استانا قالاسىندا 5 ناۋرىزداعى جاعداي بويىنشا 60 393 سالىق تولەۋشىنىڭ جەكە تۇلعالاردىڭ كولىك جانە م ۇلىك سالىقتارى بويىنشا 3 ملرد 89 ملن تەڭگە كولەمىندە سالىقتىق بەرەشەگى بار. بۇل تۋرالى ەلوردانىڭ كوممۋنيكاتسيالار قىزمەتىندە وتكەن بريفينگتە استانا قالاسى بويىنشا مەملەكەتتىك كىرىستەر دەپارتامەنتىنىڭ وندىرىستىك ەمەس تولەمدەر باسقارماسىنىڭ باسشىسىنىڭ مىندەتىن اتقارۋشى التىنگۇل توقaەۆا ءمالىم ەتتى, دەپ حابارلايدى Egemen.kz قالا اكىمدىگىنىڭ سايتىنا سىلتەمە جاساپ.
سپيكەردىڭ ايتۋىنشا, ونىڭ ىشىندە نەگىزگى بولىگى جەكە تۇلعالاردىڭ كولىك قۇرالدارى سالىعىنا تيەسىلى - 2 ملرد 750 ملن تەنگە. بۇل اتالعان سالىق ءتۇرىن ۋاقتىلى تولەۋ بويىنشا اقپاراتتىق-ءتۇسىندىرۋ جۇمىستارىن كۇشەيتۋ قاجەتتىگىن كورسەتەدى.
قازاقستان رەسپۋبليكاسىنىڭ سالىق كودەكسىنىڭ 563-بابىنا سايكەس, كولىك قۇرالدارى سالىعىن تولەۋشىلەر – مەنشىگىندە سالىق سالۋ وبەكتىلەرى بار جەكە تۇلعالار.
ال سالىق كودەكسىنىڭ 564-بابىنا سايكەس, قازاقستان رەسپۋبليكاسىنىڭ اۋماعىندا تىركەلگەن جانە (نەمەسە) ەسەپتە تۇرعان كولiك قۇرالدارى (تىركەمەلەردى قوسپاعاندا) سالىق سالۋ وبەكتىلەرى بولىپ تابىلادى.
«جەكە تۇلعالار كولىك سالىعىن سالىق تولەۋشىنىڭ تۇرعىلىقتى جەرى بويىنشا ەسەپتى سالىقىقتىڭ كەزەڭىنەن كەيىنگى جىلدىڭ 1 ساۋىرىنەن كەشىكتىرمەي تولەۋگە ءتيىس. سالىقتى ەسەپتەۋ كەزەڭى – كۇنتىزبەلىك جىل, ياعني 1 قاڭتاردان 31 جەلتوقسانعا دەيىن ارالىعىنداعى كۇنتىزبەلىك جىل كولiك قۇرالدارى سالىعىن ەسەپتەۋ ءۇشىن سالىقتىق كەزەڭ بولىپ تابىلادى (قر سالىق كودەكسىنىڭ 568-بابى).
ايتا كەتۋ كەرەك, كولىك قۇرالدارى سالىعىن ەسەپتەۋدى جەكە تۇلعالار وزدەرى جۇرگىزەدى. سونىمەن قاتار سالىق ورگاندارى ەسەپتى جىلدان كەيىنگى جىلدىڭ 1 ساۋىرىندە سالىقتى ەسەپتەپ, وسىدان كەيىن تولەۋگە قاتىستى اقپارات سالىق تولەۋشىلەرگە قولجەتىمدى بولادى. سالىق تولەنبەگەن جاعدايدا جانە بەرەشەك پايدا بولعان كەزدە سالىق ورگانى سالىق تولەۋشىگە حابارلاما جىبەرەدى.
سالىق كودەكسىنىڭ 83-بابىنا سايكەس, حابارلاما الىنعاننان كەيىن ازاماتقا بەرەشەكتى ەرىكتى تۇردە وتەۋ ءۇشىن 30 جۇمىس كۇنى بەرىلەدى. وسىلايشا, قولدانىستاعى سالىق زاڭناماسى بەرەشەكتى ماجبۇرلەپ ءوندىرىپ الۋ شارالارىن قولدانباي تۇرىپ, ونى ەرىكتى تۇردە تولەۋگە مۇمكىندىك بەرەدى.
ەگەر بەرەشەك تولىق نەمەسە ءىشىنارا وتەلمەسە جانە ونىڭ مولشەرى 1 ايلىق ەسەپتىك كورسەتكىشتەن (اەك) اسسا, حابارلاما تابىس ەتىلگەن كۇننەن باستاپ 30 جۇمىس كۇنى وتكەن سوڭ سالىق ورگانى بەرەشەكتى ءوندىرىپ الۋ تۋرالى سالىق بۇيرىعىن شىعارادى (قر سالىق كودەكسىنىڭ 190-بابى). ودان ءارى تولەم جاسالماعان جاعدايدا سالىق بۇيرىعى 5 جۇمىس كۇنى ىشىندە ماجبۇرلەپ ورىنداتۋ ءۇشىن اتقارۋشىلىق ءىس جۇرگىزۋ ورگاندارىنا جولدانادى», دەيدى التىنگۇل توقaەۆا.
سالىق بۇيرىعى اتقارۋشىلىق ءىس جۇرگىزۋ ورگاندارىنا جىبەرىلگەننەن كەيىن بەرەشەكتى سوت ورىنداۋشىلارى ءوندىرىپ الادى. بۇل رەتتە سوت ورىنداۋشىسىنىڭ قىزمەتى ءۇشىن تولەم ءوندىرىپ الىناتىن سومانىڭ 25%-ىنا دەيىن جەتۋى مۇمكىن, بۇل بەرەشەك كولەمىن ەداۋىر ارتتىرادى.
«اتقارۋشىلىق ءىس جۇرگىزۋ جانە سوت ورىنداۋشىلارىنىڭ مارتەبەسى تۋرالى» قازاقستان رەسپۋبليكاسىنىڭ زاڭىنا سايكەس, بورىشكەرلەرگە ماجبۇرلەپ ءوندىرىپ الۋ شارالارى قولدانىلۋى مۇمكىن. اتاپ ايتقاندا, بانكتىك شوتتارعا جانە م ۇلىككە تىيىم سالۋ; م ۇلىككە بيلىك ەتۋگە شەكتەۋ قويۋ; جىلجىمالى جانە جىلجىمايتىن م ۇلىكتى الىپ قويۋ; قۇقىق بەلگىلەيتىن قۇجاتتاردى تاركىلەۋ.
سونىمەن قاتار بەلگىلى ءبىر ارەكەتتەر جاساۋعا شەكتەۋ قويىلۋى, م ۇلىكتى مورلەۋ جانە ءۇشىنشى تۇلعالارعا بورىشكەرگە اقشا نەمەسە م ۇلىك بەرۋگە تىيىم سالۋ شارالارى قولدانىلۋى مۇمكىن.
«ەگەر بەرەشەك ءۇش ايدان استام ۋاقىت وتەلمەسە جانە ونىڭ مولشەرى 40 اەك-تەن اسسا, ازاماتتىڭ قازاقستان رەسپۋبليكاسىنان تىس جەرگە شىعۋىنا ۋاقىتشا شەكتەۋ قويىلۋى مۇمكىن.
كولىك قۇرالدارى سالىعىن ۋاقىتىلى تولەۋ بەرەشەكتىڭ پايدا بولۋىنا, ءىستىڭ سوت ورىنداۋشىلارىنا بەرىلۋىنە جانە قوسىمشا قارجىلىق شىعىنداردىڭ تۋىنداۋىنا جول بەرمەيدى. سالىق ورگاندارى ازاماتتارعا سالىق مىندەتتەمەلەرىنىڭ بار-جوعىن الدىن الا تەكسەرىپ, تولەمدەردى ۋاقىتىلى جۇرگىزۋدى ۇسىنادى.
سالىق مىندەتتەمەلەرىن ورىنداۋ – قارجىلىق ءتارتىپتىڭ ماڭىزدى ەلەمەنتى. بۇل بيۋدجەتكە تۇسەتىن قاراجاتتىڭ تۇراقتىلىعىن قامتاماسىز ەتىپ, قالالىق ينفراقۇرىلىمدى دامىتۋ مەن الەۋمەتتىك باعدارلامالاردى ىسكە اسىرۋعا باعىتتالادى», دەيدى سپيكەر.