انالار مەن ارۋلار مەيرامىندا ۇجىمداعى قىز-كەلىنشەكتەردى قۇتتىقتاۋدى «قازاق گازەتتەرى» سەرىكتەستىگى ادەتتەگىدەي «Egemen Qazaqstan» عيماراتىندا ۇيىمداستىردى. وسىنداعى «Egemen Qazaqstan», «كازاحستانسكايا پراۆدا» گازەتىنىڭ ەرلەرى ارۋ ارىپتەستەرىنىڭ قولىنا گۇل ۇستاتىپ, جىردان شاشۋ شاشىپ, ءان سالىپ, مەرەكەلىك كوڭىل كۇي سىيلادى.
اۋەلگى اماندىقتان سوڭ, اقىن ءجۇرسىن ەرماننىڭ «ايەلگە ودا» جىرىن ءار جۋرناليست ەكى جولدان ايتىپ, ءبىر-بىرىنەن ءىلىپ اكەتىپ وقىعاندا, ولەڭ قۇلپىرىپ شىعا كەلدى. «قازاق گازەتتەرى» سەرىكتەستىگىنىڭ باس ديرەكتورى ديحان قامزابەك ۇلى ارىپتەس ارۋلاردى مەرەكەسىمەن قۇتتىقتادى. «بۇل مەرەكەنى انالار مەن ارۋلار مەيرامى دەپ ايتقاندى قۇپ كورەمىن. مەرەكەنىڭ سىر-سيپاتى وسى سوزگە سيادى دەپ ويلايمىن. ءبىز اينالامىزعا, اسىرەسە ايەلدەر قاۋىمىنا, انالارىمىز بەن اپا-قارىنداس, جەڭگەلەرىمىزگە اسقان ىلتيپاتپەن قاراعان سايىن الەم دە قۇلپىرا تۇسەدى. سىزدەردىڭ وتباسىنداعى ەڭبەكتەرىڭىز بەن جاۋاپكەرشىلىكتەرىڭىزدىڭ ءوزى جەڭىل ەمەس. ال قالام ۇستاعان جۋرناليستيكا ماماندىعىن تىزگىندەگەندە, بۇل جاۋاپكەرشىلىك ەسەلەنە تۇسەرى بەلگىلى. سوندىقتان كۇش-قۋاتتارىڭىز ارتا بەرسىن. انالار مەن ارۋلار مەيرامى قۇتتى بولسىن!», دەدى سەرىكتەستىك باسشىسى. قاپتال سويلەگەن باس ديرەكتوردىڭ ورىنباسارلارى ۆيكتور پريانيكوۆ پەن قامبار احمەت تە وسى ماندە ءۇن قاتىپ, قىسقا قايىردى.
«كازاحستانسكايا پراۆدا» گازەتىنىڭ باس رەداكتورى ءسابيت مالدىباەۆ اجەپتاۋىر ءان سالاتىنىن باسىلىم وقىرماندارى بىلمەيتىن شىعار. قالام ۇستاعانداردىڭ ءبىر قاسيەتى ارتىق شىعاتىنى بار. بۇرىن گيتارمەن ءان شىرقايتىن سابەڭ وسى جولى ەسترادا جانرىندا اۋەلەتتى. «Egemen Qazaqstan» گازەتى ينتەرنەت ءبولىمىنىڭ تىلشىلەرى ابزال ماقاش پەن شىڭعىس مۇقاەۆ سالعان جەردەن دۋەتپەن باستاپ ەدى, توپتاسقان قىز-كەلىنشەكتەر «جۇپ بولسىنعا» باستى. ءشامشىنىڭ ء«انىم سەن ەدىڭ» تۋىندىسىن اياقتاعان ەكەۋ «سەن سۇلۋعا» سالعاندا ايەلدەر قاۋىمى قوسىلا شىرقادى. قوس رەداكتسياداعى اقىن جىگىتتەر قازاق, ورىس تىلدەرىندە ولەڭ وقىپ تاماشاعا قالدىردى. مەرەكەلىك سالتاناتتى كەشتىڭ سوڭى كوپشىلىك بيگە ۇلاستى.