ديماش دەسە «دايديداۋ» ءانى, «دايديداۋ» دەسە ديماش ەسىمى قاتار اتالاتىنى بەلگىلى. قايبىر جىلدارى ديماش قۇدايبەرگەن ءبىر سۇحباتىندا «دايديداۋ» ءانىن الەمگە تانىتسام» دەگەن-ءدى. ءانشى ول ارمانىنا جەتتى. ال قوستانايلىق اقىن ابىلاي ماۋداننىڭ «دايديداۋ» پوەماسى 2005 جىلى تۋىپ, اۆتور كەيىن ءان مەن ءانشى تانىمال بولعاندا ءوز قاراجاتىنا ورىس, تۇرىك, اعىلشىن تىلدەرىنە اۋدارىپ, جيناق قىلىپ شىعارعان. اتالعان تۋىندى ەندى يسپان تىلىنە اۋدارىلىپ وتىر.
پوەمانىڭ باستى كەيىپكەرى – قازاقتىڭ عانا ەمەس, تۇگەل تۇركىنىڭ الاپات رۋحتى اقىنى ماعجان جۇماباەۆ. بىرەۋ بىلەر, بىرەۋ بىلمەس, ەل اۋزىندا بۇل ءان ماعجان ەسىمىمەن بايلانىستىرىلادى. وزگە تىلدەردە جارىق كورگەن جيناق ءانشىنىڭ شەتەلدەگى جانكۇيەرلەرىنىڭ زور قىزىعۋشىلىعىن تۋدىرادى. سويتە-سويتە اتالعان كىتاپ مەكسيكالىق اقىن ماگدا ەۆەنگاليستانىڭ كوزىنە تۇسسە كەرەك. ول مۇحيتتىڭ ارعى جاعىنان اۆتورمەن بايلانىسقا شىعىپ, شىعارمانى ءوز ىقتيارىمەن يسپان تىلىنە قوتارىپتى.
«دايديداۋدى» يسپانشا سويلەتكەنشە «ديماشقا حاتتار» (Letters to Dimash) اتتى جىر جيناعىن جازعان ماگدا ەۆەنگاليستا:
– ديماش شابىت سىيلاپ قانا قويعان جوق, ول ماعان الەمنىڭ تۇكپىر-تۇكپىرىنەن تاماشا ادامداردى جولىقتىرۋعا كومەكتەستى. سولاردىڭ ءبىرى – اقىن ابىلاي ماۋدان. ءبىز ونىمەن پىكىر الماسىپ, الىس قاشىقتىققا قاراماستان, دوس بولىپ كەتتىك. حات الماستىق. «دايديداۋ» كىتابى تۋرالى العاش الەۋمەتتىك جەلىدەن ءبىلدىم. ول بۇعان دەيىن ءتورت تىلدە جارىق كورىپتى. مەن ونى پوشتا ارقىلى الدىرتىپ, يسپان تىلىنە اۋداردىم. تاياۋدا ادەبي باسىلىمداردىڭ بىرىنە ۇسىنۋ جوسپارىمدا بار. ءبىزدىڭ ەلدە ونىڭ وقىرماندارى كوپ بولارىنا كۇمانىم جوق. جانكۇيەرلەرى ديماشقا قاتىسى بار ءار دۇنيەنى قۇرمەتتەيدى. بۇل – وتە كرەاتيۆ يدەيا! ديماش ارقىلى الەمگە قازاق ادەبيەتىن تانىتۋعا بەرىلگەن زور مۇمكىندىك. سىزدەردىڭ جەرلەستەرىڭىزدىڭ پوەماسى ارقىلى مەن قازاق ادەبيەتىنىڭ ءدامىن تاتتىم, ەرەكشە ۇنادى, اسەرلى تۋىندى. وسىنداي تاماشا پوەمانى يسپان تىلىنە اۋدارۋعا رۇقسات بەرگەنى ءۇشىن ابىلاي دوسىما العىسىم شەكسىز – دەپتى.
مەكسيكالىق اۆتور ابىلاي ماۋداننىڭ تۋىندىسى الدىنان تاعى ءبىر الەم اشقانىن ايتىپتى. ول – اقىن ماعجان جۇماباەۆ. بۇرىن مۇنداي ەسىمدى بىلمەيتىن ول ينتەرنەتتەن ولەڭدەرىن ىزدەپ تاۋىپ, اۋدارىپ وقيدى. «ماعجان – وتە رۋحتى, قۋاتتى اقىن ەكەن. قىزىعى, «Dears» (ديماشتىڭ جانكۇيەرلەرى) اراسىندا «دايديداۋدىڭ» اۆتورى يدەولوگيالىق سەبەپتەرمەن 24 مامىردا ءولىم جازاسىنا كەسىلگەن, ال اراعا جىلدار سالىپ, ءدال وسى كۇنى ديماش دۇنيەگە كەلگەن» دەگەن اڭىز بار. بۇل جاي قاۋەسەت بولسا دا, مەكسيكا تۇرعىندارىنىڭ سونداي اڭىزدى تامسانا ايتىپ ءجۇرۋىنىڭ ءوزى تاڭعالارلىق» دەپتى مەكسيكالىق اقىن ماگدا ەۆەنگاليستا.