سولتۇستىك قازاقستان وبلىسىنا جۇمىس ساپارىمەن بارعان سەنات توراعاسى ماۋلەن اشىمباەۆ ءوڭىر جۇرتشىلىعىمەن جانە كاسىپورىن جۇمىسشىلارىمەن كەزدەسىپ, جاڭا كونستيتۋتسيا جوباسىنىڭ نەگىزگى ەرەجەلەرىن تالقىلادى.
كەزدەسۋلەردە كونستيتۋتسيالىق نورمالاردى ىسكە اسىرۋ تەتىكتەرى, مەملەكەت باسشىسىنىڭ تاپسىرمالارىن ورىنداۋ ماسەلەلەرى جانە ايماقتىڭ الەۋمەتتىك-ەكونوميكالىق دامۋ باعدارى ءسوز بولدى. «جاڭا كونستيتۋتسيا – ۇزاقمەرزىمدى دامۋدىڭ بەرىك نەگىزى» تاقىرىبىنا ارنالعان ديالوگكە ءماسليحات دەپۋتاتتارى, ەتنومادەني بىرلەستىكتەردىڭ وكىلدەرى, بەلسەندى جاستار جانە جەرگىلىكتى كاسىپورىنداردىڭ ەڭبەك ۇجىمدارى قاتىستى. سەنات توراعاسى ەلىمىزدىڭ الدىندا تۇرعان ستراتەگيالىق ماقساتتارعا قول جەتكىزۋ ءۇشىن ازاماتتىق قوعام ينستيتۋتتارىنىڭ بىرلەسكەن جۇمىسى ايرىقشا ماڭىزعا يە ەكەنىن اتاپ ءوتتى.
ماۋلەن اشىمباەۆ قازىر قازاقستان اۋقىمدى ساياسي جاڭعىرۋ كەزەڭىن باستان وتكەرىپ جاتقانىن ايتتى. پالاتا سپيكەرى وسىعان بايلانىستى ءوڭىر تۇرعىندارىمەن قوعامداعى وزەكتى ماسەلەلەر بويىنشا تىكەلەي كەرى بايلانىس ورناتۋ ءۇشىن اشىق ديالوگ جۇرگىزۋدىڭ جانە مەملەكەت باسشىسى ۇسىنعان رەفورمالاردى ءتيىمدى جۇزەگە اسىرۋ جولىندا بىرلەسىپ جۇمىس ىستەۋدىڭ ماڭىزى زور ەكەنىن جەتكىزدى.
«قازىر ەلىمىز, ەشبىر اسىرەلەۋسىز, ءوزىنىڭ دامۋ جولىنداعى ناعىز تاريحي كەزەڭدى باستان وتكەرىپ جاتىر. كەيىنگى جىلدارى ءبىز تاۋەلسىز مەملەكەت قالىپتاستىرىپ, تۇراقتى دامۋدىڭ بەرىك نەگىزىن قالادىق. بۇگىندە پرەزيدەنت قاسىم-جومارت توقاەۆتىڭ باستامالارىنىڭ ارقاسىندا ەكونوميكامىزدى, ءوندىرىس پەن كاسىپكەرلىكتى جۇيەلى تۇردە دامىتىپ كەلەمىز. ادام كاپيتالىن دامىتۋعا دا ەرەكشە كوڭىل ءبولىنىپ, عىلىم مەن بىلىمگە اۋقىمدى ينۆەستيتسيا سالىنىپ جاتىر. وسى تۇرعىدا قۇقىقتىق جانە ينستيتۋتسيونالدىق جۇيەمىزدى جاڭارتۋ قاجەتتىگى ايرىقشا مانگە يە بولىپ وتىر. ءبىز ونى جاڭا مىندەتتەرگە, الداعى ونجىلدىقتاردا الەمدىك دامۋدى ايقىندايتىن ۇدەرىستەرگە بەيىمدەۋىمىز كەرەك. سوندىقتان جاڭا كونستيتۋتسيا جوباسى – ەڭ الدىمەن, جاڭا سىن-قاتەرلەرگە بەرىلگەن جاۋاپ. بۇل – جاھاندىق تۇراقسىزدىق جاعدايىندا ەلىمىزدىڭ ءارى قاراي سەرپىندى, تۇراقتى دامۋىن قامتاماسىز ەتۋگە ارنالعان جانە الدىن الا جاسالعان ماڭىزدى قادام», دەدى ماۋلەن اشىمباەۆ.
سونداي-اق سەنات توراعاسى جاڭا كونستيتۋتسيا جوباسىنىڭ نەگىزگى باعىتتارىنا توقتالىپ, بۇل قۇجاتتى مەملەكەتتى دامىتۋدىڭ ۇزاقمەرزىمدى باعدارى جانە ساياسي جۇيەنى كەشەندى جاڭعىرتۋدى كوزدەيتىن ماڭىزدى تەتىك دەپ اتادى. ونىڭ ايتۋىنشا, ۇسىنىلىپ وتىرعان وزگەرىستەر مەملەكەتتىك ينستيتۋتتاردى جان-جاقتى جاڭعىرتىپ, زامان تالاپتارىنا جەدەل بەيىمدەلەتىن يكەمدى مەملەكەتتىك جۇيە قالىپتاستىرۋعا مۇمكىندىك بەرەدى.
«جاڭا اتا زاڭ جوباسى كۇشتى ءارى قۇزىرەتتى پارلامەنت, ءتيىمدى ءارى ناتيجەلى ۇكىمەت جانە تاۋەلسىز ءارى اشىق سوت جۇيەسىن قالىپتاستىرۋعا جول اشادى. ساياسي پارتيالاردىڭ ءرولى كۇشەيىپ, كونسۋلتاتيۆتىك ينستيتۋتتار داميدى. سونداي-اق ءماسليحاتتاردىڭ ىقپالى ارتىپ, ورتالىق پەن وڭىرلەر اراسىنداعى ءوزارا ءىس-قيمىلدىڭ ءتيىمدى جۇيەسى قۇرىلادى. مۇنىڭ ءبارى ءارتۇرلى الەۋمەتتىك جانە ەتنوستىق توپتاردىڭ پىكىرىن ەسكەرە وتىرىپ, مەملەكەتكە ۋاقتىلى ءارى سالماقتى شەشىم قابىلداۋعا مۇمكىندىك بەرەدى», دەي كەلە سەنات توراعاسى ءوڭىر تۇرعىندارىمەن كەزدەسۋدە الداعى كەزەڭدە بىرلەسىپ اتقاراتىن جۇمىستىڭ نەگىزگى باعىتتارىنا نازار اۋداردى.
وبلىستىڭ بەلسەندى جاستارىمەن كەزدەسۋدە ماۋلەن اشىمباەۆ كونستيتۋتسيالىق وزگەرىستەر جاس بۋىنعا ءوز الەۋەتتەرىن جۇزەگە اسىرۋعا مول مۇمكىندىك بەرەتىنىن ايتتى. سونىمەن قاتار ول مەملەكەتتىك باستامالاردىڭ تابىستى جۇزەگە اسىرىلۋى, ەڭ الدىمەن, ازاماتتىق جاۋاپكەرشىلىككە جانە جاستاردىڭ ەلدىڭ قوعامدىق ومىرىنە بەلسەندى قاتىسۋىنا تىكەلەي بايلانىستى ەكەنىن اتاپ ءوتتى.
«جاڭا كونستيتۋتسيا جاستارعا ۇلكەن مۇمكىندىكتەر كەڭىستىگىن ۇسىنادى. ونىڭ نەگىزىندە ادىلەتتىلىك, زاڭ ۇستەمدىگى جانە تەڭ مۇمكىندىكتەر قاعيداتتارى جاتىر. بۇل – ءاربىر جاس ازامات ءوزىنىڭ ءبىلىمىنىڭ, ەڭبەگىنىڭ جانە باستاماشىلدىعىنىڭ ارقاسىندا الەۋەتىن تولىق جۇزەگە اسىرا الاتىن جاعداي دەگەن ءسوز. اتا زاڭ جوباسىندا ءبىلىم, عىلىم, مادەنيەت جانە يننوۆاتسيانى دامىتۋعا ارنالعان باسىمدىقتار بەكىتىلىپ, شىعارماشىلىق ەركىندىك پەن زياتكەرلىك مەنشىكتى قورعاۋ كەپىلدىكتەرى قاراستىرىلعان. ياعني دارىندى, ءبىلىمدى ءارى باستاماشىل جاستاردى قولداۋ ەل دامۋىنىڭ ستراتەگيالىق باسىمدىعىنا اينالادى. بۇل رەتتە جاستاردىڭ ءوز جاۋاپكەرشىلىگىن تەرەڭ سەزىنىپ, قازىرگى تاريحي وزگەرىستەردىڭ اۋقىمىن ءتۇسىنىپ, ەلدىڭ قوعامدىق ومىرىنە بەلسەندى ارالاسۋى اسا ماڭىزدى», دەدى سەنات توراعاسى.
سونىمەن قاتار ساپار بارىسىندا ماۋلەن اشىمباەۆ «زيكستو» جشس ۆاگون جاساۋ زاۋىتىنىڭ جانە قاعاز ونىمدەرىن شىعاراتىن «ريم-قازاگرو» فابريكاسىنىڭ ەڭبەك ۇجىمدارىمەن كەزدەستى. بۇدان بولەك پارلامەنت دەپۋتاتتارى «ماعجان ورتالىعىنىڭ» جانە پەتروپاۆل قالاسىنداعى ەرەكشە قاجەتتىلىكتەرى بار بالالارعا ارنالعان №2 كوررەكتسيالىق مەكتەبىنىڭ قىزمەتىمەن تانىستى. سونداي-اق اتالعان وقۋ ورنىنىڭ ۇستازدارىمەن, «Sensitive» ەستۋ قابىلەتى تومەن بيشىلەر انسامبلىمەن جانە ءوڭىردىڭ باسشىلارىمەن كەزدەستى.