انا – ءومىردىڭ وزەگى, شاڭىراقتىڭ شىراعى, ۇلتتىڭ ۇيىتقىسى. ءبىر قولىمەن بەسىكتى, ءبىر قولىمەن الەمدى تەربەتەتىن قۇدىرەت يەسىنىڭ قۇزىرىنداعى ەڭ ۇلى پارىز – ۇرپاق ءوربىتۋ مەن ءوسىرۋ. ياعني بالانى ومىرگە اكەلۋ بار دا, ونى ءوسىرۋ, ادام قاتارىنا قوسۋ بار. جاۋاپكەرشىلىگى زور, جۇگى اۋىر بۇل مىندەت قاي زاماندا دا وڭاي سوقپاعان.
بۇگىندە جاھاندىق دەموگرافيا ساحناسىنا الفا ۇرپاق, دالىرەك ايتساق, 2010 جىلدان كەيىن دۇنيەگە كەلگەن, قولىنا «سمارتفون ۇستاپ تۋعان» بۋىن شىقتى. بۇل بۋىننىڭ فەنومەنىن وزدەرىنىڭ ەمەس, ولاردى تاربيەلەپ وتىرعان انالاردىڭ تۇرعىسىنان قاراستىرۋ الدەقايدا ماڭىزدى. ال الفالاردىڭ اناسى كىم, ولار قانداي ترانسفورماتسيالاردى باستان كەشىپ جاتىر؟
وسى ساۋال توڭىرەگىندە ويىمىزدى تارقاتاردا بۋىندار كلاسسيفيكاتسياسىنا از-كەم ايالداعانىمىز ءجون بولار. امەريكالىق قوعامتانۋشىلار ۋيليام شتراۋس پەن نيل حوۋۆ نەگىزىن قالاعان بۋىندار تەورياسىنا سۇيەنسەك, 1984–2000 جىلدار ارالىعىندا تۋعان ۇرپاق ءۇ بۋىنى, كەيدە ميللەنيالدار دەپ اتالادى. قازىرگى بالالاردىڭ, ياعني الفالاردىڭ اتا-انالارى – كوبىنە ءدال وسى بۋىننىڭ ساناتىنان. ميللەنيالدار – جاھاندىق اۋقىمدا قاراستىرعاندا ەسكى جۇيە مەن جاڭا تەحنولوگيالىق ءداۋىردىڭ توعىسقان تۇسىندا تۇرعان «كوپىر» بۋىن. بۇل بۋىن كەڭەستىك كەزەڭنىڭ سارقىنشاعىن سەزىنىپ ۇلگەرگەن جانە تاۋەلسىزدىك جىلدارىنداعى وزگەرىستەرمەن قاتار ەسەيگەن ارالىق ۇرپاق سانالادى.
وسىناۋ وتپەلى كەزەڭدە ومىرگە كەلگەندەر الدىڭعى تولقىن اعا بۋىننان وزىنشە ەرەكشەلەندى. بۇل وزگەشەلىك اسىرەسە قىز-كەلىنشەكتەردىڭ مىنەز-قۇلقىنان قاتتى بايقالادى. ويتكەنى اينالامىزدان, الەۋمەتتىك جەلىلەردەن ايەلدەردىڭ پسيحولوگتەرگە, كوۋچتارعا وتە ءجيى جۇگىنەتىنىن, تەرەڭ ىزدەنەتىنىن, مۇنىڭ اسەرى وتباسىنان, ءتىپتى قوعامنان سەزىلىپ جاتقانىن كورىپ-ءبىلىپ ءجۇرمىز. پسيحولوگ ماماندار بۇل ءۇردىستى, ياعني ايەلدەردىڭ ءوزىن تانۋعا, دامىتۋعا دەگەن تالپىنىسىن «سانانىڭ سەرپىلىسى» دەپ باعالايدى. مۇنىڭ بىرنەشە ىرگەلى سەبەبى بار ەكەن.
ترانسگەنەراتسيالىق جاراقاتتارمەن جۇمىس: ميللەنيال ايەلدەر وزدەرىنىڭ عانا ەمەس, انالارى مەن اجەلەرىنەن قالعان ء«ۇنسىز قالۋ», «شىداۋ», ء«وزىڭدى قۇربان ەتۋ» سياقتى مىنەز-ق ۇلىق ۇلگىلەرىن تالداي باستادى. ولار اتا-اناسى ايتا الماعان ءسوزدى ايتۋعا, شەشە الماعان ءتۇيىندى شەشۋگە تالپىنادى.
پەرفەكتسيونيزم مەن «ساتتىلىك سيندرومى»: الەۋمەتتىك جەلىلەر ۇسىنعان ء«مىنسىز ءومىر» بەينەسى ايەلدەرگە اۋىر پسيحولوگيالىق قىسىم ءتۇسىردى. پسيحولوگكە جۇگىنۋ – وسى جالعان مىنسىزدىكتەن ارىلىپ, ءوز بولمىسىن قابىلداۋدىڭ جولىنا اينالدى.
شەكارا قويۋ مادەنيەتى: قازاق قوعامىنداعى «كەلىن», «انا», «جار» رولدەرىنىڭ اراسىندا ءوز تۇلعالىق كەڭىستىگىن جوعالتىپ الماۋ – وسى بۋىننىڭ باستى ماقساتى. پسيحولوگپەن جۇمىس ىستەۋ ارقىلى ولار «جوق» دەپ ايتۋدى, ءوز قاجەتتىلىكتەرىن ءبىرىنشى ورىنعا قويۋدى ۇيرەنىپ جاتىر.
ارينە, باستاپقىدا وسىناۋ ءۇردىستىڭ تەرىس سالدارى بولدى. جاس وتباسىلاردىڭ اراسىندا كيكىلجىڭ, تۇسىنبەۋشىلىك كوبەيدى, سوڭى اجىراسۋعا دەيىن ۇلاستى. بىراق كەلە-كەلە ەر-ازاماتتار تاراپىنان وتباسىن ساقتاپ قالۋعا, جارىنىڭ جانىنا جالاۋ بولۋعا, تۇسىنىسۋگە تىرىسۋ نيەتى دە كۇشەيە ءتۇستى. جالپى, وسى جاعدايدان وتباسىلىق قۇندىلىقتاردىڭ ۇلكەن سىناقتان ءوتىپ جاتقانىن اڭعارامىز. ال بەتبۇرىستىڭ قوعامداعى وڭ كورىنىسى رەتىندە زورلىق-زومبىلىققا جول بەرمەيتىن, وتباسى ينستيتۋتىن كۇشەيتەتىن كوپتەگەن زاڭي تەتىكتىڭ ىسكە قوسىلۋىن ايتۋعا بولادى. قازىر ايەلدەرگە دەگەن قۇرمەت, قامقورلىق جاڭا دەڭگەيگە كوتەرىلدى.
مىنە, ايەلدەردىڭ وسى «جەڭىسى», ۇمتىلىستارى, ىزدەنىستەرى, تۇپتەپ كەلگەندە, جاڭا بۋىن – الفا ۇرپاقتى تاربيەلەۋگە دايىندىق ىسپەتتى. بۇرىنعىلارعا انا بولۋ ءداستۇر مەن ينستينككە سۇيەنگەن «تابيعي مىندەت» بولسا, بۇگىنگى انالار ءۇشىن – ۇلكەن جاۋاپكەرشىلىگى بار ينتەللەكتۋالدى جوبا. الەۋمەتتىك زەرتتەۋلەر كورسەتكەندەي, ميللەنيال انالاردىڭ 80%-ى بالا تاربيەسىندە تسيفرلىق تەحنولوگيالاردى بەلسەندى قولدانادى, بىراق سونىمەن قاتار الاپات اقپاراتتىق قىسىمدى دا سەزىنەدى. قازىرگىنىڭ اناسى وشاق قاسىنداعى ادام عانا ەمەس, ول مەنەدجەر: بالاسىنىڭ ءجۇرىپ-تۇرۋىن, ۇيىرمەلەرىن, تاماقتانۋ راتسيونىن – ءبارىن قوسىمشالار ارقىلى ۇيلەستىرەدى; ول پسيحولوگ: ءتالىم-تاربيەنى نەيروپسيحولوگيا مەن ەموتسيونالدى ينتەللەكت تەوريالارىمەن ۇشتاستىرادى, ول سۇزگى: ينتەرنەتتەگى وراسان اقپارات تاسقىنىنان بالاسىنا پايدالىسىن ىرىكتەپ بەرەدى. ياعني الفا اناسى – ەرتەگىلەردى سمارتفوننان وقىتاتىن, بىراق سول ارقىلى ۇلتتىق قۇندىلىقتاردى سىڭىرۋگە ۇمتىلاتىن رەفورماتور, ءداستۇر مەن يننوۆاتسيانىڭ كوپىرى.
الفا – گرەك ءالفاۆيتىنىڭ العاشقى ءارپى. وسىلاي اتالعان ۇرپاقتى عالىمدار جاڭا الەم قۇراتىن جانە عالامشاردى ساقتاپ قالاتىن ەرەكشە بۋىن بولادى دەپ بولجايدى. ياعني الداعى زامانىمىزدىڭ الىبى الفالار بولماق. «الىپ تا انادان تۋادى» دەگەندەي, بۇل بۋىندى تاربيەلەۋدە انالاردىڭ ءرولى زور ەكەنى ايتپاسا دا تۇسىنىكتى. ەندەشە, سول جولداعى مۇرات اسىل, ەڭبەك جەمىستى بولعاي!