شالقار اۋدانىنىڭ ورتالىعىندا ۆ.ن.تسەحانوۆيچ اتىنداعى سپورت كەشەنى اشىلدى. بوكس, دزيۋدو, گرەك-ريم كۇرەسى سياقتى وليمپيادالىق سپورت تۇرلەرىمەن ءبىر مەزەتتە جۇزدەن استام بالا جاتتىعۋعا لايىقتالعان بىرنەشە زالى, كيىم اۋىستىراتىن بولمەلەرى مەن 300 ورىندىق تريبۋناسى بار جاڭا كەشەن اشىلعانىنا جۇرتشىلىق قاتتى قۋاندى.
وسىعان دەيىن بالالار 1904 جىلى ورىنبورتاشكەنت تەمىرجولى وتكىزىلگەن كەزدە سالىنعان ەسكى عيماراتتا جاتتىعىپ كەلگەن. اۋداندا سپورتقا قۇشتار جاس كوپ بولعانىمەن, اۋماعى 300 شارشى مەتردەن اسپايتىن ەسكى عيماراتقا ولاردىڭ ءبارىن سىيعىزۋ مۇمكىن ەمەس ەدى. بۇل جايىندا 2023 جىلى وبلىس اكىمى اسحات شاحاروۆ شالقار اۋدانىنا كەلگەن ساپارىندا №1 بالالار مەن جاسوسپىرىمدەر سپورت مەكتەبى تاربيەلەنۋشىلەرىنىڭ اتا-انالارى قۇلاققاعىس ەتكەن ەدى. كوپ كەشىكپەي جاڭا كەشەن قۇرىلىسى باستالىپ, ءۇش جىلعا جەتەر-جەتپەس ۋاقىتتا پايدالانۋعا بەرىلدى.
سالتاناتتى ءىس-شاراعا سامارا قالاسىنان ارنايى كەلگەن ۆلاديمير تسەحانوۆيچتىڭ قىزى ەلەنا تسەحانوۆيچ شالقار اۋدانى تۇر-عىندارىنىڭ 1970–1990 جىلدارى تالانتتى سپورتشى تاربيەلەگەن اكە ەسىمىن ۇمىتپاي وتىرعاندارىنا ريزاشىلىعىن ءبىلدىردى. بۇل جەردە ۆلاديمير تسەحانوۆيچ مەكتەپ وقۋشىلارىن گرەك-ريم كۇرەسىنە باۋلىپ, تالاي تالانتتى سپورتشىلاردى تاربيەلەپ شىعاردى. ولاردىڭ اراسىنان مارقۇم ەسەنگەلدى باتىرعارين وزىپ شىعىپ, كسرو حالىقتارى سپارتاكياداسىنىڭ بەس دۇركىن چەمپيونى بولدى. وسى مەكتەپتىڭ ىزگى ءداستۇرىن كەيىن قازاقستاننىڭ ەڭبەك سىڭىرگەن سپورت شەبەرى, وليمپيادا ويىندارىنىڭ قاتىسۋشىسى مەيرامبەك ايناعۇلوۆ پەن الەم چەمپيونى قۋانىشبەك جاڭاجول جالعاستىردى.
جاڭا دا زاماناۋي جابدىقتالعان كەشەنگە حالىقارالىق سا-يىستاردا ەلىمىزدىڭ كوك بايراعىن جەلبىرەتەتىن تالانتتى دا, تالاپتى بالالار كوپتەپ كەلەدى دەگەن سەنىم بار.
اقتوبە وبلىسى