اۋا رايىنىڭ كۇرت ناشارلاۋىنا بايلانىستى اقتوبە وبلىسىنىڭ تاسجولدارىندا كولىك قوزعالىسىنا شەكتەۋ قويىلدى, دەپ حابارلايدى Egemen.kz.
سونىڭ ىشىندە رەسپۋبليكالىق ماڭىزى بار اقتوبە – اتىراۋ, اقتوبە – ورال, سامارا – شىمكەنت (قارابۇتاق ەلدىمەكەنىنە دەيىنگى اۋماعىندا), اقتوبە – قوستاناي (قارابۇتاقتان قوستاناي وبلىسىنا دەيىن) تاسجولدارى مەن مارتوك, حرومتاۋ, تەمىر, قارعالى اۋداندارىنا باراتىن جولدار قاتتى بورانعا بايلانىستى ۋاقىتشا جابىلدى.
سونداي-اق وتكەن تۇندە اۋا تەمپەراتۋراسى 25 گرادۋسقا دەيىن تومەندەگەن كەزدە اقتوبە وبلىسىنىڭ پوليتسيا قىزمەتكەرلەرى رەسپۋبليكالىق ماڭىزى بار تاسجولداردا كەزەكشىلىككە شىقتى.
تۇندە ايتەكە بي اۋدانى قارابۇتاق اۋىلىنىڭ تۇسىندا تاجىكستاننان رەسەيگە باعىت العان اۆتوبۋستىڭ جاعارمايى قاتتى سۋىقتان قاتىپ, جولدا توقتاپ قالعاندا, پوليتسيا قىزمەتكەرلەرى كومەككە كەلدى. اۆتوبۋستاعى 34 تاجىك ازاماتىن جاقىن جەردەگى كەمپينگە ورنالاستىرىپ, اياز بەن بوران باسىلعانشا ۋاقىتشا پانالاۋعا مۇمكىندىك جاسادى.
دەر كەزىندە قۇتقارىلعاندىقتان, جولاۋشىلاردىڭ ەشقايسىسىنىڭ ۇسىك شالۋى تىركەلگەن جوق. پوليتسيا دەپارتامەنتى جۇرگىزۋشىلەرگە الىس جولعا شىعار الدىندا اۋا رايىنىڭ وزگەرىسىنە قاتىستى حابارلاماعا نازارعا سالۋدى ەسكەرتەدى.
ايتا كەتەيىك, سولتۇستىك قازاقستان وبلىسىندا اۋا رايىنىڭ كۇرت ناشارلاۋىنا بايلانىستى بارلىق باعىتتاعى جولدار جابىلدى.