ەلىمىزدە مادەني-بۇقارالىق جانە سپورتتىق ءىس-شارالاردا قوعامدىق ءتارتىپتى قامتاماسىز ەتۋ ءۇشىن ۇيىمداستىرۋشىلارعا جەكە كۇزەت ۇيىمدارىن تارتۋعا مۇمكىندىك بەرەتىن نورمالار قابىلداندى. بۇل تۋرالى ءماجىلىس دەپۋتاتى ولجاس قۇسپەكوۆ الەۋمەتتىك جەلىدەگى پاراقشاسىندا حابارلادى, دەپ جازادى Egemen.kz.
دەپۋتاتتىڭ ايتۋىنشا, بۇل وزگەرىستەر كونتسەرتتەر مەن سپورتتىق ماتچتار سياقتى كوممەرتسيالىق ءىس-شارالارعا پوليتسيا كۇشىنىڭ كوپتەپ تارتىلۋىنا بايلانىستى قالىپتاسقان تاجىريبەنى وزگەرتۋگە مۇمكىندىك بەرەدى.
«بۇگىندە مادەني-بۇقارالىق جانە سپورتتىق ءىس-شارالاردا قوعامدىق ءتارتىپتى قامتاماسىز ەتۋ ءۇشىن جەكە كۇزەت ۇيىمدارىن تارتۋعا مۇمكىندىك بەرەتىن نورمالار قابىلداندى. بۇل الداعى ۋاقىتتا, مىسالى, ەنريكە يگلەسياس كونتسەرتى كەزىندە ىشكى ىستەر مينيسترلىگى قىزمەتكەرلەرىن تارتۋ مىندەتتى بولمايتىنىن بىلدىرەدى», دەپ جازدى ولجاس قۇسپەكوۆ.
الماتىداعى دجەننيفەر لوپەستىڭ كونتسەرتى قانشا تابىس اكەلدى
ونىڭ ايتۋىنشا, بۇعان دەيىن كوممەرتسيالىق ءىس-شارالاردا ءتارتىپتى ساقتاۋ ءۇشىن مىڭداعان پوليتسيا قىزمەتكەرى جۇمىلدىرىلىپ كەلگەن. سونىڭ ايقىن مىسالى − دجەننيفەر لوپەس كونتسەرتى. بۇل شارادا قوعامدىق قاۋىپسىزدىكتى قامتاماسىز ەتۋ ءۇشىن ءىىم قىزمەتكەرلەرى مەن اسكەري قىزمەتشىلەردەن 3500-دەن استام ادام تارتىلعان.
دەپۋتات كەلتىرگەن مالىمەتكە سايكەس, تەك 2024-2025 جىلدارى ىشكى ىستەر ورگاندارى 5 مىڭنان استام بۇقارالىق ءىس-شارانىڭ قاۋىپسىزدىگىن قامتاماسىز ەتكەن. ءاربىر شاراعا جۇزدەگەن پوليتسيا قىزمەتكەرى جۇمىلدىرىلعان.
ال مۇنداي ءىس-شارالارعا جۇمىلدىرىلاتىن پوليتسيا رەسۋرستارىنىڭ جىل سايىنعى شىعىنى 8-16 ملرد تەڭگە شاماسىندا باعالانادى. ياعني ءىس جۇزىندە بۇل شىعىنداردى مەملەكەت كوتەرىپ كەلدى, ال كوممەرتسيالىق ءىس-شارالاردى ۇيىمداستىرۋشىلار تابىس تاۋىپ وتىردى.
دجەننيفەر لوپەستىڭ كونتسەرتى استاناعا 12 مىڭ شەتەلدىك تۋريست اكەلگەن
سونىمەن قاتار قازاقستاندا جەكە كۇزەت قىزمەتىنىڭ دامىعان جۇيەسى قالىپتاسقان. قازىر ەلدە 4 مىڭعا جۋىق جەكە كۇزەت ۇيىمى جانە 100 مىڭعا جۋىق ليتسەنزيالانعان كۇزەتشى جۇمىس ىستەيدى. ەندى زاڭناما بۇقارالىق ءىس-شارالاردا قوعامدىق ءتارتىپتى قامتاماسىز ەتۋ ءۇشىن مۇنداي كومپانيالاردى شارت نەگىزىندە تارتۋعا ناقتى مۇمكىندىك بەرەدى.
جاڭا مودەل رەسۋرستاردى ءتيىمدى قايتا بولۋگە جول اشادى. ءىس-شارا ۇيىمداستىرۋشىلارى ءوز شارالارىنىڭ قاۋىپسىزدىگىنە جاۋاپ بەرەدى, جەكە كۇزەت كومپانيالارى بۇل جۇمىستى كاسىبي دەڭگەيدە اتقارادى, ال پوليتسيا كوشەلەردى پاترۋلدەۋگە جانە قىلمىستىڭ الدىن الۋعا كوبىرەك كوڭىل بولەدى.
ولجاس قۇسپەكوۆ بۇل نورمالاردىڭ قابىلدانۋى قولدانىستاعى تاجىريبەنى وزگەرتۋگە باعىتتالعان جۇيەلى جۇمىستىڭ ناتيجەسى ەكەنىن اتاپ ءوتتى. ونىڭ سوزىنشە, ەندى بۇل وزگەرىستەر ءىس جۇزىندە ىسكە اسا باستايدى.