوتتى. سونداي-اق پارلامەنت سەناتىنىڭ توراعاسى ماۋلەن اشىمباەۆتىڭ تۇرسىنجان شاپايعا ارناعان لەبىز حاتى تابىستالدى. شىنىندا دا, «تاۋدان تۇسكەن ساۋلە» تابيعاتتىڭ اسقاق كوركى ارقىلى حالىقتىڭ تاريحي جادىن, ادامگەرشىلىك پەن تازالىق سەكىلدى ماڭگىلىك قۇندىلىقتاردى جاڭعىرتقان رۋحاني دۇنيە. بۇگىنگى قاربالاس زاماندا مۇنداي تۋىندىلار ادامدى ءوزىنىڭ ءتۇپ-تامىرىنا, تۋعان جەردىڭ بيىك بولمىسىنا قايتا ۇڭىلۋگە شاقىراتىنداي.
الماتى